Ogwu òkọp okwaan̄ òrariaak uriaak inyi mkpọmfaka ìre burubut
14
Ofifi kan̄, ogwu òkibem lek ije isi mun̄me okwaan̄ ogbururu onin̄be,
ìnikigwen mgbidim uti
òyiyiyeke igak uji ile òbeben ọmọ,
ibe inyi ọmọ ata ije.
2 Îre mije ulọk ikakaan̄ oruru
ke etọt otitọt inanama uji mun̄,
ire, iriọọn̄-inu ore ogwu usọ
ònanama uji ya.
3 Ire, îre owu Ute okikpọ chieen̄
me lek ubọk ekikọp uji ya,
mije, îre owu osan̄a oniin̄
me emen okwaan̄ ibe ikije,
mè isan̄a agbagba îkisa ije
me utelelek itibi emen ekoon̄.
4 Eyiyi okijeen̄ ibe
ke owu môkọt inyan̄a ene
isibi me mfat geelek,
inyi ene geelek môkọp okwaan̄,
ikerere ogwu ikariọọn̄ge
ubọk ekisa ikọp okwaan̄.
5 Îre nkeek kwun̄ ibe
ke ikwaan̄ iriọọn̄-inu kwun̄ orọbe
ìkpokup ikike;
eya orọ ebilene ekisa
ugwem kiban̄ inyi okpọkọ uti,
ikerere sọntiik,
mè ikisa uji uwot uwot
ikọp itibi ekoon̄
isaba okwaan̄ itoon̄ me utelelek.
6 Ikerere me ibebene,
mgbọ ebi ujọn̄ọ ile
ìkigumu lek ekikwaan̄,
ebi ìrere ikpọchieen̄ inyi linyọn̄
elet lek me emen uji uwot uwot,
owu obebem ema,
mè isun̄ ema kubọk
ukwuuk uti eyi aya ukot
òbonunu me linyọn̄.
7 Ugbana òwa inyi uwot ya
eyi ata irọrọ ojebe me inyọn̄ kan̄ inu.
8 Ire, ufieek-otu okup inyi
mkpọmfaka ubọk ene orọbe,
melek ogwu òrọrọ,
ufieek-otu ìkup inyi ogwu òrọrọ,
mije îrọbe mkpọmfaka ya,
mè ikup inyi mkpọmfaka òbojijijaka ya,
mije egwenbe ibe ìre awaji.
9 Awaji îcha ogwu ikariọọn̄ge ọmọ,
mè icha si inu ema ekirọ
echi òkirọ ibe ekariọọn̄ ọmọ, ìkike.
10 Mije, mêsulu inu erombe osusut,
mè isulu si ogwu òrorom inu ya osusut.
11 Eya orọ, mkpukpe môre si
lek mkpọmfaka ebi yọk ekiriaak,
mije, ubọk geelek ema
erebe usini me lek inu Awaji orombe,
ema mîkana òchichaka inu,
mè ikana ufe inyi ibot ejit ebilene,
mè inu òlelet ikigọbọ ukot ebi mbubut.
12 Mgbọ ebenebe isan̄a mkpọmfaka isibi,
mgbọ ya ke barabat obene,
ema mîbubuku ugwem ebilene
karake mgbọ ebenebe ekisa ema irọ inu.
13 Mkpọmfaka ìkakup bene me ibebene,
ikeya si, ìkpokup ire mgbọ geelek.
14 Ugumulek ogwu ebilene
osa mkpọmfaka inu me linyọn̄,
eya orọ, mîtọtọt isan̄a ibe
ke okputut kiban̄ ìbonu ugwat ugwat.
15 Ute ufieejit ominbe igak
bak me lek mkpa ugeen̄ òbeben gwun̄ kan̄,
orọ mkpọmfaka òbet lek gwun̄ ya
ònanan̄a itele ọmọ me ugeen̄;
inenikimin inu ya
òrere nkwukwu gwun̄ ya
kubọk ìre awaji,
mè inisa nlelet mfaka ya
mè orirọ ekisa inin̄ mfaka ya
ikana inyi ebi ìkup me irak kan̄.
16 Ike mgbọ okije,
orọmijọn̄ ya,
eyi ebi ekariọọn̄ge Awaji ekirọ,
okekeke inye ikije inyi isi,
mè inikana ikan ekisusun̄,
inan̄a me ida ebi ubọọn̄ enyibe,
ebebene ikitọbọ ebum
inyi mkpọmfaka ekọbe.
