Tobit îtọn̄ Awaji
13
Tobit onenikitọn̄ Awaji ibe,“Itọn̄ ikup inyi Awaji
ogwu òkiluluk ire mgbọ geelek,
mije, mkpulu kan̄
ìbokukup ire ukot geelek.
2 Mije, ọmọ okinyi osusut,
ọmọ si okito nsan;
ọmọ okisa ene iban ama
ekwukwu me linyọn̄ òsisiki ichit,
ọmọ si okisan̄a ene isibi me emen udọn̄-ufuun̄,
kpunu inu geege òkinwọnọ me ubọk kan̄.
3 “Enyi bọn ebi Ijeren,
ìtọn̄ ọmọ me isi ebi ido geelek;
mije, ọmọ oyiyala enyi itap me etete kiban̄.
4 Ọmọ îjeen̄ enyi unye kan̄
me ere cha enyi ekupbe.
Ìmin ọmọ me isi inu geelek òkiluk ugwem,
mije, ọmọ ore Ogwukaan̄ kiji mè Awaji kiji;
ọmọ ore Nte kiji,
ọmọ si ore Awaji ire mgbọ geelek.
5 “Môsut enyi osusut
mije nrọ-nlọ kinyi,
ire, môyaka ikpọk ikaan̄ nsan
me lek kinyi otutuuk.
Ọmọ môkpulu enyi isibi me ido geelek, me etete ebi îyiyalabe enyi itap.
6 “Ire enyi isa otutuuk ejit kinyi
mè otutuuk ibot ejit kinyi
igwu ikom igọọk ọmọ,
mè ikirọ atikọ me isi kan̄,
ọmọ môgwu isi ikom
initap ubọk inyi enyi,
ìkpoyaka ilet isi kan̄ me lek kinyi ofifi.
Eya orọ, mgbọ keyi,
ìkpọ inu îrọbe inyi enyi,
mè ìsa otutuuk ida kinyi ìbọn̄ ukpo ìtọn̄ ọmọ.
Ìtọn̄ Ogwukaan̄-ene, ogwu ata irọrọ,
ìmin ogwu Ubọọn̄ òkup akarake akat.
Ǹkitọn̄ ọmọ me lek ijọn̄ ido
nkupbe me usun̄ akọn̄,
mè ikirọ ibe ido ebi ijo irọrọ
emun̄ unye kan̄ mè umin kan̄:
‘Enyi ebi ijo, ìgwu ikom,
mè ìrọ inu ònenen me isi kan̄;
usini mgbọ, môsa ata ejit ikpọ enyi,
mè ito enyi nsan.’
7 Ire emi, ǹkimin Awaji n̄a,
ibot ejit n̄a ìkinwọọn̄
ogwu Ubọọn̄ emen inyọn̄.
8 “Kè otutuuk ene etumu umin kan̄ esibi,
mè etọn̄ ọmọ me Jeruselem.
9 “Jei Jeruselem, ama mbuban,
Awaji ìnyi owu osusut mije inu owu orọbe,
ire, môkpọk ikaan̄ nsan me lek bọn ebi ata irọrọ.
10 Ebi Jeruselem, ìtọn̄ Ogwukaan̄-ene,
mije, ọmọ înwọn,
ìmin ogwu Ubọọn̄ òkup akarake akat,
inyi mêsa me unwọọn̄
ikpọk inama Uwu Mbuban kan̄
me emen ama kinyi.
Jeruselem, kè Awaji irọ otutuuk
ebi kwun̄ ìkup me usun̄ akọn̄
me emen kwun̄ ebele ejit;
mè ima ebi ejit okifieek me emen kwun̄,
me ukot geelek ire mgbọ ikafieekge.
11 Utoon̄ ge òtotoon̄ môtoon̄
ire ntutun̄ ere geelek me linyọn̄;
owuwa ido mênan̄a me
ujọn̄ọ ere inu me lek kwun̄;
ebi ìluk me ntutun̄ ere geelek me linyọn̄
mênu me lek Ogwukaan̄-ene Awaji kwun̄,
mè ikibeme uche me ubọk kiban̄
isa ininyi ogwu Ubọọn̄
emen inyọn̄.
Me ukot me ukot, ebi ene
ebekitọtọn̄ owu me unwọọn̄;
erieen̄ kwun̄, owu ama Awaji ogobobe,
môkup ire mgbọ geelek.
12 “Ufieek-otu okup inyi
ebi geelek ìtutumu ikọ unyechieen̄ inyi owu;
ufieek-otu okup inyi ebi geelek ìtitim ikpan̄ owu,
mè ebi geelek ìgbugbugbọ
mgban ama kwun̄ igwook,
ufieek-otu okup inyi ebi geelek
ìgbugbugbọ uwu-oket kwun̄,
mè itap ukan̄ iwop uwu me emen kwun̄.
Ire, ugbana môkup ire mgbọ geelek
inyi ebi geelek ìkakaan̄ ulibi inyi owu.
13 “Je si nwọọn̄ unwọọn̄
me ibot bọn ebi ata irọrọ,
mije, mêgbaan̄ ema ititiin̄;
ema mêtọtọn̄ Ogwukaan̄-ene
ogwu òkup akarake akat.
14 “Unwọọn̄ môkup inyi ebi ìmama owu,
unwọọn̄ môkup inyi
ebi ìkibele ejit ibe inu îje ijaan̄ owu melek.
Unwọọn̄ môkup si inyi
otutuuk ebi geelek ìgọgọọk owu ifieek ejit
me lek ufialek òkekeme owu;
mije, ema mêgọọk owu ibele ejit,
mè imun̄ otutuuk uja kwun̄ ire mgbọ geelek.
15 “Ibot ejit n̄a îtọn̄ Ogwukaan̄-ene,
ogwu Ubọọn̄ òmimin enenen!
16 Mije, mêkpọk inama Jeruselem,
inyi inire uwu kan̄ ire mgbọ geelek.
Môbele emi ejit enenen
ire ebi owot kiji ìsisik
ikup me ugwem imun̄ uja kwun̄,
mè itọn̄ Ubọọn̄ emen inyọn̄.
Mêsa ewuuk unye otu ewe,
safaya mè emeran,
inama otunchit Jeruselem,
mè isa si ewuuk unye otu
ewe inama mgban kwun̄ geelek.
Jeruselem, mêsa alata araran̄
inama uwu-oket kwun̄,
mè isa alata araran̄ eyi atata kan̄
inama uwu mgban akọn̄ kwun̄.
17 Mêsa ewuuk rubi mè ewuuk ònan̄a me Ofiri
ichọkọ lek oniin̄ emen ama Jeruselem.
18 Okwa unwọọn̄ môkekitaan̄
me otunchit geelek me Jeruselem,
me emen uwu geelek,
ebi ene mêkitaan̄ ukpo ibe,
‘Ìtọn̄ Ogwukaan̄-ene!
Ìtọn̄ Awaji ebi Ijeren!’
Ebi Awaji ogbanabe
mêtọn̄ erieen̄ mbuban kan̄
ire mgbọ geelek ikafieekge.”