Oruru me lek irariaak ata Awaji
15
Ire, owu Awaji kiji,owu ìre ogwu ata ejit mè ogwu atikọ,
mè ogwu òkaan̄ ukarajit,
mè ikisa nsan ikpulu otutuuk linyọn̄.
2 Eyi eji erọriọọn̄ unye kwun̄,
eji ikerọrọ ijo inu,
eji ìre ebi kwun̄;
ire, eyi eji eriọọn̄be ibe
ke eji ìre ebi kwun̄,
eji kpeberọ ijo inu.
3 Irọriọọn̄ owu ore òjojot ata irọrọ,
irọriọọn̄ unye kwun̄
ore ibebene ugwem kpunube mkpa.
4 Ijo otitọt ejit ogwu ebilene
ìkasa eji ìje ìlọ oniin̄,
ìkarere ubọk ikwaan̄ ogwu òkiken agba,
eyi ikasibige oruru,
òrere inu îkọbe
mè isa esese chieen̄ agba iken me lek.
5 Ebi mbubut isimun̄ inu cha,
mîra ikiran igọọk,
îra ibene ulọk kiban̄ ifo lek
nkwukwu inu ekọkọ
ikakaan̄ge ugwem me emen.
6 Ene geelek òkirọ inu kecha, mè ima,
mè ikitọbọ ebum inyi,
ìre ogwu òmama ijo inu,
kpunu ofifi inu ògbegbe ọmọ
itotoon̄ ejit me lek igak inu cha.
Itọtọbọ ebum inyi mkpọmfaka ìre burubut
7 Ogwu òbot ugọn̄ ìkimian̄a arika òmemem,
mè imun̄ ukwook ikisa
arika ya irom nroon̄ ikwaan̄
eji ebekisa irọ ikwaan̄;
ìkisa okpọkọ me lek arika yaage
irom nroon̄ ikwaan̄
echi mêsabe irọ ikwaan̄ òtatana,
mè echi ebesa irọ esese chieen̄ ikwaan̄,
otutuuk cha mbet yaage;
ire, ìre eyi owa ke ebesa irọ keke,
ogwu ikwaan̄ arika ya obotumu.
8 Ogwu ikwaan̄ arika
môtuk lek kan̄ ichep
isa arika yaage ibot òchichaka awaji;
ọmọ me lek kan̄ si,
esa achiaan̄ ijọn̄ irom ọmọ
usen inen mè inen òraraka.
Sọntitiik mgbọ isiraka,
mgbọ mgbọ isikem
mêgwenbe ibe isa ibot ejit îfọọkbe ya inu,
ọmọ môgwugwu ikom ifo achiaan̄ ya
ere otutuuk ebilene enan̄abe.
9 Ire, ogwu ikwaan̄ arika ìkakeek ibe
ke ogwu ebilene ìbokwukwu,
ke ugwem ene ìre atalek mgbidim.
Ire, ìkiwut ifan̄a melek ebi usọ alata araran̄
mè alata okuket,
mè ikikpọ inu me ubọk ebi usọ ekwe irom si;
mè ikimọnọ ibe
ke irorom awaji ikarege awaji cha
ìre inu òkinyi ene umin.
10 Ejit kan̄ ìbet lek esa ntọn̄ irom,
ikpọchieen̄ kan̄ îfe ewe igak okpa,
ibat ikike îkaan̄ otu ewe igak ugwem kan̄.
11 Mije, ọmọ ìkariọọn̄ ogwu òrorom ọmọ,
ogwu òtatap ọmọ ibot ejit
eyi ugwem me emen,
mè icho efuuk
itap ọmọ ekwukwu
òkiluluk ugwem me emen.
12 Ìmun̄ ugwem ebilene ekiluk kubọk ìre ifit,
mè imun̄ si kubọk ìre
mgbọ ijọk ekinyam ewe irie oruru;
mije, ìkibe ke ene ìbokakaan̄ ikpoko,
mè ìre me ata oniin̄, mè ìre me ijo oniin̄.
13 Ọmọ isikisa ibat ònan̄a me ijọn̄ irom
yekeyeke nroon̄ ikwaan̄ mè mkpọmfaka,
ọmọ îriọọn̄, igak ofifi ene geelek,
ibe ke inu ya ọmọ okirọ ìre ijo inu.
Mkpọmfaka ìkare Awaji
14 Ire, ebi ìbububut ichit
mè ikaan̄ nsan me lek igak asasa nsabọn,
ìre otutuuk ebi ochicha cha
ìtututuku ebi kwun̄.
15 Ema emọnọ ibe
ke otutuuk mkpọmfaka yọk kiban̄ cha
ìre awaji,
ubọk geelek inu chi
kpekisa chieen̄ kiban̄ imọọn̄ inu,
kpekisa inwọm kiban̄ ifuuk efuuk,
kpekisa utọn̄ kiban̄ inọ ikọ,
kpekisa otubọk kiban̄ itet inu,
kpekisasa si ukot kiban̄ ije ije.
16 Mije, îre ogwu ebilene orom ema,
ogwu òbebeek ekwukwu eyi kan̄ ọkọ ema;
mije, kpunu ene geege
òbokọt ikọ awaji môbetbe lek kan̄,
ọmọ ogwu òkọkọ.
17 Ogwu ebilene ìre ogwu òbokwukwu,
inu geelek îsabe ubọk ijo inu kan̄ irom,
ìre nkwukwu;
ọmọ me lek kan̄ înwọn
igak inu ya ọmọ okifaka,
mije, ọmọ îkaan̄ ugwem,
ire mkpọmfaka cha kpekakaan̄.
18 Ògak ge, ikerere anam echi echabe ichit,
ema ekitọtọbọ ebum inyi,
òrere inu echi òfefieek igak inu geelek,
mije kpekaan̄ ngobo-ntet.
19 Anam cha kpejajaan̄, inyi mokilọk ene,
Awaji ìkanyinyi ema umin,
ìkagbagbana si ema.