Mîjeen̄ Aman ikpan̄ me otu ọfọkọ kan̄
7
Ogwu ubọọn̄ melek kè Aman enenisi ibesi igọọk Esita nwa ogwu ubọọn̄ irie inorie. 2 Me mgbọ ema ekinwọ miin̄ me òso usen iba ya, ogwu ubọọn̄ onenikpọk ido si Esita ibe, “Esita nwa ogwu ubọọn̄, ìre keke ke oweek? Tumu, ke mânyi owu. Ìre keke ore mbeek kwun̄? Ikerere ìkike iba ama ubọọn̄ n̄a ke oweek, mânyi owu.”3 Mgbọ ya ke Esita nwa ogwu ubọọn̄ onifọọk ibe, “Ire owu ogwu ubọọn̄ obele ejit me lek n̄a, mè ire ineme owu, inu nkiweek ìre: Tele ebek ugwem n̄a nyi emi. Mbeek n̄a ìre: Nan̄a lek ebi n̄a egat ugwem. 4 Mije, mînyam emi melek ebi n̄a inyi ibe ejijaka eji, mè ekpan̄ eji, mè echep eji esan̄a kpai. Mebe ke ebe enyanyam eji ebirieen̄ mè ebibaan̄ enyi me usun̄, kpamasan̄a amọn, mije, eya kè ore mfufet inu eyi kpomododo inenisisaak ogwu ubọọn̄.”
5 Ogwu ubọọn̄ Ayaserọs osasa me unye ida ido Esita nwa ogwu ubọọn̄ ibe, “Ìre ekene ore ene ya? Mọmọ ene ya ogwu òkakat ejit irọ inu òkup ikeyi?”
6 Esita obebe, “Ogwu nkukọp ya mè ogwu ochicha ya ìre Aman, ene ikpak keyi.”
Ukpook oninin̄ ijot Aman me emen me isi ogwu ubọọn̄ mè ogwu nwa. 7 Ogwu ubọọn̄ osasa uga unaan̄-ejit me ejit inan̄a ikeke jîp, mè itele miin̄ îkinwọ, mè isibi ifo emen uko ajakajak òkup me uwu kan̄. Ire, Aman owawalek ikup ikiriaak Esita nwa ogwu ubọọn̄ me ebek ugwem kan̄, mije, îriọọn̄ ibe ke ogwu ubọọn̄ îwuuk lek itumu ifieek inu ìborọ ọmọ.
8 Ogwu ubọọn̄ ikekinan̄a me uko ya ika inu me uwu ijọk ya, melek Aman irọrọn̄ me inyọn̄ ujọn̄ọ ikasi ere Esita osikibe ikweek, ìkpọkpọ ire ìkike. Ogwu ubọọn̄ otataan̄ ukpo ibe, “Ìre ene yi ìbonilaak nwa ogwu ubọọn̄ me isi n̄a me uwu n̄a gaalek ni?”
Ikọ ya òkitata me otu ogwu ubọọn̄, ebi ibot ikwaan̄ kan̄ echichit Aman isi. 9 Mgbọ ya, Arubona, ene ge me lek ebi esan̄abe òsok ìkisi ikwaan̄ inyi ogwu ubọọn̄, onenitumu inyi ogwu ubọọn̄ ibe, “Kpọ, ọfọkọ Aman ogwuun̄be ibosa ikpan̄ Mọdikai ogwu òrọrọ inyi ekakpan̄ ogwu ubọọn̄, ọmọ òwa okekebe me ere uwu kè Aman. Ujọn̄ọ ọfọkọ ya ìre akọp mè ejit iba mè ìkike iba.”