Ogwu ògege ikpa yi ìre Jisọs, mè ìyaka ire Josuwa, gwun̄ kè Elieja, gwun̄ kè Sirak. Mîkigwen ọmọ si Sirak, me mgbidim. Ofifi erieen̄ ekigwen si ikpa yi ìre Ekilisiasitikus. Gwun̄ gwun̄ kan̄ onenikana ikpa yi itap me usem Giris. Inu ge me lek inu òrọrọ ibe Sirak ige ikpa yi ìre isasa ijeen̄ ebi Ju ibe ke itetet lek inye ikitet ukpook me lek Okumugwem mônyi ema iriọọn̄-inu ònwọnwọn ichit, melek nje-nnyi-isi, melek ubelejit.

Mînyi eji owuwa ikpele ijejeen̄ echi òkaan̄ iriọọn̄-inu me lek me emen Ikpa Mbuban, eyi òrere Ikpa Ikan, mè ikpa ebi nriran, mè Ikpa Ijejeen̄. Îgbe ibe eji etọn̄ ebi Ijeren ukot ikaan̄ me lek ikpa chi ema egebe, mè iriọọn̄ ubọk isun̄ iban eji. Ire owu oma ikwekween̄ Ikpa Mbuban me atikọ, îkup me uyọt ibe owu òkọt òkokpa òwele ònyi ebi ofifi ene, mè ìre me ikọ otu, mè ìre me igege me ikpa.

Eya orọ Jisọs, nte nte n̄a, okween̄be Ikpa Mbuban, mege îkanabe usọ me lek, mè inige ikpa yi isa itap ubọk inyi ebi ofifi ife, inyi esa ekween̄ inu ofolek iriọọn̄-inu. Eya orọ, ire owu okima ikwekween̄ inu, îgbe ibe owu òkween̄ ikpa yi, inyi owu òkoriọọn̄ ubọk òluk ugwem ike Ikan odobe.

Ire, m̀be owu òfuk ikpa yi me ata ejit, mè okatumu ubọk nsabe ikana ikpa yi ìfiat. Nsi ikwaan̄ me lek unye unye. Eya orọ, kaan̄ ukarajit me lek ere ikajaan̄ge ìsan̄a. Ibot ikọ òkup me ikpa Iburu geelek îkinwene sọntiik me mgbọ isikana itap me ofifi usem, mè ìre Ikpa Ikan, mè ìre ikpa ebi nriran, mè ìyaka ire ofifi ikpa geelek òkup me Ikpa Mbuban.

Emi ǹnu Ijipiti me òso akọp acha ita mè jeeta me lek mkpulu ogwu ubọọn̄ Yurijitis, mè iluk me ere ya otutuuk mgbọ ogwu ubọọn̄ ya okikpulu. Mgbọ nkupbe me ere ya, mfuk owuwa ikpa. Mgbọ ya ke îsulu emi me ejit ibe emi ǹkana ikpa keyi ǹtap me usem Giris. Igwugwuun̄ chieen̄ ikana ikpa itap me ofifi usem ìre atalek unye ikwaan̄. Ntop chieen̄ owuwa eririeen̄, sabum nnikọt ikana ikpa yi itap me usem Giris isan̄a. Me mgbọ keyi nsibe ikwaan̄ yi isan̄a, ebi ìluk me ofifi agan̄, eyi ikarege Judia, mêkọt ifuk ikpa yi, mè isa ikween̄ ubọk ekisun̄ Ikan Awaji me ugwem kiban̄.