Nteme òkup esese esese
7
Karọ ijo inu,inyi ijo inu ikarọn̄ ìkeme owu.
2 Da lek bọkọ me lek nlilọ inu,
inyi ijo inu ida lek ibọkọ me lek kwun̄.
3 Kawop inu me emen udọn̄ inu òlọlọ,
inyi okarọkọ nlilọ inu mgbọ jaaba ìtoon̄ urot.
4 Kabeek Okumugwem irek òbebene,
kadodo si ogwu ubọọn̄ irek ilile.
5 Kakup me isi Okumugwem ìriak lek ata irọrọ kwun̄;
kasa si iriọọn̄-inu kwun̄ ìbaan̄ alọm me isi ogwu ubọọn̄.
6 Kaweek ikakana ogwu òkisibi oyerebet,
ire òkanye lek ìsoon̄ ikọkọt irọkọ nlilọ oyerebet itọp ifiin̄;
ire orọ, owu môlibi chieen̄ ogwu ilile,
mè isa me ikeya ifiin̄ ulibi kwun̄.
7 Karọ ogbo ama ijo inu,
karọ lek kwun̄ inu esip me isi ebi ama.
8 Karọ ijo inu ge mgbọ iba,
mije, ikerere mgbọ ge gaalek, òbobọbọkọ osusut.
9 Katumu ìbe, “Awaji Ogwu Òbebene Ichit
môkpọ owuwa otu ifuk uche nnyibe ọmọ;
sa me ikeya, ngwugwa geelek mâgwabe inyi ọmọ,
ìbobọbọkọ.”
10 Kachieek ibe efuuk ita owu me owot ikekiriaak uriaak;
kakpọ icheche inu inyi ebi ugbọọn̄ ìlọ chieen̄.
11 Kachak ogwu òkup me ikpele ujaralek me imọm,
mije, Awaji ogwu òkisiki ene mè ikibene ene ọmọ òwa.
12 Kakan̄ ataak ìtoon̄ ngwan̄ kwun̄,
kakakan̄ si ìtoon̄ ogwu unene kwun̄.
13 Kakikan̄ ataak,
mije, ikakan̄ ataak ìkakaan̄ oruru.
14 Kalọk ikọ ìjot ijọn̄ me ere ebi ugane ekupbe,
kakpọkpọ ìkitumu ikọ yaage mgbọ okiriaak uriaak.
15 Kacha unye unye ikwaan̄ mè ìre ikwaan̄ uko,
îre Awaji Ogwu Òbebene Ichit oto.
16 Kagọọk ebi ijo ife ìgbaan̄ ìje,
keek ibe ke osusut Awaji ìkpofiat mgbọ.
17 Riọọn̄ ubọk siki lek kwun̄ re ijọn̄,
mije, ukan̄ mè mkput ore osusut ebi kperiọọn̄ Awaji.
Mgbaan̄-nrọ melek ebi ofifi ene
18 Kasa unene kwun̄ ìnwene ikpoko,
kasa achubọk ngwan̄ kwun̄ ìnwene alata araran̄ ebi Ofiri.
19 Kachieek ibe ata nwa òriọọn̄ inu ilọ owu ubọk,
mije, uja kan̄ înye ewe igak alata araran̄.
20 Karọ nnaan̄ me lek ogwu usun̄ òkirọ ikwaan̄ ubọk ògbegbe,
mè ìre ogwu ọkọ ikwaan̄ òsasa
otutuuk lek kan̄ itap me lek ikwaan̄ kwun̄.
21 Ma gwun̄ usun̄ òkaan̄ ifuk-ibot kubọk omabe lek kwun̄,
kajit inyinyi ọmọ ikaan̄-lek.
22 Ìre okaan̄ eriembuuk? Kpọ chieen̄ me lek;
ire ema ikaan̄ oruru inyi owu, sun̄ ema.
23 Ìre okaan̄ bọn? Kan̄ inu nyi ema,
rọ inyi ema ebene me ijija ekesiki ibot.
24 Ìre okaan̄ bọn ebibaan̄? Mun̄ ibe ema kpefiat lek kiban̄,
mè kakimalek ìnyi ema irek ibe ekerọ inu òneme ema.
25 Osisa gwun̄ enenwaan̄ kwun̄ iche olom,
owu ora irọ ikpele ikwaan̄ isan̄a;
ire, mun̄ ibe ke osa inyi ogwu enerieen̄ òriọọn̄ lek.
26 Ìre okaan̄ nwa òtatat owu me lek? Kalap ìsibi;
ire, kayaka lek kwun̄ ìtap me ubọk ogwu owu okamage.
27 Nyi nte kwun umin me otutuuk ejit kwun̄,
mè kawuuk ufiak uman nga kwun̄ ofiakbe mije kwun̄.
28 Keek ibe ke ìre ema esa owu isibi inyọn̄;
owu òbojeje ikọt ikpe ema mkpukpe
me lek inu ema erọbe inyi owu?
29 Kaan̄ ukpook me lek Okumugwem me otutuuk ejit kwun̄,
mè nyi ebi ngwugwa kan̄ ulibi.
30 Sa otutuuk unye kwun̄ ma Ogwu Òrorom owu,
mè kakpọ ebi ikwaan̄ kan̄ ìlọ chieen̄.
31 Tet ukpook Okumugwem, mè nyi ogwu ngwugwa ulibi,
mè kinyi ọmọ inu ngwugwa kubọk Awaji onyibe ida ibe ekerọ:
adasi mfut, mè ngwugwa awọ, mè oguga anam ngwugwa,
mè ngwugwa isasa igbana inu,
mè adasi mfut echi inu òkup mbuban.
32 Nyana ubọk kwun̄ che inu nyi ogwu ugbọọn̄,
inyi ugbana kwun̄ iso ifuk.
33 Chili ubọk che inu nyi otutuuk ebi ìkup me ugwem,
ikerere ebi ìkwakwaan̄, katele irọrọ nnwọn inyi.
34 Kaje agba agba me lek ebi ito okupbe me chieen̄,
ire, gọọk ebi ìkifieek ejit fieek ejit.
35 Kakitele isisi ikpọ ebi orukan̄;
mije, sa me ikeyi, ebi ene mêma owu.
36 Me emen inu geelek okirọ, kikeek okputut usen ugwem kwun̄;
eyi môrọ inyi owu okakirọ ijo inu mgbọ geege.