3 Ofifi kan̄, Esita onenirọn̄ me ijọn̄ me ukot ogwu ubọọn̄, mè ikito ito ibeek ibe ikput ijo ntọt eyi Aman ogwu Agagi otọtbe ibak ebi Ju mè otutuuk inu geelek îrọbe ikeme ema. 4 Ogwu ubọọn̄ onyanyana okuba alata araran̄ kan̄ inyi Esita, Esita onenibene lek igwuun̄, mè ikeke me isi ogwu ubọọn̄, 5 mè ibe, “Ire ineme owu ogwu ubọọn̄, mè ire owu obele ejit me lek n̄a, mè ire omun̄ ibe ke îre inu ònenen mè itat ibe owu òrọ, soso, nyi ida ibe ege ikpa echon ekana esa efaan̄ ikpa echi Aman gwun̄ kè Amedata ogwu owot iman kè Agagi, okupbe me lek kan̄ itọt, mè ige ibosa ikpan̄ ebi Ju ìkup me ido geelek òkup me irak kwun̄ ogwu ubọọn̄ isan̄a kpai. 6 Ìre kpa ubọk ke emi mâkọt isa chieen̄ imun̄ ijo inu òborọ ebi n̄a, mè ikọt ime? Sà ìre kpa ubọk ke emi mâmun̄ ubọk ekikpan̄ ebi owot iman n̄a otutuuk isan̄a, mè idaan̄ chieen̄?”

7 Ogwu ubọọn̄ Ayaserọs onenifọọk Esita nwa ogwu ubọọn̄ melek Mọdikai ogwu Ju ibe, “Nra isa uwu kè Aman inyi Esita. Aman me lek kan̄ si, mîjeen̄ ikpan̄ me otu ọfọkọ mije îyakabe isi kan̄ ida ebi Ju ikpakpan̄ ema isan̄a. 8 Mgbọ yi, ìsa ubọk kinyi gaalek ìge ofifi ikan me erieen̄ ogwu ubọọn̄, ike înemebe enyi ofolek ebi Ju, mè ìsa mkpọtubọk ogwu ubọọn̄ ìgon iman̄ ìkam me lek. Mije, inu geelek egebe me erieen̄ ogwu ubọọn̄, mè isa mkpọtubọk kan̄ igon iman̄ me lek, kpekifaan̄.”

9 Mgbọ yaage, egwegween̄ otutuuk ebi uti ikpa ogwu ubọọn̄ ititiin̄ me akọp usen ita mè ita me òso onyan̄ ita, òrere onyan̄ Sifan.^a Ema enenige otutuuk inu Mọdikai onyibe ema ida ibe ege enyi ebi Ju, mè ebi ibot mkpulu ido geelek, mè ebi ibot mkpulu agan̄ geelek, mè ebi ibot mkpulu ebi ife geelek ìkup me efit mè akọp ido iba mè jaaba ogwu ubọọn̄ ya, echi òbene me India inyana isi ire Etiopia. Ege ikan ya me ubọk ige inu eyi ebi ido geelek me usem otutuuk ebi ife geelek me otutuuk ido geelek, mè isa ubọk ige inu mè usem ebi Ju ige si inyi ebi Ju. 10 Ikeya ke Mọdikai oge ikan cha me erieen̄ ogwu ubọọn̄ Ayaserọs, mè isa mkpọtubọk iman̄ òriọọn̄ ogwu ubọọn̄ igon iman̄ ikam me lek, mè isa inyi ebi osat ìkikọp inyinya, ebi ìkikọp inyinya ogwu ubọọn̄ echi ekpukpobe ọkpọkpọ inyi ogwu ubọọn̄.

11 Ikan ogwu ubọọn̄ ya înyi ebi Ju me ama geelek unen ibe egbaan̄ etitiin̄, mè ebem lek kiban̄, mè ibe echep, mè ekpan̄, mè ejijaka urum akọn̄ ebi ido geelek mè ebi ife geelek, ebi mêbenbe akọn̄ inu me lek kiban̄, mè ekpan̄ ebibaan̄ mè nsabọn ebi ife cha, mè efum inu kiban̄. 12 Usen esun̄be inyi ebi Ju ibe erọ inu yi, me otutuuk ido geelek ogwu ubọọn̄ Ayaserọs okikpulu, ìre òso akọp mè usen ita me òso akọp mè onyan̄ iba, òre onyan̄ Adari.

