6
Kare ogwu ochicha me ere owu morebe unene,mije, ijo erieen̄ ìkisa esip mè ochak inu,
kubọk îkikup inyi ogwu otu alọm iba.
2 Kachieek ibe ikpele ulọk ebek isa owu isaba okwaan̄,
inyi ikatọọn̄ owu ìgwak kubọk orie eriembuuk okigon ene.
3 Ikpele ulọk ebek môrọ owu òkeke kubọk uti òchachiaak,
kpunu inwan̄ me lek, kpunu mfut me lek.
4 Ijo ikpele ulọk ebek ìkekijijaka ogwukaan̄ lek,
mè irọ ibe ikana inu ochak inyi ebi ochicha kan̄.
Ata unene mè ijo unene
5 Utop utop ikọ ìkitaba owuwa unene inu,
ata otu usem òkisibi ene me otu
ìkirọ ene ikaan̄ owuwa ebi òriọọn̄.
6 Kaan̄ ebi òma wa,
ire, ebi nteme kwun̄ ere ene ge gaalek me etete obop ene.
7 Ire obotet ene unene, tọtọ ene ya kpọ;
kagwat lek ìtoon̄ ejit me lek.
8 Usini ene ekire unene mgbọ îtatbe ema me lek,
ire, kpebekeke igba owu mgbọ uyọrọlek otetbe owu.
9 Unene kwun̄ môkọt ikana ogwu ikọ kwun̄,
mè isa ibot ikọ ọmọ melek kwun̄ ekaan̄be isi ikpa ikana,
inyi esip itet owu.
10 Unene kwun̄ môkọt ikigọọk owu ikup me lek ikasi ikirie inorie,
ire, ìkpokeke igba owu mgbọ uyọrọlek otetbe owu.
11 Mgbọ inu okije ijaan̄ me lek kwun̄,
ọmọ môriaak owu me lek enenen,
mè ikana ogwu òkitọ ikọ inyi ebi ikwaan̄ kwun̄;
12 Ire, owu osikwala igwook,
ọmọ îra igwu ikom ikirọ ikeme owu,
mè ikilet lek kan̄, inyi owu okayaka ìkimun̄ ọmọ.
13 Da lek bọkọ me lek ebi ochicha kwun̄,
mè gwọk chieen̄ me lek ebi unene kwun̄.
14 Unene ògbegbe utoon̄-ejit ìre atalek okwukwek,
ene geelek òmumun̄ ojelek unene òkup ikeya ge,
ìmun̄ inu ubọọn̄.
15 Unene ògbegbe utoon̄-ejit îsaba otu ewe,
kpunu inu ebesa itọ ikeke kan̄.
16 Unene ògbegbe utoon̄-ejit ìre ugwun̄ òkinyan̄a ebek ugwem ene,
ebi ìkitet ukpook me lek Okumugwem
ekimun̄ ojelek unene keya.
17 Ebi ìkitet ukpook Okumugwem ekire ata unene,
mije, ubọk ene okupbe ke ogwu unene obokup.
Ugbana ònan̄a me lek iriọọn̄-inu
18 Gwun̄ n̄a, gọbọ ikween̄-inu bene me ijija kwun̄,
mege owu môtibibe isọọn̄, owu òbokikakaan̄ iriọọn̄-inu.
19 Wop iriọọn̄-inu kubọk ogwu òbak ijọn̄ iwop uko,
mè kweek kikpọ atalek irọrọkọ kan̄;
owu môbọkọ ukwook sọntiik me mgbọ okiwop,
ire, ìkpofiin̄ mgbọ, owu môrerie mfut kan̄.
20 Ogwu ìkakọt ìtọ ikọ ìnyi lek kan̄, iriọọn̄-inu ìkikup me lek ifi ifi;
ogwu tuntun ìkpokọt igọọk iriọọn̄-inu ikup ìfiin̄.
21 Iriọọn̄-inu môsa ulobo kan̄ ikeme ọmọ kubọk ewuuk;
ọmọ môbeben itọp ito me ikafiin̄ge mgbọ.
22 Iriọọn̄-inu ìre iriọọn̄-inu, kubọk erieen̄ kan̄ orebe,
ìkare owuwa ene ebekọt iriọọn̄ iriọọn̄-inu.
23 Gwun̄ n̄a, gban̄ utọn̄,
bọkọ itataba ubọk me utọn̄ nkitaba owu tap,
mè kajit nteme n̄a.
24 Tap ukot me emen mkpọn eyi iriọọn̄-inu,
mè ben ebek kwun̄ tap nwaan̄ me otu olik igbọ kan̄.
25 Beme ọmọ me oguga kwun̄,
kasisaak lek me emen ọgbọn kan̄.
26 Sibi na me lek kan̄ me otutuuk ibot ejit kwun̄,
mè sa otutuuk unye kwun̄ je me oniin̄ kan̄.
27 Kpọ kana ere, mè week, ke môsan̄a lek kan̄ ijeen̄ owu;
ositet ọmọ ire ubọk, kachieek ibe ifo.
28 Me òta kan̄, mônyi owu isiki-efuuk,
mè inikana unwọọn̄ inyi owu.
29 Mkpọn kan̄ cha mônenikana ikput-lek kwun̄;
olik igbọ kan̄ môrere awudu umin inyi owu.
30 Ọgbọn kan̄ mônenire asi ebek alata araran̄,
ugọbọ kan̄ môrere olik ekwut irio irio.
31 Owu môtap ọmọ kubọk awudu umin,
mè ikwuun̄ ọmọ me ibot kubọk okpibot ubọọn̄ eyi ubelejit.
32 Gwun̄ n̄a, ire ineme owu, owu môkọt ikween̄ inu,
ire otap lek ikween̄, owu môre ogwu òkigwat lek itet inu.
33 Ire okima igbagban̄ utọn̄, owu môkaan̄ ifuk-ibot,
ire ogbala utọn̄, owu môkaan̄ iriọọn̄-inu.
34 Si ere ebi ugane etitiin̄be,
kpọ ogwu òkaan̄ iriọọn̄-inu me etete kiban̄,
mè tet lek kwun̄ riaak me lek ene ya.
35 Isikikpa inu ofolek Awaji, kisiki lek gban̄,
kachieek ibe urọk geege òkijeen̄ iriọọn̄-inu iraka owu.
36 Ire omun̄ ogwu òkaan̄ ngobo-ntet,
kinan̄a keke ewelegwe ewelegwe si lek kan̄,
otu ukot kwun̄ ikakinan me isotu kan̄.
37 Kaan̄ ekiket ofolek orọmijọn̄ Okumugwem,
kiwọlọ ikan kan̄ mgbọ geelek kana me ejit kwun̄.
Îre ọmọ obonyi ejit kwun̄ ngobo-ntet,
owu mônenikaan̄ iriọọn̄-inu ya eyi òkilọk owu.