2 Tobit onenikwu me esuuk mgbọ îsobe efit acha mè akọp mè iba, efufuun̄ ọmọ me ikpele umin me ama Ninife. Ọmọ ìre akọp acha gweregwen mè iba mgbọ îkanabe ǹnàan̄. Mgbọ îbenebe iyaka ikimọọn̄ inu, îbọọn̄ ubọọn̄ enenen, mè ikiche inu inyi ebi ugbọọn̄, mè ikitọn̄ Awaji mgbọ geelek, mè ikitumu umin kan̄ isibi.

3 Mgbọ Tobit obokwu, inenigwen Tobayas ogwu gwun̄ melek ibot bọn ebirieen̄ jaaba kè Tobayas, mè itumu inyi ibe: “Gwun̄ n̄a, kpulu bọn kwun̄, 4 mè sa libi fo Midia, mije, emi nchieek ikọ Awaji eyi ogwu nriran Nawum otumube ibak Ninife. Otutuuk inu chi ebi nriran ebi Ijeren, ebi Awaji oriabe ikwaan̄, etumube ofolek ido Asiria mè Ninife, ama ibot kan̄, môrọ iso. Ikọ kiban̄ geege ìkpolọ, ire, otutuuk môrọ iso mgbọ mgbọ isikem. Eya orọ, utelelek môkup inyi owu me Midia igak me Asiria mè Babilọn. Emi nriọọn̄ ibe ke inu geelek Awaji otumube ìborọrọ iso me atikọ, kubọk ge ikeyi ìkpolọ me lek nriran cha. Mêyiyala otutuuk ebi kiji, ebi ìluk me ijọn̄ ido Ijeren, mè ikpulu ema me usun̄ akọn̄ isan̄a me lek ata ijọn̄ ya. Otutuuk ijọn̄ Ijeren môlaak ukpọk, Sameria mè Jeruselem môyat ita. Mêwọp Uwu Mbuban Awaji òkup me Jeruselem itaka iriọk igwook me ijọn̄, môlalaak ukpọk sọntiik mgbọ.

5 “Ire, Awaji môkpọk ikaan̄ ema nsan me lek, mè isa ema igwu ikom ika inu me ijọn̄ Ijeren. Ema mênenikpọk inama Uwu Mbuban Awaji. Ire, ìkpobet lek eyi adasi mgbọ ya, mege mgbọ Awaji oborọ otutuuk inu îtumube iso isire. Eyi isiraka, otutuuk ebi Ijeren mênan̄a me usun̄ akọn̄ ika, mè inikpọk inama Jeruselem me uja kan̄. Mgbọ ya, mêkpọk inama Uwu Mbuban Awaji, kubọk ebi nriran etumube ofolek.

6 “Mgbọ ya, ido geelek me otutuuk linyọn̄ mêgwu ikom, mè ikitọbọ ebum eyi atikọ inyi Awaji. Ema otutuuk mêtele mkpọmfaka kiban̄ cha echi òfafiaan̄ ema itap me emen nrọ-nlọ ema erọbe. 7 Ema mêsa me ata irọrọ itọn̄ Awaji ogwu òkup ire mgbọ ikakaan̄ge itata. Otutuuk ebi Ijeren ebi mênwọnọbe me usen cha mè igbala chieen̄ me lek irariaak Awaji, mêgbaan̄ ema ititiin̄. Ema mênenifon Jeruselem isi iluk me utelelek ire mgbọ geelek me ijọn̄ kè Ebereyam, mêneniyaka ijọn̄ ya si inyi ema. Ebi mêmabe Awaji me otutuuk ejit kiban̄ mênwọọn̄ unwọọn̄. Ire, ebi ìkirọ ijo inu mè ebi mfeen̄ mêkwaan̄ ichieen̄ ita me otutuuk linyọn̄.

8 “Bọn n̄a, mgbọ yi, ǹkitọtọ inyi enyi ibe: Ìsa otutuuk ejit kinyi ìtet Awaji ìnye, mè ìkirọ inu òkibele ọmọ ejit. 9 Ìjeen̄ bọn kinyi ibe ekerọ inu ònenen, mè ekeche inu enyi ebi ugbọọn̄, mè egbala chieen̄ eriaak Awaji, mè esa ijọn̄ ijọn̄ ejit kiban̄ mè otutuuk unye kiban̄ eketọn̄ erieen̄ kan̄.

10 “Gwun̄ n̄a, nan̄a sibi me Ninife. Kalululuk ìkup me ere yi. Nga kwun̄ isikwu, fuun̄ ọmọ me agba lek n̄a. Usen yaage ofuun̄be ọmọ isan̄a, kalalaak ìwele egwe me emen ama yi. Mije, mmun̄ ibe ke inu ikpak îmin me emen ama yi enenen, ikeya si ke ofiaan̄ omin. Esip si kpunu me isi ebi ama yi. Gwun̄ n̄a, keek inu Nadabu orọbe Ayika ogwu òkpukpukpo ọmọ isibi. Ìre Nadabu ìkalilaba Ayika, inyi isi ilet me emen udọn̄-ufuun̄? Ire, Awaji okpekpe Nadabu mkpukpe me isi kan̄ gaalek, mije inu esip ya îrọbe Ayika. Ayika osisibi inimun̄ utoon̄ egwe, ire, Nadabu oraraka ifo ama ekwukwu me emen udun ikafieekge, mije îweekbe ikpakpan̄ Ayika. Îre bak me lek Ayika okiche inu inyi ebi ugbọọn̄ ke înwọnọ ufe Nadabu otipbe iban ọmọ. Ire, Nadabu me lek kan̄ orọrọn̄ inin̄ emen ufe kan̄, mè ikwu. 11 Eya orọ, bọn n̄a, ìkpọ inu icheche uche inyi ebi ugbọọn̄ orọbe, mè inu mfeen̄ okisa inu. Mfeen̄ ìkisa mkpa inu. Efuuk n̄a îsibi ita kpai.”

Eneniyaka Tobit imaan̄ me inyọn̄ mkpilaak kan̄, ikwukwu, efufuun̄ ọmọ me oniin̄ òkakaan̄ umin. 12 Ike mgbọ okije, nga kè Tobayas si onenikwu, Tobayas ofufuun̄ ogwu uga me agba lek ogwu ute. Mgbọ îfuun̄be ogwu uga isan̄a, isasa ogwu nwa mè ebi bọn inan̄a ifo Midia, mè iluk me Ekibatana melek kè Raguwen ogwu ute-nwa. 13 Îkpọ chieen̄ ijaan̄ me lek ogwu ute-nwa mè ogwu uga-nwa, mè inyi ema ulibi me ukan̄ kiban̄, mè ifuun̄ ema me Ekibatana me ido Midia. Ọmọ orie ìrot eyi ogwu ute-nwa Raguwen mè eyi nte kan̄ Tobit.

14 Tobayas îkaan̄ umin enenen, mè inikwu mgbọ îsobe efit acha mè akọp mè jaaba. 15 Sabum înikwu, îkup inọ ibe ke mîjijaka ama Ninife, mè imun̄ ekisa ebi etetbe ubọk ubọk ika inu ido Midia, òrere ebi Siakaris, ogwu ubọọn̄ Midia, okpulube me usun̄ akọn̄. Tobayas otọtọn̄ Awaji me lek otutuuk inu Awaji orọbe ebi Ninife mè ebi Asiria. Sabum înikwu, înwọọn̄ unwọọn̄ mije Ninife, mè itọn̄ Ogwukaan̄-ene Awaji ogwu òkup ire mgbọ geelek mgbọ geelek.