Okwaan̄ Anyiaan̄
19
Ire, unaan̄-ejit ya ikakaan̄ge nsanîsisaak ebi kperiọọn̄ Awaji mege ire òta,
mije, bene me ibebene,
Awaji îriọọn̄ inu ema cha eberọ
me mgbọ òkup me isi.
2 Îriọọn̄ ibe ke ema isitele ebi kan̄ ibe eje,
mè efon ugwat ugwat,
ke mênwene ejit kiban̄,
mè igọọk ema isi iweek itetet isa ika.
3 Mije, mgbọ ema ekupbe
me ito mkpa bọn kiban̄,
mè ikifieek ejit
me agba udọn̄-ufuun̄ ebi kiban̄ ìkwakwaan̄,
ofifi ijo otitọt oninin̄ ema me ejit,
ema esisibi igọọk
ebi ema eriaakbe ibe efon cha,
kubọk ife cha elilibi mkpat akọn.
4 Mkpukpe ògbegbe ema
otaba ema isa isi lek irọrọ inu yi,
mè irọ ema ewuuk inu òrọrọ ema,
inyi ema ebọkọ osusut ge
esọkọ me lek ujaralek kiban̄.
5 Sa me ikeya,
ema cha mêchichini mkpa òkup nke nke,
ire, ebi kwun̄ mêjeje uyeke uyeke ije.
Awaji îsa ebi kan̄ ijeen̄ onin̄, mè ibem ema.
6 Owu orọ otutuuk inu geelek orombe
ikana ayaya me ubọk ema ekupbe,
mè erọ inu owu otọbe ibe ema erọ,
inyi unan geege ikare lek ebi kwun̄.
7 Mîmun̄ oduku inyọn̄ okanabe ichit
m̀gba-ǹgwele ukan̄ ebi kwun̄,
mè imun̄ si nchat ijọn̄ osibibe me ere mun̄ owuukbe lek ikup,
oniin̄ kpebekọt ikput obubum isaba okwaan̄ Anyiaan̄,
òla ijọn̄ mbubet mbubet osisibi ikeke me etete ekoon̄ ogbururu.
8 Otutuuk ido ebi owu osabe ubọk kwun̄ ikput lek
ekpọkpọ nke nke uyeke inu owu orọbe,
mè ije isaba itoon̄.
9 Ema ekekitama ikana kubọk inyinya,
mè ikiwulu ikana kubọk bọn arọọn̄,
mè ikitọn̄ owu, Okumugwem, ogwu ònyanyan̄a ema isibi.
10 Ema mîkikeek si inu cha òrọrọ mgbọ ema ekupbe me usun̄,
kpan̄asi ijọn̄ osibibe anam, ìyaka inisibi atantan,
kpan̄asi okwaan̄ ogbọbe irin̄ isibi,
ìyaka inigbọ akwọọk igwook.
11 Me mgburudun̄, ema mîmun̄ ayaya chieen̄ unọn okimumana,
mgbọ uraafiọọn̄ onin̄be ema lek, ema edobe inorie òtotop;
12 mije, ebi kè ekun̄kun̄ enan̄a me okwaan̄ isibi igwook,
inirọ owot kiban̄ ijot.
Osusut ebi Ijipiti
13 Bak me lek ikpak ikpak ochicha
ebi ijo ife cha ekaan̄be me lek ebi ichen,
ema mîbọkọ osusut ògbegbe ema
mije ikpele inu ikpak ema erọbe;
egwijo òkup afa afa ke esa itaba ema ubọk me utọn̄
ibe ke osusut òkinu.
14 Ebi ofifi ife mîjit ibọbọkọ ebi ichen ìnu lek kiban̄ itap,
ire, mè isa ebi ichen ìnunu lek kiban̄,
ebi ìrọrọ ema ata inu, irọ usun̄.
15 Ebi adasi ife cha mêbọkọ osusut,
mije, ema esabe akọn̄ ibọkọ ebi ichen itap.
16 Ire, ebibi kperọ ikeya, esa ijọk ibọkọ ebi kwun̄ itap,
mè inyi ema unen ìkike melek ebi kiban̄,
ire, mè inigwu ikom me mgburudun̄
isa ikpak ikpak kwulukwulu itutuku ema.
17 Mîtap ema cha si ǹnàan̄,
kubọk etapbe ebi kecha ìkekeke me agba isotu ogwu ata irọrọ,
me mgbọ ekpuk udun okanabe ichit ema,
ema otutuuk ekekisa ubọk ubọk itutun
ikiweek isotu kiban̄ gaalek.
Uyeke uyeke unye eyi Awaji
18 Inu erombe mînwunween̄ irek melek ebi melek kiban̄,
kubọk ida olik uneen̄ okinwunween̄ igọọk ike ida okwa okije;
ire, olik geelek îkaan̄ ida eyi kan̄.
Eyi îriọọn̄ ubọk isibi utoon̄
mgbọ esabe chieen̄ imun̄ otutuuk inu cha òbọbọkọ irek.
19 Mije, anam echi òkiluk me inyọn̄ ijọn̄
îkana irin̄ òkiluk me emen mun̄,
irin̄ òkigwọk me emen mun̄ okakana inikup me inyọn̄ ijọn̄.
20 Ukan̄ îkup me emen mun̄ ikilomo me unye kan̄,
mun̄ owuwuuk unye kan̄ îkisa iniin̄ ukan̄.
21 Ukan̄ ìkakọt ìtaka ufuk inu òkikwukwu cha,
echi òkije ikana emen kan̄,
alọm ukan̄ ìkakọt si ìtọk inorie emen inyọn̄ ya
òkup nseen̄ nseen̄ kubọk àbaan̄,
eyi òkigwagwat lek itọk ita.
Òta kan̄,
22 Jei Okumugwem, owu ojibi ebi kwun̄ ibene,
mè inyi ema umin me agan̄ geelek,
owu òkakpọ ema ìlọ chieen̄,
ire, òkitatap ubọk inyi ema me mgbọ geelek, me ere geelek.