Uga ukpook îtet ebi Ijipiti me eririeen̄
17
Oyerebet kwun̄ geelek îkimin enenen,mè ikiyọt ikpakpa;
mije keya ke ebi kpebọkọ
ikween̄-inu eje ilọ oniin̄.
2 Mgbọ ebi kperiọọn̄ owu
ekikeek ibe ke ema mîtap
ido mbuban kwun̄ me irak unye kiban̄,
ema me lek kiban̄ ekup
me usun̄ akọn̄ me irak udun̄,
ujọn̄ọ eririeen̄ otatap ema me mkpọn;
mîgoon̄ ema ibia me uwu kiban̄,
mè ifuk ema isan̄a me lek ikpukpukpo
eyi ekikpukpo ene ire mgbọ geelek.
3 Ema ekeek ibe ke ijo inu
ema erọbe me nlelet,
ke kpemun̄,
ke mîwuuk, kubọk esa ekwut
ofifit igbaka ikwek,
inyi ekamun̄;
uga ukpook oninin̄ ema emen,
mè iyiyala ema isan̄a kpai,
ema ekekimun̄ ebi ekwukwu,
ukpook okekitet ema.
4 Mije, ere ema elileekbe ikwek lek
ìkakọt ìkwek ema ukpook me lek,
okput òkup nriki nriki
okekitaan̄ ikana ema okokop;
ebi ekwukwu ìkup nke nke
mè igbọọn̄ isi igwook
ekekisibi ema me isi.
5 Ukan̄ geege ìkakaan̄ unye isasa inyi utoon̄,
ntoronyan̄ echi òkitotoon̄ cha si
ìkakọt ìrọ eririeen̄ urimi ya itoon̄.
6 Ikpele ukan̄ òkisasak
eyi òkilomo me lek kan̄ gaalek,
eyi òkup ukpook ukpook otoon̄ itibi ema;
bak me lek uga ukpook òtetet ema,
ema echechieek ibe ke inu cha ema emun̄be
îfieek igak eyi kpemun̄.
7 Esip îtet ikwaan̄ ofiaan̄
ema ekisa ekwukwu jom-jòm irọ,
ochak îchak si ema me lek iriọọn̄-inu ya
ema ekisa igugo lek.
8 Ebi ìkibe ke ema mêkọt ilap ukpook
mè orukan̄ isibi me ibot ejit òkifafiak,
ema me lek kiban̄, eyaka irọrọn̄ orukan̄
mije ukpook òkirieek ene imọm.
9 Mgbọ kpukpunube inu
òborọ ukpook itet ema,
ukpo anam oron mè ida ijijinu
ìkitap ema ukpook me lek,
10 ema ekekiran, mè ikikwaan̄,
mè ijit ikpọkpọ ikerere efet,
eyi kpebekọt ijit ikpọkpọ.
11 Inu ikpak me lek kan̄ ìre ukpook owot,
ọmọ gaalek okitip lek kan̄ oyerebet,
ekikeek ejit kan̄ isitap ọmọ inwaan̄,
îra ikimun̄ ufialek geelek
kubọk inu òfefieek ichit.
12 Ukpook ìkare inu geege
igak ijijit ntap-ubọk eyi ekikeek okinyi ene.
13 Ire ejit kwun̄ ìkanye inyi
òkọt òsa ekikeek kwun̄ òtoon̄ ejit,
ukpook inu okariọọn̄ge,
ofolek inu òkisisaak owu, môkitet owu.
14 Otutuuk eririeen̄ ya,
ilaak yaage okekeme
otutuuk kiban̄ ibia,
ubọk geelek ibe ke eririeen̄
ya ìkakaan̄ unye geege me lek kiban̄,
mije, ìnan̄a me ejit ejit ama ekwukwu,
eyi ikakaan̄ge si unye geege.
15 Ìyaka ire ekwukwu cha
òkup nke nke okililaba ema,
ukot mè ubọk ofafaan̄ ema isan̄a
mije ekwukwu kiban̄
ìkayaka ìkọt ìbeme,
bak me lek ikpele ukpook
ekakpọge chieen̄ otetbe ema mgbọ yaage.
16 Eya orọ, ene geelek òkup me ere ya
onanan̄a irọn̄,
mè ikup ibia me emen mkpọn
ikarege eyi okwukwut.
17 Mije, mè ìre ene ya ìre ogwu uko,
mè ìre ogwu òkpukpo arọọn̄,
mè ìre ogwu ikwaan̄ me uko,
ekitetet igon, îra igọọk imun̄ ufialek
eyi kpekikọt inwọnọ;
mije, mkpọn eyi udun ge ya gaalek
ke esa igon otutuuk ene ikam.
18 Mè ìre efet okiwut iraka,
mè ìre ebi kè ofut ekup me lek agọọk uti òsasan ikikọt okwa,
mè ìre ida unye ukot agbugbuk
okikput iraka,
19 mè ìre ida ewuuk
òkpukpukpọt inan̄a me inyọn̄ ogoon̄ irọn̄,
mè ìre ida ukot anam
echi kpemun̄ okililiin̄ iraka,
mè ìre ida ijo anam afa òfefieek ichit okigbin,
mè ìre okput òsi ìtọbọ me lek ogoon̄,
mè ikinunuun̄,
otutuuk cha ìkisasa ukpook
ifaan̄ ema ubọk mè ukot isan̄a kpai.
20 Mije, utoon̄ òtotoon̄
ìtotoon̄ iso otutuuk linyọn̄,
ikwaan̄ kan̄ okekije inyi isi,
inu geege ìkagban.
21 Ebi ife cha gaalek
ke ekpuk udun okana ichit bùk,
òrere ogugo udun ya
eyi òbobọkọ ema itap;
ire, inu òlolobo me lek kiban̄
igak udun ya
ìre akpan ema gaalek erebe inyi lek kiban̄.