12a Inu egebe me ikpa ya ire eyi:

12b “Emi, Ayaserọs, ikpele ogwu ubọọn̄, nge ikpa keyi ijet enyi ebi ibot mkpulu ìkikpulu efit mè akọp agan̄ iba mè jaaba, òbene me India isi ire Etiopia, mè inyi si ebi ìkekeke inye me lek mkpulu kiji. Ntọp enyi amọn.

12c “Owuwa ene, ebi ekpọkpọ ikinyi umin inan̄a me ata ejit ebi ìkinyi ema umin ekaan̄be, ekpọkpọ ikibene lek. Kpekọt ibeme ulobo umin enyibe ema, eyaka ikisi iweek itatap unan me lek ebi eji ekikpulu, mè ikitọt si ijo otitọt ibak ebi ìnyinyi ema umin cha. 12d Ema mîrọ inyi ibebe ene onirọ ichep me ejit ebilene. Eya ìkaso ema. Itọtọn̄, eyi ebi ekariọọn̄ge ata inu ekitọn̄ ema, okimin ema ibot. Ema ekekikeek ibe ke ema mênwọnọ osusut eyi unen itip-oyerebet, eyi Awaji ogwu òkimọọn̄ inu geelek okitip ebi ikpak. 12e Owuwa mgbọ, ebi ibot mkpulu isito ebi unene kiban̄ me irek mbubek mkpulu, ebi unene cha mîra ikifit ifiọk me lek ebi ibot cha, inyi egọọk ema egbaan̄ ubọk efiat eje ebi ekalọge ikan, mè isa me ikeya itaba ebi ibot cha itap me emen ufialek eyi kpebekọt isibi me emen. 12f Ebi ife cha mîra isa ofiaan̄ ònan̄a me ejit ikpak kiban̄ ifiat ata nkeek echi ebi ibot mkpulu cha ekaan̄be.

12g “Ìkare me emen mfufuk ukot ikaan̄ ekpabe inyi eji gaalek ke ekimun̄ inu ikpak eyi ebi ìkisa unye eyi mkpulu irọ inu me oniin̄ ikagbege. Ikerere me emen inu òkirọ me isi kiji mgbọ keyi, ọmọ òwa si. 12i Me mgbọ ònu me isi, eji mêtap efuuk geelek imumun̄ ibe ke utelelek mè esuuk îkup inyi otutuuk ene me mkpulu kiji, 12j sa me idọdọmọ aya ndọmọ, mè iruruk chieen̄ iwọlọ emen inu geelek ònu me isi kiji ikpọ, me ubọk ònenen, me kpunube mfeen̄.

12k “Ìkpọ-nu Aman, gwun̄ kè Amedata, ogwu Mesidonia, ogwu eji ebọkọbe itap. Kpunu eje ebi Pesia me emen kan̄, ọmọ ìkakakaan̄ si ata ejit eji ebi Pesia ekikaan̄ kubọk ge. 12l Ire, eji enenikaan̄ ọmọ ata ejit me lek, kubọk eji ekikaan̄ me lek ebi ido geelek, mè ito ọmọ iriaak ogwu ibot mkpulu, isa ọmọ irọ òso ene iba me irek mkpulu. Ebi kiji ekekinyi ọmọ umin, mè ikigwen ọmọ ‘Ogwu nte kiji,’ mè ikigele ibot ikwuun̄ inyi ọmọ mgbọ geelek ekimun̄ ọmọ. 12m Ire, ìkakọt ìtet ugumulek kan̄ ìkaan̄, iweweek ibọbọkọ eji mkpulu kiji isan̄a me ubọk, mè ibobọkọ si ebek ugwem kiji isan̄a. 12n Îweek si isasa ofiaan̄ mè ijo ifiọk kan̄ irọ ibe ekpan̄ Mọdikai, ogwu ònyanyan̄a ugwem kiji, mè ikirọ eji ata inu mgbọ geelek. Îweek si ibe ekpan̄ Esita, nwa ogwu ubọọn̄ kiji, ogwu ìkakaan̄ nrọ-nlọ geege me lek, mè ekpan̄ si otutuuk ebi ido kiban̄ esan̄a kpai. 12o Ìkikeek ibe ke îre ikechi ke ọmọ obosa irọ ibe eji ekakaan̄ ebi ntap-ubọk, inyi ọmọ ikaan̄ irek iyaka mkpulu kiji, ebi Pesia, ikana itap me ubọk ebi Mesidonia.

