Ikpọkpọ chieen̄ me lek ebi ugbọọn̄ mè ebi una
4
Gwun̄ n̄a, kakwek ogwu ugbọọn̄ ibe ikaweek owot kan̄,katele ebi una ekup ekebubeen̄ chieen̄ chieen̄.
2 Karọ ogwu uraafiọọn̄ inu ufieejit,
karọrọ si ogwu una inaan̄ ejit.
3 Katap ofifi ufialek ìsọkọ lek ogwu ufialek ominbe igak,
kafafiat si mgbọ inyinyi ogwu una inu.
4 Kajit mbeek ogwu mbeek òkisak ofaak,
kada si isi kwun̄ ìsan̄a me lek ogwu ugbọọn̄.
5 Kada chieen̄ kwun̄ ìsan̄a me lek ogwu una,
mè karọ ibe ene geege ifieek otu inyi owu.
6 Mije, ire ene isa me ufieejit ifieek otu inyi owu,
Ogwu Òrom kan̄ mônọ uriaak kan̄.
7 Rọ inyi ebi ama ema owu;
gele ibot siki nyi ogwu ilile.
8 Gban̄ utọn̄ me lek ikọ ogwu ugbọọn̄,
mè tọn̄ọ isi chieek ọmọ amọn.
9 Nyan̄a ogwu ekitutuku sibi me ubọk ogwu òkitutuku ọmọ,
mè katet ukpook ifefieek unen oyerebet.
10 Kana ute nyi gwun̄ kpà-nte,
mè tap ubọk nyi ogwu uga,
òrere nwakpa, kubọk ke owu ìre nlom kan̄.
Owu mônenikup kubọk gwun̄ Awaji Ogwu Òbebene Ichit,
Awaji mômama owu igak ike nga kwun̄ omabe owu.
Iriọọn̄-inu ìkijeen̄ ene inu
11 Iriọọn̄-inu ìkekikpukpo ebi ìkakaan̄ ọmọ,
inyi esibi isi,
mè ikikpọ chieen̄ me lek ebi ìkiweek ọmọ.
12 Ogwu geelek òmama ọmọ ìma ugwem,
ebi ìkibene ewelegwe ewelegwe ikiweek ọmọ
mêkaan̄ unwọọn̄ òjot òjot.
13 Ogwu geelek òkakat iriọọn̄-inu ikaan̄ inye môkaan̄ umin,
ere geelek ene ya osibi, Okumugwem ìbogbagbana ere ya.
14 Ebi ìkisa iriọọn̄-inu irọ ikwaan̄
ekirọ ikwaan̄ inyi Awaji Ogwu Mbuban,
Okumugwem ìkimama ebi ìmama iriọọn̄-inu.
15 Ogwu geelek òsisiki ibot inyi iriọọn̄-inu
môkisibi oyerebet inyi ebi esese ido,
ogwu geelek ògbagban̄ utọn̄ inyi ọmọ môluk me utelelek.
16 Ogwu itoon̄ ejit me lek kan̄, môkaan̄ ọmọ me ìrot,
bọn ene ya si mêkaan̄ ọmọ me ìrot.
17 Me ibebene, iriọọn̄-inu môsa ene ije
me oniin̄ geelek òkup uyọt uyọt,
mè isa ukpook mè ufieek-owot inu me lek ene,
mè isa ikan̄-inu kan̄ itap ene ufialek me lek,
mege môkọtbe itoon̄ ene ya ejit me lek,
mè isa orọmijọn̄ kan̄ itọ ene ikpọ.
18 Me òta kan̄, mônenigwu ikom inu ininyi ene ya ubelejit,
mè ichili nlelet inu kan̄ ijeen̄ ene ya.
19 Ire ene ije ikwala, môjuuk ene ya itele,
mè itele ibe isi ibọkọ mkpukpe ògbe ọmọ.
Inyinyi lek ulibi
20 Gwun̄ n̄a, sa irek okaan̄be rọ ata inu,
mè gbala chieen̄ me lek ijo inu;
kachieek ibe esip itet owu me lek ogwu orebe.
21 Mije, îkaan̄ esip òkirọ ene irọ ijo inu;
îkaan̄ si esip òkinyi ene umin mè ulibi.
22 Kagobo ene isi ìsa ìtap unan me lek kwun̄,
kalibi si ene chieen̄ ìsi ìwaka ìrọn̄.
23 Kariaan̄ otu mgbọ itutumu ikọ ogbebe,
kalelet si iriọọn̄-inu kwun̄.
24 Ikọ etumube ke ekisa iriọọn̄ ibe ene îkaan̄ iriọọn̄-inu,
usem ònan̄a ene me otu alọm
ke ekisa iriọọn̄ ibe ene îkaan̄ ikween̄-inu.
25 Katumu ikọ ìkeme atikọ,
kpan̄asi ikeya, bọkọ esip me lek inu okariọọn̄ge.
26 Katet esip itutumu ijo kwun̄ isibi,
karoon̄ lek ikwekwek mun̄ ibe ikabaak ìnin̄ okwaan̄.
27 Kanin̄ usun̄ ìnyi ogwu mbubut,
kagọọk ibe ene îsibi isi, mè ìrọ inu ìnwọn ene ya me lek.
28 Tim etim ibot atikọ, ikerere ìbosa mkpa inu,
Okumugwem Awaji môtim akọn̄ ibot kwun̄.
29 Kare ogwu unye uga me itutumu ikọ,
mè ìnire duludulu mè ugbek me isisi ikwaan̄.
30 Kare egbe àtat me emen uwu,
mè ìnire ogwu inu ìkakinin̄ chieen̄
me etete bọn ikwaan̄ uwu kwun̄.
31 Kakinyana ubọk ìbọkọ,
mè ìchit ubọk mgbọ inyinyi isikem.