16
Eya orọ, Awaji ìsa anam chainyi ema osusut ubọk îgbebe,
mè isa ogbogbo urum anam
itap ema ikpele ujaralek me lek.
2 Kpan̄asi osusut keyi,
owu onenikaan̄ ata ejit me lek ebi kwun̄,
mè inyi ema ekun̄kun̄ etaka,
owu onyi ema atalek utop inorie,
inyi esa esuuk uraafiọọn̄ me owot.
3 Owu òrọ inu chi,
inyi, ubọk geelek uraafiọọn̄ otetbe ebi ife cha,
òchichaka inu cha eriabe ijet ema
idek ema ejit,
mè uraafiọọn̄ ilibi itele ema.
Ire, ebi kwun̄ eran̄ ọfiọọn̄
sọntiik mgbọ gaalek,
inyi ema erie atalek utop inorie
eyi ema kperarak irie.
4 Îgbe ibe ebi ìtututuku ebi kwun̄
ekup ebia me uraafiọọn̄,
inyi ebi kwun̄ ekemun̄
ubọk ebi ochicha kiban̄ ekibọkọ ujaralek.
5 Mije, mgbọ ebi kè anam oron
enaan̄be ejit unye unye
igwook ichit ebi kwun̄,
mgbọ ijijinu òkinininin̄i cha
oloon̄be ema ibokpan̄ isan̄a,
owu òkanaan̄ ejit ìre òta.
6 Owu òsa ofaak keya
ema ebọkọbe sọntiik mgbọ
itaba ema ubọk me utọn̄,
mije, ema ebọkọ inu
òkijeen̄ unyan̄a kwun̄,
inyi ema esa ekeek inu Ikan kwun̄ odobe.
7 Mije, ogwu geelek òkakana isi ikpọ,
îkaan̄ unyan̄a,
ìkare nan̄a me lek inu ya îkpọbe,
ire, îre nan̄a me ubọk kwun̄,
owu Ogwu Unyan̄a otutuuk ene.
8 Owu osasa si me ikeya ijeen̄ ebi ochicha kiji,
ibe ke ìre owu okinyan̄a
ene isibi me ijo inu geelek.
9 Mije, akaka ituuk
mè ananjin oloon̄ ema ikpaan̄,
kpunu inu geege ekaan̄be isa igwa ema,
bak me lek, îgbe ibe inu
òkup ikecha inyi ema osusut.
10 Ire, bọn kwun̄, ikerere iwot ijijinu,
ìkatim ìkpan̄ ema,
mije, nsan kwun̄ înitap ubọk inyi ema,
mè igwa ema.
11 Ijijinu ìloon̄ ema,
inyi òsa òkeek ema inu
otọbe ibe ema erọ,
owu onyanyan̄a ema isibi mgbọ yaage,
inyi ema ekawuuk owu ìjọn̄ọ ere,
mè ìwuuk si ata ejit
owu okaan̄be me lek kiban̄.
12 Ìkare inwan̄ oron
mè ìre ugwun̄ ekọkọk ogwa ema,
ire, jei Okumugwem,
îre ikọ kwun̄ ya,
eyi òkigwa otutuuk ebilene.
13 Mije, owu okaan̄ unye
me lek ugwem mè mkpa,
owu òkekisa ebilene ire otu udọn̄-ufuun̄,
mè osa ògwu okom oka.
14 Ene môsa me ikpak ikpan̄ ofifi ene,
ire, ìkpokọt isa ekwukwu
ònanan̄a ya igwu ikom inu,
mè ìre irọ inyi ibot ejit ya
inwọnọ me ubọk udọn̄-ufuun̄
òbọbọkọ ene ya.
Egwijo îjijaka Ijipiti
15 Ìkafet ìlilibi inwọnọ
me ubọk kwun̄.
