Ubọk iluk-ugwem me usen me usen
5
Kasa inu ubọọn̄ kwun̄ ìbene ibot,mè ìkitumu ìbe, “Eyi nkaan̄be îso emi.”
2 Kasa ulọk ebek mè unye kwun̄
ìlibi ekot ekot ìgọọk inu ejit kwun̄ okiweek.
3 Katumu ìbe, “Ekene okaan̄ unye me lek n̄a?”
mije, Okumugwem ìkpolọlọ isusulu owu osusut.
4 Katumu si ìbe, “Nrọbe ijo inu, ìre m̀bọbọkọ osusut ge ni?”
bak me lek ke Okumugwem ìkakigwat lek ìnaan̄ ejit.
5 Katoon̄ ejit ìbe ke Awaji ìkekitele ijo,
mè ìkpọkpọ ìkirọ ijo inu ge ìtoon̄ me inyọn̄ ge.
6 Katumu ìbe, “Nsan Awaji îmin,
môtele owuwa ijo nrọbe;”
mije, îre ọmọ okaan̄ nsan mè unaan̄-ejit,
unaan̄-ejit kan̄ môkeme ogwu òrọ ijo inu.
7 Kafiat mgbọ igwugwu ikom inu me lek Okumugwem,
kakibebieen̄ si ìnyi isi usen geelek;
mije, unaan̄-ejit kan̄ mônu owu me nriki,
owu môkwukwu me irak ubọk osusut kan̄.
8 Kasa inu ubọọn̄ okaan̄be me ngan ìtoon̄ ejit,
mije, ìkporọ owu oruru me usen ùrioon̄ isinu.
9 Kagwuun̄ awala me lek efet geelek,
kajeje si me lek oniin̄ geelek;
[eyi ìre inu ebi isi iba ekirọ.]a
10 Keke nye me lek inu oriọọn̄be me ejit kwun̄ ibe ke îtat,
ikọ kwun̄ ikanwunween̄.
11 Gwat lek kinọ ikọ,
ire, kiteteen̄ ikọ kwun̄ tumu.
12 Ire oriọọn̄ ibot ikọ, fọọk ogwu melek kwun̄ otu;
ire, ire òkariọọn̄, sa ubọk chit otu kwun̄.
13 Umin mè esip òwa me lek ikọ itutumu,
inu otumube môkọt ifiat owu.
14 Karọ ibe ekegwen owu ogwu òkpa ene,
kasa usem otu kwun̄ ìkọọk ufe ìnyi ene;
mije, ike ekiyomo ogwu inọ itap esip me isi,
ikeya si ke ebetip ogwu otu alọm iba oyerebet.
15 Karọ inu geege eyi môtapbe ene unan me lek,
mè ìre mije ilile inu, mè ìre mije sọntiik inu.