Sirak 1

Sirak

Iriọọn̄-inu ìkinan̄a me ubọk Okumugwem gaalek

Otutuuk iriọọn̄-inu ìnan̄a me ubọk Okumugwem,

ìkukup melek kan̄ ire mgbọ geelek.

2 Achiaan̄ agba awaji, mè otu ibot òkirọn̄ọ,

mè otu ifuk usen mgbọ ikakaan̄ge itata,

ìre ekene obokọt ifuk?

3 Ubene akpabin inyọn̄, mè uwele linyọn̄,

ugwuuk okwaan̄, mè udọk iriọọn̄-inu,

ìre ekene obokọt iweek isibi?

4 Edasi irom iriọọn̄-inu sabum inu geelek,

atalek ngobo-ntet ìkukup akarake mgbọ ikakaan̄ge itata.

[ 5 Ogbuuruk ere iriọọn̄-inu onan̄abe

ìre ikọ Awaji eyi òkup me emen inyọn̄ ere òbebene ichit;

oniin̄ eyi iriọọn̄-inu ìkup me emen Ikan Awaji,

eyi òkup ire mgbọ ikakaan̄ge itata.]^a

6 Ere iriọọn̄-inu otibibe isibi,

ìre ekene ke ekpọk mbum inyi?

Ike iriọọn̄-inu okiriọọn̄ ubọk irọ inu kan̄,

ìre ekene oriọọn̄?

[ 7 Ifuk-ibot eyi iriọọn̄-inu okaan̄be,

ìre ekene ke echili ijeen̄?

Ogbogbo inu îkweenbe,

ìre ekene ogobo itet?]^b

8 Ene ge kpọi oriọọn̄ inu,

ọmọ ìre ogwu ebekitet ukpook me lek mgbọ geelek,

ọmọ ìkweek irek me inyọn̄ ogboon̄ ubọọn̄ kan̄,

ọmọ ìre Okumugwem.

9 Îre ọmọ orom iriọọn̄-inu,

mè imun̄ lek kan̄, mè iroon̄ ikeke kan̄,

mè iben igwook itap me emen inu geelek îrombe;

10 inyi igọọk ebilene ikup kubọk uche kan̄;

îfele igwook iwa inyi ebi ìmama ọmọ.

Itetet ukpook Okumugwem ore ata iriọọn̄-inu

11 Itetet ukpook me lek Okumugwem

ìkinyi ene umin mè inu ekisa ibaan̄ alọm,

ìkinyi ene ubelejit mè onyi ene unwọọn̄

kubọk okpibot ubọọn̄.

12 Itetet ukpook me lek Okumugwem ìkirọ ejit ene itop,

mè ikinyi ubelejit mè unwọọn̄ mè ujọn̄ọ ugwem.

13 Òta usen ugwem ogwu òkitet

ukpook Okumugwem ìbojajaan̄,

ọmọ môbọkọ ugbana me usen mkpa kan̄.

14 Iriọọn̄-inu ìbene me lek itetet

ukpook Okumugwem,

egbaan̄ ọmọ mè ebilene irom me emen owot nga ene.

15 Ìkukup melek ebilene bene me karake ukot ukot,

mege ire mgbọ ikakaan̄ge itata,

bọn ebilene mêkitoon̄ ọmọ ejit me lek.

16 Itetet ukpook me lek Okumugwem ore òjot òjot iriọọn̄-inu;

mfut iriọọn̄-inu ìkijojot ebilene owot.

17 Ìkitatap inu òkilọk ema ijot uwu inyi ema,

mè otap mfut kan̄ òjot uwu isun̄-inu kiban̄.

18 Itetet ukpook Okumugwem ore ibot ibot iriọọn̄-inu;

iriọọn̄-inu ìkinyi ene esuuk mè utop lek mgbọ geelek.

19 Ìkinyi ene ifuk-ibot mè ata

ngobo-ntet owuwa owuwa kubọk ibot,

mè ikirọ ibe ebi ìtetet ọmọ inye ekekaan̄ umin esọkọ umin.

20 Itetet ukpook Okumugwem ore ugwun̄-ijọn̄ iriọọn̄-inu

ujọn̄ọ ugwem ore otu agọọk kan̄.

[ 21 Itetet ukpook Okumugwem ìkilap ijo inu isan̄a;

ere geelek îkupbe, ìkirerieen̄ unaan̄-ejit isan̄a.]^c

Itetet lek ikaan̄

22 Unaan̄-ejit ikatatge, kpebekọt irọ ibe itat,

ulobo kan̄ môkọt irọ ene inan̄a irọn̄.

23 Ogwu òkaan̄ ukarajit ìkitetet lek

kan̄ ikaan̄ mege ire mgbọ òtatat,

me òta kan̄, unwọọn̄ îra ibum itoon̄ ọmọ me lek.

24 Ìkitet otu kan̄ ikaan̄ ikikpọ mgbọ òtatat,

owuwa ene mêsa otu kiban̄ ikpa ukpatu

ofolek ngobo-ntet kan̄.

Iriọọn̄-inu melek inyinyi Awaji ulibi

25 Ikọ iriọọn̄-inu okup me ere iriọọn̄-inu okisun̄ inu kan̄,

ire, irọriọọn̄ Awaji ìre mbuban inu me lek ogwu òkirọ ijo inu.

26 Ire oweek iriọọn̄-inu, sun̄ Ikan Awaji,

Okumugwem mônyinyi owu iriọọn̄-inu ogbogbo.

27 Itetet ukpook Okumugwem ore iriọọn̄-inu mè ikween̄ inu;

inu Okumugwem okima ìre igbegbe utoon̄-ejit mè isisiki lek.

28 Kanye ibot me lek itetet ukpook Awaji,

karọ inu melek Awaji me ejit iba iba.

29 Kare ogwu isi iba me isi ebi ene,

tet otu kwun̄ kaan̄, kakpọkpọ ìtumu ikọ ubọk geelek.

30 Kabene lek, inyi owu okanan̄a ìrọn̄,

mè ìsa esip ìjet lek kwun̄.

Mije, Okumugwem môkpọk mbum nlelet inu orọbe,

mè itọp owu ito me ijọn̄ me isi ogbo ama,

bak me lek òkanu me ukpook Okumugwem,

ire, ofiaan̄ ofiaan̄ ojot owu ejit.