Ogwu ubọọn̄ îrọ Mọdikai imin
6
Eririeen̄ usen ya, ilaak ìkanin̄ ogwu ubọọn̄ chieen̄. Eya orọ, iraria ibe esi esa ikpa mfufuk usen me usen eyi mkpulu kan̄ enu enefuk enyi ọmọ. 2 Enenimun̄ me emen ikpa ya ibe ke îkaan̄ mgbọ Mọdikai okpọkbe mbum otitọt Bigitana mè Teres enween̄be lek itọt ikpakpan̄ ogwu ubọọn̄ Ayaserọs. Ebirieen̄ iba chi, ìrere ebi esan̄abe òsok, ìre ene iba me lek ebi ibot ikwaan̄ ìkibem isotu uwu ogwu ubọọn̄.3 Ogwu ubọọn̄ ododo ibe, “Ìre kpasi umin mè ikpele irek ke enyi Mọdikai me lek inu yi îrọbe?” Ebi ikwaan̄ kan̄ cha ebi ìkikpọ ọmọ chieen̄ me lek efọfọọk ibe ke kperọ inu geege inyi.
4 Ogwu ubọọn̄ onenido ibe, “Ìre ekene òkup me emen oyet egep ya?” Mgbọ ya okpọkpọ ire mgbọ Aman okininin̄ agan̄ otu otu me emen oyet egep uwu ogwu ubọọn̄, ibonitumu inyi ogwu ubọọn̄ ibe esa Mọdikai esi ejeen̄ ekpan̄ me otu ọfọkọ ya ọmọ ogwuun̄be inyi.
5 Ebi ikwaan̄ ogwu ubọọn̄ efọfọọk ibe ke îre Aman okup me emen oyet egep. Ogwu ubọọn̄ onyinyi ida ibe esa ọmọ enu.
6 Aman oninin̄ uwu. Ogwu ubọọn̄ onenido ọmọ ibe, “Ìre keke ke mêrọ inyi ene ya ogwu ogwu ubọọn̄ obelebe ejit me lek inyinyi umin?” Aman onenikeek me lek kan̄ ibe, “Sà ìre ekene ke ogwu ubọọn̄ môbele ejit me lek inyinyi umin igak emi?” 7 Eya orọ, inenifọọk ibe, “Inu ogwu ubọọn̄ oborọ inyi ogwu îbelebe ejit me lek inyinyi umin ìre 8 ibebe esa ofọnti ge me lek ofọnti ubọọn̄ eyi ogwu ubọọn̄ owuukbe lek itap, mè inyinya ge eyi ogwu ubọọn̄ owuukbe lek ilibi me inyọn̄, eyi ekwuun̄be okpibot ubọọn̄ me ibot enu, 9 mè esa etap me ubọk ene ge me etete ebi ibot ikwaan̄ ogwu ubọọn̄ òrere ogwu ibot mkpulu, mè isa ofọnti ya itap ene ya ogwu ubọọn̄ obelebe ejit me lek inyinyi umin, mè esa ọmọ me inyọn̄ inyinya ya ekana me lek oniin̄ me emen ama, mè eketumu eje me isi kan̄ ibe, ‘Ikeyi ke ekirọ inyi ogwu ogwu ubọọn̄ obelebe ejit me lek inyinyi umin!’ ”
10 Ogwu ubọọn̄ onenitumu inyi Aman ibe, “Ngwa, gwat lek je. Si bọkọ ofọnti ubọọn̄ ya melek inyinya ya, mè si rọ otutuuk ubọk owu otumube ya nyi Mọdikai ogwu Ju, ogwu òkikweek irek me otunchit uwu ogwu ubọọn̄. Kalọlọ irọrọ otutuuk inu geelek otumube iso, geege ikalọ me lek.”
11 Ikeya ke Aman osi ibọkọ ofọnti ubọọn̄ ya melek inyinya ya, mè initap Mọdikai ofọnti ubọọn̄ ya, mè isa ọmọ me inyọn̄ inyinya ya ikikana me lek oniin̄ me emen ama, mè ikitumu ije me isi kan̄ ikibe, “Ikeyi ke ekirọ inyi ogwu ogwu ubọọn̄ obelebe ejit me lek inyinyi umin!”
12 Mgbọ inu cha orọbe isan̄a, Mọdikai okaka inikup me otunchit uwu ogwu ubọọn̄. Ire, Aman osasa ufieejit mè isi esip ilibi ugwat ugwat ifo uwu kan̄, 13 mè iben otutuuk inu òrọrọ ọmọ ikpa isan̄a inyi Jeres ogwu nwa, mè otutuuk ebi unene kan̄ cha. Ebi ìkinyi ọmọ nteme, melek Jeres ogwu nwa, ebebe, “Eyi Mọdikai orere ogwu ònan̄a me owot iman ebi Ju isibi, owu ora ibebene ikirọn̄. Kpunu irek owu ikọkọt ikeke ida ọmọ. Kpan̄asi ikeya, owu òborọrọn̄ inin̄ me ichep.” 14 Ikọ ya me otu kiban̄, ebi ibot ikwaan̄ ogwu ubọọn̄, ebi esan̄abe òsok, enunu inisa Aman ije ugwat ugwat isi irek inorie ijọk ya eyi Esita otembe.