Mkpukpe kè Rafen
12
Mgbọ ijọk ido-nwa ya otabe, Tobit onenigwen Tobayas gwun̄ kan̄ enerieen̄, mè itumu inyi ibe, “Gwun̄ n̄a, kpọ chieen̄ me lek mkpukpe ogwu enerieen̄ ya ogwu òsasa owu iban ije, mè nyi ọmọ urot toon̄ me inyọn̄.” 2 Tobayas ofọfọọk ibe, “Nte n̄a, ìre ikpoko inen ke mbakpe inyi. Me lek n̄a, ire inyi ọmọ ìkike iba me lek inu-nkaan̄ ọmọ melek n̄a esabe ika, ǹkachieek ibe môfiat inu geege. 3 Mije, îsa emi ika ijet owu me utelelek, mè igwa nwa n̄a, mè igọọk emi isa ikpoko ya ika, mè igwa owu si. Ìre ikpoko inen ke mbasa itoon̄ urot inyi?” 4 Tobit obebe, “Gwun̄ n̄a, îgbe ibe ibọkọ ìkike iba me lek inu ọmọ melek kwun̄ esabe ika.”5 Ikeya ke Tobayas onigwen Rafen, mè ibe, “Kpulu ìkike iba me lek inu owu melek n̄a esabe ika, mkpukpe kwun̄ ire eya, mè gbala chieen̄.”
Rafen înyi Tobit melek Tobayas nteme
6 Rafen onenigwen Tobit melek Tobayas ida ibọkọ, mè itumu inyi ema ibe, “Ìtọn̄ Awaji, mè ìkpa ata ikwaan̄ îrọbe inyi enyi ìsibi me isi otutuuk ebi ìkup me ugwem. Ìtọn̄ ọmọ, mè ìkọt okwa ìmin erieen̄ kan̄. Ìsa ulibi ògbegbe ìkpa ubọk ikwaan̄ kan̄ ìkana ìnyi otutuuk ene. Ikachieek ibe lek iwọ enyi ikekitọn̄ ọmọ.
7 “Înwọn ibe elet nlelet inu ogwu ubọọn̄, ire, îgbe ibe ekpa ikwaan̄ Awaji ekana, mè etumu ekpọk mbum, inyi ebi ene ekenyi ọmọ umin ògbegbe. Ìkirọ ata inu, ke ijo inu ìkpore enyi lek. 8 Uriaak mè ijin-otu înwọn, ire, icheche inu inyi ebi ugbọọn̄ mè irọrọ ata irọrọ onwọn igak. Ene icheche inu inyi ebi ugbọọn̄, mè ikirọ atikọ, înwọn igak ene ibọbọọn̄ ubọọn̄, ire, ìkakirọ atikọ. 9 Mije, icheche inu inyi ebi ugbọọn̄ ìkinyan̄a ene isibi me mkpa, mè ikigwọk ijo inu geelek isan̄a. Ebi ìkiche inu inyi ebi ugbọọn̄ mêluk ugwem òjot òjot. 10 Ire, ebi ìkirọ ijo inu, mè ikikaan̄ ugwem ikpak me lek ene, ekitap ijo unan me lek kiban̄ gaalek.”
Rafen îkpọk mbum lek kan̄
11 Rafen onenitumu inyi ema si ibe, “Ntumu inyi enyi ibe ke înwọn ibe elet nlelet inu ogwu ubọọn̄, ire, ke îgbe ibe ekpa ikwaan̄ Awaji ekana, mè etumu ekpọk mbum. Eya orọ, mânitumu otutuuk atikọ inyi enyi, m̀kpalet inu geege. 12 Tobit, mgbọ owu mè Sera eriaakbe uriaak, îre emi mben ikpa uriaak kinyi isi ifuk me isi ujamgbugbo eyi Ogwukaan̄-ene. 13 Ikeya si, me mgbọ ya owu onan̄abe ikeke itele inorie kwun̄ ya, mè inan̄a isibi isi ifuun̄ ogwu ekpan̄be ya, 14 Awaji îria emi inu ibe emi ǹnentọ owu m̀kpọ. Emi si ke îria inu ibe emi ǹnengwa owu melek Sera nwa gwun̄ kwun̄ me ukot yaage. 15 Emi ìre Rafen, ge me lek ebi osat jaaba ebi ìkikeke me mbem, mè ikiraka inin̄ me isi ujamgbugbo Ogwukaan̄-ene isi ikisi ikwaan̄.”
16 Ema ene iba ekekiran, mè irurọn̄ọ me ijọn̄ ikana isi ikwuun̄, mije, ukpook îtet ema. 17 Ire, inenibe ema, “Ikatet ukpook, esuuk ikup melek kinyi. Ìkitọn̄ Awaji ìre mgbọ geelek. 18 Otutuuk mgbọ ngọọkbe enyi ikup, ǹkarọ inu geege me lek n̄a, ire, ǹkirọ igọọk me nkeek Awaji. Ìtọn̄ ọmọ me usen me usen, ìkọt okwa ìtọn̄ ọmọ. 19 Ubọk geelek enyi ekimun̄ emi kubọk ǹkirie inorie, mè ikinwọ miin̄, ìkare ikeya, ǹkarie inorie geege, ǹkanwọnwọ si miin̄ geege, inu enyi emun̄be ìre gaalek nweenween̄ chieen̄. 20 Eya orọ, ìnan̄a ìkeke me ijọn̄, mè ìtọn̄ Awaji me linyọn̄, mè ìtumu ubọk ikwaan̄ kan̄ ìsibi. Ìkpọ, emi gwa ǹkinene isi lek ogwu òraria emi ikwaan̄. Ìge otutuuk inu chi òrọrọ enyi ìtap me ikpa.” Ikọ ya itata me otu, inenene ifo emen inyọn̄.