Utoon̄ îtoon̄ me lek ebi Ijeren
18
Ire, ikpele utoon̄ îtoon̄inyi ebi kwun̄ ìkup mbuban.
Ebi ochicha kiban̄ enọnọ ida kiban̄,
ire, kpekọt imọọn̄ ema,
mè ibe ke ebi kwun̄ mîkaan̄ atisi
mije ke kpebọkọ ukwook.
2 Ema mîtọn̄ ebi kwun̄
ibe kpesak ema unan
mije ijo inu ema erọbe ebibi,
mè ibeek ibe etele enyi ema me lek ijo ejit
ema ekaan̄be me lek ebibi mgbọ òraraka.
3 Owu oneninyi ebi kwun̄
ujọn̄ọ efit ukan̄ òkilolomo,
inyi isa ema ijeen̄ oniin̄ ije kiban̄,
eyi ema kperiọọn̄,
mè inyi ema ura òsusuuk,
inyi ema esa eje òrirọ ije kiban̄.
4 Mije, îgbe ibe ebi ochicha kiban̄
ekakaan̄ utoon̄,
mè ebia me mkpọn eyi udun,
bak me lek ema esun̄be bọn kwun̄ me mkpọn,
ebi kwun̄, ebi owu obosa
me lek kiban̄ inyi ebi linyọn̄ utoon̄ ikafieekge eyi òje me lek ikan.
Mkpa adasi bọn ebirieen̄ ebi Ijipiti
5 Mgbọ ema etumube ifieek
ikpakpan̄ asasa nsabọn ebi kwun̄ ìkup mbuban,
eyi etelebe gwun̄ ge, mè inyan̄a isibi;
owu okwọkwọọk obop obop nsabọn kiban̄ ije,
inyi ire osusut kiban̄,
mè isa ikpele unye ukot mun̄ ile
igbaan̄ otutuuk kiban̄ ijijaka isan̄a.
6 Mîwuwuuk lek ikpa inu
òborọ me eririeen̄ ya inyi ebi nte nte kiji,
inyi ema ebele ejit,
mè ekat ejit me lek inyan̄a-ibot kwun̄ ya
ema etoon̄be ejit me lek.
7 Ebi kwun̄ mîkpọ chieen̄ ibe
ke owu mônyan̄a ebi ata irọrọ
mè ichep ebi ochicha kiban̄.
8 Mije, inu yaage osabe isulu
ebi ochicha kiji cha osusut,
ọmọ ke osa igwen eji itap me lek kwun̄,
mè irọ inyi eji ekaan̄ umin.
9 Mije, bọn mbuban ebi ata ife
mîgwa ngwugwa me nlelet,
mè igbaan̄ ichieek
me lek ikan kwun̄, Awaji,
inyi bọn kwun̄ mêgbaan̄ ikaan̄ uche yaage,
mè ìre ugbana mè ìre mfat,
mè ibene ikikọt okwa itọn̄
echi ebi nte nte kiban̄ ekikọt.
10 Ire, ida ito ebi ochicha
okekitaan̄ ifan̄a ere,
ito òkup njijin njijin
echi ema ekito me ibot bọn kiban̄
okekitaan̄ ikana ere.
11 Ogwu usun̄ ìbọkọ osusut yaage
ogwu nte uwu kan̄ obọkọbe,
ichep yaage òchep ogwu ikike
ochep si ogwu ubọọn̄.
12 Otutuuk kiban̄ mîkaan̄ nkwukwu ene
echi kpekọt ifuk,
inan̄a si me lek chieen̄
mkpa yaage òkpakpan̄ ema.
Ebi ìkup me ugwem kpewa isoon̄
ikọkọt ifuun̄ ebi ìkwakwaan̄,
mije, me ukot yaage, bọn kiban̄
ebi ìnwọnwọn ichit mîkwaan̄ ita.
