Ikekeke inye me lek Awaji
2
Gwun̄ n̄a, ire obosi ikwaan̄ inyi Okumugwem,nen̄e lek kwun̄ sun̄ ban ntọ-mkpọ.
2 To ejit kwun̄ tat, mè keke nye,
kararan lek ìrọ inu me mgbọ ùrioon̄ isikeme owu.
3 Gọbọ Okumugwem kam, katetele ubọk,
inyi inu ije ijaan̄ owu me lek me òta usen.
4 Bọkọ inu geelek òrọrọn̄ ikeme owu tap,
ikerere òrerie esip, kat ejit.
5 Mije, ekisa ukan̄ ikala alata araran̄ itọ ikpọ,
ikeya si, ebi Awaji okibọkọ itap
ìre ebi esabe ukan̄ eyi esip ikala itọ ikpọ.
6 Toon̄ Awaji ejit me lek, ke môtap ubọk inyi owu;
je me oniin̄ òtatat, mè kaan̄ ikpọchieen̄ me lek kan̄.
7 Enyi ebi ìkitet ukpook
Okumugwem, ìkup ìkikpọ nsan kan̄;
ikagwu isi ìkom ìtele ọmọ, inyi enyi ekanan̄a ìrọn̄.
8 Enyi ebi ìkitet ukpook
Okumugwem, ìtoon̄ ọmọ ejit me lek;
inyi enyi ekafiin̄ mkpukpe kinyi.
9 Enyi ebi ìkitet ukpook
Okumugwem, ìkpọ chieen̄ ikakaan̄ ata inu,
mè ikakaan̄ nsan, mè unwọọn̄ eyi kpotabe.
10 Keek-nu ebi ukot ikaan̄ mè kpọ-nu:
ekene otoon̄ ejit me lek Okumugwem,
Okumugwem otọtọbọ ene ya ilọ?
Sà ìre îkaan̄ ogwu òkekeke inye ikitet ukpook kan̄,
ọmọ ojijit ene ya itele?
Sà ìre ekene otaan̄ ukpo igwen ọmọ,
ọmọ okpọkpọ ene ya ilọ chieen̄?
11 Mije, Okumugwem ìre ogwu njijin mè ogwu nsan;
ìkitetele ijo inu inyi ene, mè ikinyan̄a ene me usen ufialek.
12 Môfieek inyi ebi ukpook owot mè ebi ubọk ogbeen̄be,
mè ogwu ijo òkirie agan̄ iba.
13 Môfieek inyi ogwu ejit ìkanye, ogwu ikakaan̄ge ichechieek;
ogwu òkup ikeya, Awaji ìkpobem me usen uyọrọlek.
14 Môfieek inyi owu ogwu ikakatge ejit ìkup me emen ufialek,
keke ke owu oborọ me usen
Okumugwem mônube inirọ ifuk?
15 Ebi ìkitet ukpook Okumugwem kpekikpaka ikọ kan̄,
ebi ìmama ọmọ ekije me oniin̄ kan̄.
16 Ebi ìkitet ukpook Okumugwem ekiweek irọrọ ejit kan̄ ibele,
ebi ìmama ọmọ ekitap otutuuk efuuk kiban̄ me isusun̄ Ikan kan̄.
17 Ebi ìkitet ukpook Okumugwem ekinenen̄e ejit kiban̄ isun̄,
mè ikigele lek isiki me isi kan̄.
18 Kè eji erọn̄ enin̄ ubọk Okumugwem,
ekarọn̄ ìnin̄ me ubọk ebilene;
mije, ike òrirọ ubọọn̄ kan̄ ominbe iyaka,
ikeya si ke nsan kan̄ omin iyaka.