Esita îsi lek ogwu ubọọn̄
5
1a Me òso egwe ita, Esita onenichit uriaak kan̄, mè iwọọk ofọnti îtapbe mgbọ îkupbe me uriaak ya ito, mè initap ujuja ofọnti nwa ogwu ubọọn̄ kan̄. Mgbọ îtapbe ofọnti nwa ogwu ubọọn̄ isan̄a, irariaak uriaak igwen Awaji ogwu òkimọọn̄ inu geelek, mè ogwu òkinyan̄a ọmọ, mè isa ebibaan̄ iba ebi usun̄ kan̄ igbaalek kan̄ ije. Ene ge ke îsa ibieen̄ lek ikije, kubọk ebibaan̄ ìsibi isi ekirọ. Ogwulọ okpulu ujọn̄ọ edim ofọnti kan̄ ikaan̄ ikisa igọọk ọmọ me udun̄. 1b Uja kan̄ okekitoon̄ kubọk ura, mè iseek. Isi kan̄ okekitoon̄, mè ijaan̄, mè ikup unwọọn̄ unwọọn̄, ire, ukpook ojojot ọmọ me emen. 1c Inenije itibi otutuuk isotu iraka inin̄ isi ire isi ogwu ubọọn̄. Me ike mgbọ ya, ogwu ubọọn̄ ìkwekweek irek me inyọn̄ ogboon̄ melek òjot òjot nken ubọọn̄ me lek. Alata araran̄ mè ewuuk unye otu ewe okekimumọọn̄ me otutuuk lek ofọnti kan̄. Ogwu ubọọn̄ okukup ikeya òrirọ òrirọ, mè ikaan̄ mbiribọ me lek ikpọkpọ.1d Ogwu ubọọn̄ obebene isi, òrirọ ubọọn̄ okekibeen̄ me isi. Ikpọkpọ Esita, unaan̄-ejit owuwuku ijot ejit. Nwa ogwu ubọọn̄ ojijin, isi onwenwene, mè ibonigak iweek, mè iyaka ibot ibieen̄ me oguga ogwu usun̄ kan̄ enenwaan̄ ya ogwu melek kan̄ ejebe.
1e Awaji onwenwene ejit ogwu ubọọn̄, mè irọ inyi ikana mmemem. Inanan̄a ikeke me inyọn̄ ogboon̄ kan̄ jîp, mije, îyọt me lek. Inenibene Esita ikaan̄ me ubọk kan̄ mege lek osikibe. Ikekitumu ikọ ukarajit isa ikisuuk Esita ejit, ibe: 1f “Esita, keke orọ ni? Emi ìre nlom kwun̄, kayaka ìfieek owot. Owu òkpokwu. Ikan kiji ìkup inyi ebi ikike ebi eji ekikpulu. Je na me lek n̄a.”
2 Ogwu ubọọn̄ obebene okuba alata araran̄ kan̄ isa ichak ọmọ me lek ebek, mè ikat ọmọ iriaak me lek kan̄, mè ibe, “Tumu ikọ nyi emi.”
2a Esita onenibe, “Ogwu nte, chieen̄ mmun̄be owu, ìbet lek ǹkimun̄ ogwu osat Awaji. Mbiribọ òrirọ ubọọn̄ ònan̄a me lek kwun̄ ogwogwook emi me lek, mè itap emi ukpook me emen. Ogwu nte, owu òkup uyeke uyeke, ata ejit isibi owu me isi.” 2b Òkitumu ikọ ya me otu, irọrọn̄, mè igak iweek. Iyọyọt ogwu ubọọn̄ me lek enenen. Ebi ikwaan̄ kan̄ esasa me lek, mè irọ inyi ijomo.]
Esita îbeek mbeek me ubọk ogwu ubọọn̄
3 Ogwu ubọọn̄ onenido Esita ibe, “Esita nwa ogwu ubọọn̄, keke ore mbeek kwun̄? Kpa nyi emi, ke mârọ inyi owu. Ikerere ìkike iba ama ubọọn̄ n̄a ke oweek, mânyi owu.”
