Tobayas îka inire uwu
11
Mgbọ ema ejebe igbet ama Kaserin, eyi òkikpọ ama Ninife, Rafen onenibe Tobayas, 2 “Owu oriọọn̄ ubọk nte kwun̄ okupbe mgbọ eji enan̄abe itele ọmọ. 3 Eya orọ, eji enelibi eraka nwa kwun̄ edasi esi enen̄e uwu esun̄ eban ọmọ, sabum ọmọ obonire.” 4 Mgbọ ema ekigbaan̄ ije, Rafen onenibe ọmọ, “Mọnọ olulut irin̄ ya nen̄e sun̄.” Ibo ya okekigọọk ema me udun̄.5 Me ike mgbọ ya, Ana ìsisiki ikweek irek ikigwuun̄ chieen̄ ikpọ lek oniin̄ agan̄ ogwu gwun̄ oboje ika. 6 Mgbọ îbenebe chieen̄ imun̄ ọmọ okika, isisi itumu inyi ogwu ute ibe, “Na kpọ, gwun̄ kwun̄ òkika, ọmọ melek ogwu melek kan̄ ejebe!”
Chieen̄ kè Tobit îchili
7 Sabum Tobayas onije ire lek ogwu ute, Rafen obebe ọmọ, “Nriọọn̄ ibe ke chieen̄ kan̄ môchili. 8 Sa olulut irin̄ ya chiọọk me chieen̄ kan̄. Ugwun̄ ya môtaka otitọ ya iriọọk, inyi ilibi igba, mè ikama inan̄a me chieen̄ kan̄. Nte kwun̄ mônenikpọk ikimọọn̄ inu, mè ikimọọn̄ utoon̄.”
9 Ana olilibi inikweek ogwu gwun̄, mè ikana ikat, mè ibe, “Gwun̄ n̄a, mgbọ keyi eyi mmun̄be owu, mbem lek ikwukwu.” Itoto ito ubelejit. 10 Tobit onanan̄a ikeke, mè ikigbugbe isibi me isotu oyet egep. Tobayas ojeje ikweek ọmọ, 11 mè imọnọ olulut irin̄ ya ikaan̄ me ubọk. Mgbọ îrebe ọmọ lek, ikakana ọmọ itet inye, mè ifuuk efet itap ọmọ me chieen̄, mè ibe, “Nte n̄a, kat ejit.” Òkitumu ikọ ya me otu, isasa olulut ya ichiọọk ogwu ute me chieen̄, 12 iyoyok ọmọ me chieen̄. 13 Inenikisa ubọk iba kan̄ ikisan̄a mbi otitọ ya isan̄a me agba chieen̄ kan̄ melek ebon chieen̄ kan̄. Tobit onenibene ikimọọn̄ inu, mè imun̄ ogwu gwun̄, mè ikana ọmọ ikat, 14 mè ikito ito unwọọn̄, mè itumu ibe, “Gwun̄ n̄a, mmun̄ owu, owu utoon̄ eyi chieen̄ n̄a! Ineniyaka ibe,
“Itọn̄ ikup inyi Awaji,
itọn̄ ikup inyi ikpele erieen̄ kan̄;
itọn̄ ikup si inyi ebi osat mbuban kan̄.
Kè etọn̄ erieen̄ mbuban kan̄
ere ukot geelek.
15 Ubọk geelek îsutbe emi osusut,
îkaan̄ emi nsan me lek.
Mgbọ keyi, nsa chieen̄ n̄a imun̄
lek Tobayas gwun̄ n̄a!”
Tobit ojeje inin̄ uwu, mè ikibele ejit, mè ikitaan̄ ukpo itọn̄ Awaji. Tobayas onenikpa inyi ogwu ute ibe ke ije kan̄ îjaan̄, ke ọmọ îbọkọ ikpoko ya isa ika, ke ọmọ îdo Sera gwun̄ kè Raguwen me lek nwa; me atikọ, ke Sera òkinu me oniin̄; ke îra igbet otunchit ama Ninife. 16 Tobit onanan̄a isibi, mè ikibele ejit, mè ikitọn̄ Awaji, mè ikije isi otunchit Ninife ibosi ichichini nwa ogwu gwun̄. Mgbọ ebi ene emun̄be ubọk îkije egbe egbe, kpunu ogwu òtetet ubọk ikisa ijeen̄ oniin̄, ikeke ema chieen̄. 17 Me isi kiban̄ otutuuk ene, Tobit okekitọn̄ Awaji, mè ikikpa ubọk Awaji otobe ọmọ nsan, mè irọ inyi ọmọ imọọn̄ inu. Mgbọ Tobit ochichinibe Sera nwa ogwu gwun̄, igbagbana ọmọ ibe, “Gwun̄ n̄a enenwaan̄, onu-o! Itọn̄ ikup inyi Awaji ogwu òsasa owu ijet eji. Awaji igbana nte kwun̄ mè igbana nga kwun̄, mè igbana Tobayas gwun̄ n̄a, mè igbana si owu gwun̄ n̄a enenwaan̄. Na nin̄ uwu kwun̄. Onu-o. Ugbana mè unwọọn̄ ikup inyi owu. Gwun̄ n̄a enenwaan̄, nin̄ uwu.” Me usen ya, otutuuk ebi Ju ìkup me Ninife ebebele ejit enenen. 18 Ayika melek Nadabu ogwu ulọk enunu inigọọk Tobayas ibele ejit. Ema ererie ijọk ido-nwa ya usen jaaba, mè iche owuwa uche inyi Tobayas mè ogwu nwa.a