13 Ubọk geelek ife chi kpechieek etip ya
bak me lek ekwukwu jom-jòm kiban̄,
ire, mgbọ adasi bọn
ebirieen̄ kiban̄ ekwaan̄be,
ema mîniriọọn̄ ibe
ke Ijeren ìre gwun̄ Awaji.
14 Mgbọ eririeen̄ ojebe isi ge isi ge
ire ikeke iba kan̄,
ere osuukbe,
inu geelek okukup suun̄ me esuuk,
15 ikọ kwun̄ ya òkaan̄ unye geelek
onanan̄a me ogboon̄ ubọọn̄ me emen inyọn̄
iwulu isibi inu,
mè inirọn̄ me eden̄ eden̄ ijọn̄ ya
eyi ùrioon̄ obonu lek;
ikọ ya ìnu kubọk ogwu usọ akọn̄
òkup isi nnaan̄ nnaan̄,
16 òbeben ata ikọ otọbe ya
kubọk oge akọn̄ òrereke,
mè inikeke, mè itap mkpa ijot linyọn̄,
ukot me ijọn̄ okekebe,
ire, îjọn̄ọ itet akpabin inyọn̄.
17 Mgbọ yaage, mun̄umun̄ ilaak
òkup nke nke obebene ikisisaak ema,
ukpook okakana ema ichit bùk
me ekakpọge chieen̄.
18 Etọtọọn̄ ema ito, ge me ere keyi,
ge me ere keyilọ,
inyi ekesa mkpa,
ema enenirọ mè eriọọn̄
inu òrọrọ ema ekikwaan̄.
19 Mije, esa mun̄umun̄ ilaak cha ema emun̄be
itaba ema ubọk me utọn̄,
inyi ema ekakwaan̄ mkpa
me ekariọọn̄ge ibot osusut kiban̄.
Owuwa ebi Ijeren mîkwaan̄ me emen èwê
20 Ubọk mkpa îre lek ebi ata irọrọ si,
ijo orukan̄ okpakpan̄ owuwa ene me emen èwê,
ire, uyok uyok unaan̄-ejit ya
ìkakup ìjọn̄ọ mgbọ.
21 Mije, ene ge ogwu ìkalọ inu geege
îgwat lek ikeke me isi akọn̄ inyi ema,
mè isa nroon̄ ikwaan̄ kan̄,
òrere uriaak mè nsensi ewọpbe,
ikibeek itetele ijo,
mè ikeke ida unaan̄-ejit ya,
mè itap okputut inyi ùrioon̄ ya,
mè isa me ikeya ijeen̄ ibe
ke ọmọ ìre ogwu ikwaan̄ kwun̄.
22 Îtim ikpan̄ uyok uyok unaan̄-ejit ya,
ire ìkasa me unye oguga,
ìkasasa si nroon̄ akọn̄ geege,
ire, ìsa ikọ otu kan̄ inye lek
igak ogwu osusut ya,
sa me lek îtan̄abe use cha
echieekbe ebi nte nte kiji
mè inyan̄a-ibot ya
enyan̄abe igbaalek.
23 Mgbọ ebi ene ekwaan̄be
itutọmọ ibene me èdọ me èdọ,
ọmọ oninin̄ nteek,
mè itet uyok uyok unaan̄-ejit ya ikaan̄,
mè ikwek ibia,
inyi ikayaka ìre lek ebi ìkup me ugwem.
24 Mije, mîtoon̄ otutuuk linyọn̄
me lek ofọnti àwurukù kan̄,
mè irọkọ si uja ebi nte nte
me lek mgban ewuuk ini cha,
òrirọ ubọọn̄ kwun̄ okukup me lek ọgbọn ubọọn̄
òkup ọmọ me ibot.
25 Echichi otetet ogwu mfiat ukpook,
ikpekpebe lek,
mije, eyi emun̄be ubọk unaan̄-ejit ya
okupbe gaalek, îso.