12ọ “Ire, eji mîweek isibi ibe ke ebi Ju, ebi ogwu ijo lek ene ikpak yi odọmọbe ibe ekpan̄ esan̄a cha, kpere ebi ìkirọ ijo inu geege. 12p Ema ekisa Ikan ònenen ichit iluk ugwem kiban̄. Ema ìre bọn Awaji òkup me ugwem, Ogwu Òbebene Ichit, Ogwu Òmimin Ichit, ogwu òrọrọ inu okije ijaan̄ me mkpulu kiji, ibene me ukot ebi nte nte kiji inire ukot kiji.

12r “Eya orọ, ìkpọ chieen̄ ìlọ me lek ikpa Aman gwun̄ kè Amedata ya oriabe ijet enyi, mije, mîkpan̄ ọmọ ogwu òtọtọt inu cha, mè otutuuk ototun̄ ukan̄ kan̄ me otu ọfọkọ me otunchit ama Susa. Awaji, ogwu òkikpulu otutuuk inu geelek, îgwat lek inyi ọmọ osusut ògbegbe ọmọ. 12s Ìgon ikpa keyi ìkana me ogbo ere geelek. Ìtele ibe ebi Ju ekeluk ugwem egọọk orọmijọn̄ kiban̄, mè ìtap ubọk ìnyi ema me usen ya esun̄be ikpakpan̄ ema, òrere akọp mè usen ita me akọp mè onyan̄ iba, òre onyan̄ Adari, inyi ema ekọt etim akọn̄ enyan̄a lek kiban̄ me ubọk ebi geelek mênube ema akọn̄ me lek me usen ya. 12t Mije, Awaji ogwu òkikpulu otutuuk inu geelek îrọ inyi usen ya ikana usen unwọọn̄, mè ikare usen mfufiat inyi ema, ebi îgobobe inyi lek kan̄.

12u “Eya orọ, enyi ebi Ju, ìsun̄ usen keyi ọkpọkpọ, kubọk usen òkup esese me etete otutuuk ijọk enyi ekirie, inyi bene me mgbọ keyi nyi isi, enyi melek ebi Pesia ebi ìkaan̄ enyi ata ejit me lek, mêkisun̄ usen ya, isa ikikeek unyan̄a kinyi, mè ebi ochicha kinyi esa ekekeek mfufiat kiban̄.

12v “Ama geelek, mè ìre ido geelek, eyi ìkalibi ìgọọk nteme kechi, ebesa ukan̄ mè oge akọn̄ ijijaka. Mêrọ ibe ukot ebilene ikajak me ama keya. Ìkare eya gaalek, mêrọ si ibe ebi kè anam oron mè unọn òwulu me inyọn̄ echacha ama ya, mege ire mgbọ geelek.”]

13 Enyi ikpa ya ibe esun̄ kubọk ikan me ido geelek, mè efuk esibi enyi otutuuk ebi ife geelek, inyi eriọọn̄, inyi ebi Ju mêbem lek iban usen ya, irọrọ ebi ochicha kiban̄ useen̄ inu etọtbe irọrọ ema.

14 Ebi osat ìkikọp inyinya ogwu ubọọn̄ echi ekpukpobe ọkpọkpọ inyi ogwu ubọọn̄ cha, esasa me ida ogwu ubọọn̄ ikọp isi ge isi ge ije. Mînyi si ikan yi me Susan, ama ibot.

15 Mọdikai oneninan̄a me isi ogwu ubọọn̄ isibi, mè ofọnti ubọọn̄ eyi oluku oluku mè okuket me lek, mè ikpele okpibot ubọọn̄ eyi alata araran̄ me ibot, mè uga ofọnti inyọn̄ irio irio eyi atalek ekwut lilin̄. Ebi ama Susa edidimi igwook me ubelejit mè unwọọn̄. 16 Me lek ebi Ju, mgbọ ya onenire mgbọ utoon̄^b mè unwọọn̄ mè ubelejit, mè ire si mgbọ ebi ene ekinyi ema umin me ere geelek. 17 Me ido geelek, me ama geelek, mè ere geelek etip ogwu ubọọn̄ mè ikan kan̄ orebe, ebi Ju ekikup me unwọọn̄ mè ubelejit mè ijọk melek irerie mè inwọnwọ. Owuwa ebi ofifi ido ekekikana ebi Ju, mije, ukpook ebi Ju înin̄ igak ema emen.