16 Mgbọ ebi kperiọọn̄ owu
ejitbe irọriọọn̄ ibe ke owu ore Awaji,
owu osa unye eyi ubọk kwun̄ isulu ema osusut;
owu osa ibot kpunube mbet,
mè ibot mgbọlọ,
mè egwijo ìkakijibi ìwọ, ililaba ema,
mè isa ukan̄ itaka ema iriọk.
17 Eyi òkeke ene chieen̄ ichit ìre,
ukan̄, eyi mun̄ okininiin̄,
ìyaka ikilolomo iraak iraak me emen mun̄,
mije, inu geelek me linyọn̄
ìkikekeke akọn̄ me ibot ebi ata irọrọ.
18 Me ike mgbọ ge, alọm ukan̄ ya îgele,
ufuna ikataka anam cha
eriabe isi lek ebi kperiọọn̄ Awaji ìkpan̄,
inyi, mgbọ ema isimun̄,
ema mêrọriọọn̄ ibe
ke ìre osusut Awaji okigọọk ema.
19 Ofifi mgbọ, ikerere me ejit mun̄,
alọm ukan̄ ya îlomo unye unye
igak ubọk ukan̄ okilomo,
mè ijijaka uko me lek ijọn̄
ebi ekariọọn̄ge Awaji.
Ebi Ijeren mîrie mana
20 Ire, ùrioon̄ chi ìkatoon̄ ebi kwun̄,
owu ònyinyi ema inorie ebi osat,
òkpọkpọ ikiria inorie ebalabe isan̄a
inan̄a me emen inyọn̄ ijet ema,
inorie ònwọnwọn ene geelek me lek,
mè itop si ene geelek me otu.
21 Inorie owu onyibe
îjeen̄ utop kwun̄ me lek bọn kwun̄,
mije, bak me lek inorie orebe
inu òkitotop me lek ogwu geelek òkirerie,
mînwene inorie ya,
inyi ikana inu ogwu òrerie omabe.
22 Ibot awo mè mun̄ ewuuk
kpetọk me emen ukan̄,
inyi ema esa eriọọn̄ ibe
ke îre ukan̄ òkilomo me
emen ibot mgbọlọ,
mè ikimumen me emen senesene ibot,
ke esa ijijaka uko ebi ochicha kiban̄.
23 Ire, ukan̄ îwuuk inu ọmọ osabe ire ukan̄,
inyi ebi ata irọrọ esa me ikeya
ekaan̄ inorie erie ejot owot.
24 Mije, inu owu orombe
ìkirọ ikwaan̄ inyi owu ogwu Òrom,
eya orọ inu owu orombe
okisa unye kan̄ isulu ebi ikpak osusut,
mè ikisa ata ejit igele ubọk
me lek ebi ìtotoon̄ ejit me lek kwun̄.
25 Eya orọ, me mgbọ ya,
owu onwene inu owu orombe
ikana ubọk geelek oweekbe ibe ikup,
inyi inire inu okisa
ikpukpo ebilene òjot òjot,
igọọk me inu òkilọk ebi
ìkiriaak uriaak ibeek owu mbeek.
26 Jei Okumugwem, owu òrọ ikeyi,
inyi ebi kwun̄, ebi omabe,
esa ekween̄ ibe
ke ìkare iwowop uko
okikpukpo ebilene,
ire, ke îre ikọ kwun̄
okibọọk ebi ìtotoon̄ owu ejit me lek.
27 Mije, inu ukan̄ ikakọtge ìtaka cha,
îtọk ita mgbọ nseen̄ nseen̄
ura òkinu mè iraka mgbọ yaage otetbe iyok.
28 Eyi onenijeen̄ ibe
ke ene ìbonan̄a ikeke
sabum ura obum ininyi owu itọn̄,
mè iriaak uriaak me obum egwe
mgbọ utoon̄ ura okikiket lek.
29 Mije, ikpọchieen̄ ogwu ìkakitọn̄ owu
ìbotọk ita kubọk àbaan̄ mgbọ utọọk,
mè igbọọk ije kubọk mun̄ efifiin̄.