17 Mgbọ ebi ene kpekọt
ikimin ebi ubọọn̄ isi me isi,
mije ere kiban̄ ojọn̄ọbe ere,
mîra ikup me ujọn̄ọ ere
ikeek ike ogwu ubọọn̄ okupbe,
mè inirom inu ekisa chieen̄ imun̄,
òbet lek ogwu ubọọn̄ ya ema ekimin,
inyi ema esa me ulọk kiban̄
erọ ejit ibele ogwu ubọọn̄ ikakupge ya
kubọk ke ìkukup me etete kiban̄.
18 Ubọk ogwu usọ osabe
ikọ-inu ya ikiweek erieen̄,
ikekitaba ene,
ikerere ebi kperọriọọn̄ ogwu ubọọn̄ ya,
ibe enye lek eketọbọ ebum enyi.
19 Mije, usini mgbọ,
ogwu usọ ya ìben me ejit
irọrọ ogwu ubọọn̄ ya ibele ejit,
mè isa otutuuk ifuk-ibot kan̄
irọ mbet ogwu ubọọn̄ ya
ijaan̄ igak ogwu ubọọn̄ ya me lek kan̄.
20 Uja ikwaan̄ kan̄ onenijaan̄
me chieen̄ urum ebi ene,
ema enenisa inu ya
ema ekimin kubọk ebilene
sọntiik mgbọ òraraka
ikana inu ekitọbọ ebum inyi.
21 Inu yi onenikana nlelet ufe inyi ebilene,
mije, ebilene, ebi inyọn̄ otutbe,
mè ìre ebi ìkup me irak usun̄ inyi ogwu ilile,
esasa erieen̄ ya,
eyi kpekichak otu me lek,
ininyi inu esabe ewuuk mè uti irom.
Mkpukpe irariaak mkpọmfaka
22 Ema mîrọ nlilọ inu me lek irọriọọn̄ Awaji,
mè isa me una ifuk-ibot kiban̄ yi
ikimun̄ ikpele ukwook,
ire, mè ikigwen ikpele ukwook ya
ibe ìre esuuk.
23 Mije, mè ìre ema ekpakpan̄ bọn kiban̄
isa ikinin̄ nlelet mfaka cha,
mè ìre udọk udọk nlelet ogbo cha
ema ekinin̄,
mè ìre orirọ miin̄
mè òje oyet cha òlọlọ ijọn̄ echi ema ekirọ,
24 ema kpeyaka ikọt ikisun̄ ugwem kiban̄
mè ìre irek olom mè nwa kiban̄
me mbuban,
ire, ire ge ìkafiaan̄ ge ìsi ìkpan̄,
ge môgan nwa ge isa itap ogwa ufieejit.
25 Ere geelek, inu afa òkisan̄a ene eje me lek,
mè ikpakpan̄ ene,
mè inọ mè ofiaan̄, ìjojot,
mè bukubuku ugwem,
mè una utoon̄-ejit,
mè wọlọwọlọ mè ataak,
26 mè inyinyi ebi ata ife uyọrọlek,
mè iwuwuuk nnwọn erọbe ene,
mè ifafiat ibot ejit, mè barabat,
mè yalayala irek olom mè nwa,
mè ugan-nwa, mè òje oyet.
27 Îre itọtọbọ ebum inyi mkpọmfaka cha,
echi ikatatge ibabak erieen̄ kiban̄,
ke ijo inu geelek obene me lek,
mè ije me lek isibi,
mè ire okputut.
28 Ebi ìkitọbọ ebum cha
ekibele ejit itaan̄ ukpo,
mè ikiben nriran ataak,
mè ikiluk ugwem ijo irọrọ,
mè ikigwat lek ikan̄ ataak.
29 Mije, bak me lek
ema etoon̄be ejit me lek mkpọmfaka
ikakaan̄ge ugwem me lek,
ema ekinyan̄a ibot ikpak ikpak,
mè ikikpọ chieen̄ ibe
ke unan geege ìkposak ema me lek.
30 Ire, osusut ògbegbe
môre ema lek mije ibot inu iba:
inu ema ekikeek ibak Awaji ìkatat,
eya orọ ema ekitọbọ ebum inyi mkpọmfaka;
mije ema esabe inu mbuban irọ inu ikeke,
ema mînyan̄a ibot ataak.
31 Mije, inu òkililaba ebi ijo irọrọ
bak me lek nrọ-nlọ kiban̄
ìkare unye echi inu cha
ema esabe inyan̄a ibot,
ire, îre osusut ògbegbe
ebi ìrọrọ ijo inu.