Irariaak inu erombe ìre mbubut
13
Ebi geelek kperiọọn̄ Awajiesibi inyọn̄ mbubut;
ema kpekọt isa ata inu ema ekimun̄
iriọọn̄ ogwu òkukup,
ema kpekọt isa si ubọk ikwaan̄
ema ekigwuun̄ chieen̄ ikpọ
iriọọn̄ ogwu usọ òrọrọ ikwaan̄ cha.
2 Ema ekeek ibe ke môre ukan̄,
mè ìre efet, mè ìre egwijo,
mè ìyaka ire ọgbọn̄ ebi kè ntoronyan̄,
mè ìre ogbururu,
mè ìre mkpukan̄ cha òkup me akpabin inyọn̄,
ere ebi kè awaji ìkikpulu linyọn̄.
3 Ire uja inu cha eyi ema emabe
orọ ema esa inu cha erọ awaji,
ema kè eriọọn̄ ibe
ke uja Ogwukaan̄ inu cha
îgak echi inu cha enenen enenen,
mije îre ogwu òrorom uja orom inu cha.
4 Ire unye inu cha
mè ubọk inu cha okirọ ikwaan̄ oke ebilene chieen̄,
ema esa me lek inu cha eriọọn̄
ubọk unye ogwu òrorom ema
ominbe igak echi inu cha.
5 Mije, îre ubọk unye
mè uja echi inu erombe okupbe
ke eji ebesa ikimun̄ unye
mè uja eyi Ogwu Òrorom ema.
6 Ire, ekamalek ìfieek ife chi ikọ ìmin,
mije, môkọt ire ibe ke
ema eje ilọ oniin̄
mgbọ ema ekiweek Awaji,
mè ikaan̄ ulọk imumun̄ ọmọ.
7 Mije, ema eluk me etete ikwaan̄ kan̄,
mè ikiweek irọriọọn̄ inu ofolek,
mè ikitoon̄ ejit me lek inu ema ekimun̄,
mije inu cha ojaan̄be.
8 Ubọk geelek si, ikerere ema si,
kpebetele ititip ema oyerebet;
9 mije, ire ema ikaan̄ iriọọn̄-inu
isasa iriọọn̄ ogbogbo inu ikeya,
eyi ema esabe iweek inu
ofolek linyọn̄ iriọọn̄,
keke orọ ema kpekọt igwat lek
iweek Ogwukaan̄ otutuuk inu cha iriọọn̄?
Irariaak mkpọmfaka ìre mbubut
10 Njijin me lek ebi ìtotoon̄ ejit me lek nkwukwu inu,
ebi ìkigwen inu ubọk
ebilene orombe “awaji,”
inu esabe alata araran̄ mè alata okuket irọ ijaan̄,
mè inu òbet lek anam,
mè ìre ewuuk ikike,
eyi ene ge me ukot ikaan̄ orọkọbe lek.
11 Atalek ogwu usọ ikwaan̄ uti
môcho uti ebekọt ikọ lek ijaan̄ ito,
mè iriọọn̄ ubọk inyiaan̄
ikpọk udun̄ isan̄a me lek,
mè inisa atalek ifuk-ibot usọ
ikọ uti ya ikana inu
mêkọtbe isa irọ ikwaan̄ me ugwem,
12 mè inisa mkpukpọk ònan̄a
me lek uti ya isọk ukan̄
item inorie kan̄,
mè irie ijot owot.
13 Ire, mkpukpọk ònan̄a me lek uti ya,
echi ìkakup me lek inu geege;
uti ònwunwun, mè ikaan̄ ekpuk ijot lek;
inenimọnọ, mè isiki lek ikọ
me mgbọ ikakaan̄ge ikwaan̄ me ubọk,
mè ikọ uti ya me mbet ebilene,
14 mè ìre ikọ ibet lek anam ikike,
mè inisa agba irio irio ichọkọ me lek,
mè isa agba irio irio igwook me inyọn̄,
mè isa si agba ichọkọ ichit
ere geelek ìroon̄ okupbe me lek;
15 mè inirọkọ ere ògbegbe
me agba uwu inyi,
mè iben ikwala itap,
mè isa okwukwut igọbọ ikaan̄.
16 Ìgbagbala chieen̄ isun̄, inyi ikanan̄a ìrọn̄,
mije îriọọn̄ ibe ke
ìkpokọt itap ubọk inyi lek kan̄;
îre inu ekọkọ,
ìkiweek ibe etap ubọk enyi.
17 Ire, mgbọ ìboriaak uriaak
me ibot inu îkaan̄be,
mè ìre nwa kan̄, mè ìre bọn,
esip ìkakitet itutumu ikọ
inyi inu ya kpunube ugwem me lek.
18 Isibodo unye-lek,
ìkido me ubọk inu ikakaan̄ge unye,
ibodo ugwem,
ìkiriaak uriaak inyi inu òkwukwu,
ibodo ntap-ubọk,
ìkido me ubọk inu
ikariọọn̄ge inu geege ofolek ntap-ubọk;
isiweek ibe ije kan̄ ijaan̄,
ìkibeek mbeek me ubọk
inu eyi ukot ìkajijibi ìnan̄a me akpat;
19 isiweek ikpoko,
mè iweek ibe mbubek kan̄ ije ijaan̄,
mè ikwaan̄ ubọk kan̄ isibi oruru,
îra ikido unye me ubọk inu ikakaan̄ge unye.