Inyinyi ute mè uga ulibi
3
Nsabọn, ìgban̄ utọn̄ ìnyi emi nte kinyi;ìrọ inu ntumube, inyi enyi ekaan̄ utelelek.
2 Mije, Okumugwem ìkimin ute igak ebi bọn,
mè ikirọ unen uga okaan̄be me lek bọn inye.
3 Gwun̄ ònyi ogwu ute umin
ìkirọ esuuk me lek ijo inu îrọbe;
4 gwun̄ ònyi ogwu uga ulibi
ìbet lek ogwu òkititiin̄ inu ubọọn̄ isun̄ inyi lek kan̄.
5 Gwun̄ ònyi ogwu ute umin
môkaan̄ unwọọn̄ me lek bọn echi kan̄,
isiriaak uriaak, Awaji mônọ uriaak kan̄.
6 Gwun̄ ònyi ogwu ute umin môluk ujọn̄ọ ugwem,
ogwu òkirọ ogwu uga ibele ejit
ìkisiki ibot inyi Okumugwem;
7 ìbokisi ikwaan̄ inyi ogwu ute mè ogwu uga,
kubọk ogwu usun̄ okisi ikwaan̄ inyi ogwu ute-uwu.
8 Nyi nte kwun̄ umin me irọrọ kwun̄ mè ikọ otu kwun̄,
inyi ugbana kan̄ ire owu lek.
9 Ugbana eyi ute ìkirọ uwu ebi bọn ikeke inye;
ire, ufieek-otu eyi uga ìkigwak uwu bọn ire lek ọdọ.
10 Kasiki nte kwun̄, mè ìsa me ikeya ìrọ lek kwun̄ ìmin,
mije, isisiki nte kwun̄ ìkponyi owu umin.
11 Umin eyi gwun̄ ìbonan̄a me lek umin înyibe ute,
ekanyige uga ulibi ìre inu esip inyi gwun̄.
12 Gwun̄ n̄a, tap ubọk nyi nte kwun̄ mgbọ isikan,
me otutuuk ugwem kan̄, karọ ọmọ inu ufieejit.
13 Ikerere ibe ke ìkayaka ìkikọt ìkeek inu ìjaan̄,
kaan̄ ukarajit me lek kan̄;
kasa mije otutuuk lek kwun̄ osobe ifuk ìkpọ ọmọ ìsiki chieen̄.
14 Ata ejit okaan̄be me lek kè nte kwun̄, Okumugwem ìkpowuuk,
môkana mkpukpe okpebe me ibot ijo inu kwun̄;
15 usen uyọrọlek isitoon̄ owu,
Okumugwem môkeek,
mè isa irọ owu nnwọn;
ijo inu kwun̄ môniniin̄ ichieen̄
kubọk senesene mun̄ ewuuk okininiin̄ ichep mgbọ ura isiyok.
16 Ogwu geelek òjijit ogwu ute ìbet lek ogwu òtutumu Awaji ilọ;
ogwu geelek òrọrọ ogwu uga inaan̄ ejit,
Okumugwem îfieek otu inyi.
Igegele lek isiki
17 Gwun̄ n̄a, rọ inu kwun̄ geelek me isiki-lek,
ke ebi Awaji obọkọbe itap mêma owu.a
18 Ike okimin me irek, ikeya ke owu obokisiki lek;
ikeya ke inu kwun̄ obokineme Okumugwem.
ire, ebi ìsisiki lek ke Okumugwem
okichili nlelet inu kan̄ ijeen̄.]b
20 Okumugwem îkaan̄ ikpele unye enenen,
ire, îre sa me lek ebi ìsisiki lek ke îkikaan̄ umin.
21 Kaweek irọriọọn̄ inu òyọyọt igak owu irọriọọn̄,
kaweweek si iwọwọlọ iriọọn̄ inu unye kwun̄ kpokọtbe iben.
22 Gwuun̄ chieen̄ me lek inu Awaji otọbe ibe owu òrọ,
mè san̄a chieen̄ me lek nlelet inu echi ìkachili ìjeen̄ owu.
23 Katap lek me lek inu eyi ubọk kwun̄ ìkpore lek,
mije, echi ejeen̄be owu
îwa iraka inu ejit ebilene obokọt igobo itet.
24 Owuwa ene mîgọọk nkeek eyi kiban̄, mè ije ilọ oniin̄;
nlilọ nkeek kiban̄ îwuwọlọ ema ifuk-ibot.
Ugumulek
ire kpunu ifuk-ibot, iriọọn̄-inu ìkpokọt ikup.]c
26 Me òta mgbọ, ogwu unye-ibot ìbokaan̄ ufialek;
ogwu òmama ikekirọ inu afa ìboje me inu afa ikwu.
27 Uyọrọlek uyọrọlek obokikeme ogwu unye-ibot;
ogwu ijo ene ìkirọ ijo inu ge itoon̄ me inyọn̄ ge.
28 Uyọrọlek ogwu ugumulek ìkakikaan̄ igwagwa,
mije, inu ikpak îtibi ugwun̄ ijọn̄ me emen kan̄.
29 Ebi ìriọọn̄ inu ekisa urọk ikween̄ inu,
utọn̄ okigban̄ ikọ ke ebi ìriọọn̄ inu ekiweek.
Icheche inu inyi ebi ugbọọn̄
30 Ike mun̄ okiniin̄ ukan̄ òkisasak,
ikeya si ke icheche inu inyi ebi ugbọọn̄
okikana mkpukpe ibot ijo inu.
31 Ogwu ònyi ata inu me useen̄ ata inu
îkaan̄ ata ekiket iban mgbọ ònu me isi;
mgbọ ọmọ isinan̄a irọn̄, môkaan̄ ntap-ubọk.