4 Esita onenifọọk ibe, “Soso ogwu ubọọn̄, ire môneme owu, ǹkigwen owu melek kè Aman ibe enyi egbaan̄ enu ijọk inorie mè miin̄ me cherekeyi, mije, mbem lek iban owu.”
5 Ogwu ubọọn̄ oraria etip mgbọ yaage igwen Aman ibe igwat lek inu, inyi ema erọ inu Esita otumube. Me usen yaage, ogwu ubọọn̄ melek Aman enunu ijọk ya Esita otobe inyi ogwu ubọọn̄. 6 Mgbọ ema ekirie ijọk ya, ogwu ubọọn̄ onenido Esita ibe, “Ìre keke ke oweek? Tumu, ke mênyi owu. Ìre keke ore mbeek kwun̄? Tumu nyi emi, ke mânyi owu. Ikerere ìkike iba ama ubọọn̄ n̄a ke oweek, mânyi owu.”
7 Esita onenifọọk ibe, “Mbeek n̄a mè inu nkiweek ìre ikeyi: 8 Ire owu ogwu ubọọn̄ obele ejit me lek n̄a, mè ire ineme owu ogwu ubọọn̄ inyinyi emi inu nkiweek, mè irọrọ mbeek n̄a inyi emi, môneme emi ire owu ogwu ubọọn̄ melek Aman inye lek igwu ikom inu ofifi ijọk mbato inyi enyi me iyakwut. Enyi isinu me iyakwut, mânenifọọk owu ogwu ubọọn̄ ikọ ya odobe emi.”
Aman îtọt ikpakpan̄ Mọdikai
9 Usen ya, mgbọ Aman okinan̄a me uwu ogwu ubọọn̄ ikije isibi, ejit îbele ọmọ enenen. Ekwukwu kan̄ si îbene enenen mije unwọọn̄. Ire, mgbọ îjebe ire otunchit uwu ogwu ubọọn̄ iboraka isibi, mè imun̄ Mọdikai okupbe me ere ya, mè imun̄ ibe ke Mọdikai ìkanan̄a ìkeke ìtọp ọmọ amọn, ìkanyinyi si ọmọ ulibi geege me mgbọ îmun̄be ọmọ okije iraka, Aman onanaan̄ ejit enenen, mè ijo ejit me lek kè Mọdikai. 10 Ire, itetet lek kan̄, mè ije iraka ifo uwu kan̄. Irere uwu, iraria ikwaan̄ igwen ebi unene kan̄ melek Jeres ogwu nwa. 11 Mgbọ ebi îgwenbe cha enube, Aman obebene igugo lek ubọk ọmọ obọọn̄be ubọọn̄ enenen, mè ikaan̄ bọn iwa, mè ubọk ogwu ubọọn̄ otobe ọmọ me irek umin, mè ibene ọmọ igak otutuuk ebi ibot mkpulu mè ebi ibot ikwaan̄ ogwu ubọọn̄ geelek. 12 Aman obebe si, “Ògak ge, Esita nwa ogwu ubọọn̄ ìkagwen ene geege ibe igọọk ogwu ubọọn̄ inu inirie inorie ijọk îtembe, ilọ emi gaalek. Ìkata me ikeya, îkpọk igwen si emi melek ogwu ubọọn̄ ibe eji enu si ijọk inorie mè miin̄ me iyakwut òbowele! 13 Ire, otutuuk inu chi ìkayaka ìkikup emi me lek kubọk inu geege mgbọ nsikimumun̄ Mọdikai ogwu Ju okikweek irek me otunchit uwu ogwu ubọọn̄.”
14 Jeres ogwu nwa mè otutuuk ebi unene kan̄ cha enenitumu inyi ọmọ ibe, “Egwuun̄ ọfọkọ eyi ubene kan̄ môrebe akọp mè ejit iba mè ìkike iba. Isigwuun̄ isan̄a, ewelegwe, tumu nyi ogwu ubọọn̄ ibe isa Mọdikai inyi esa esi etap olik me ebek ejeen̄ ekpan̄ me otu ọfọkọ ya. Mgbọ ya, owu mônenije me ubelejit igọọk ogwu ubọọn̄ isi irie inorie ijọk ya. Nteme ya onenineme Aman enenen, inyinyi ida, egwugwuun̄ ọfọkọ ya.”