Tobit melek Ana mîfieek owot me lek kè Tobayas
10
Me ike mgbọ ya, me usen me usen, Tobit okekifuk otu ifuk usen ije kè Tobayas ya oboben, me isisi mè ikaka. Mgbọ otu ifuk usen cha orakabe, ogwu gwun̄ ìkaka, 2 inenikinina lek ibe, “Ìre îkaan̄ inu òtetet ọmọ ikaan̄ mọnọ? Sà ìre Gabayen ìkwukwu mọnọ, inyi ọmọ ikayaka ìmun̄ ene geege òbonyi ọmọ ikpoko ya ni?” 3 Tobit obebene ikifieek owot. 4 Ana ogwu nwa onenibe, “Gwun̄ n̄a îkwu, kpunu me ugwem.” Ibebene ikito ito mè ikifieek ejit itumu ibe, 5 “Jei gwun̄ n̄a, môfieek inyi emi ntelebe ibe owu òje, owu ogwu òrere utoon̄ eyi chieen̄ n̄a okimun̄.” 6 Ire, Tobit okpọkpọ ikibe ọmọ, “Ngwan̄ n̄a, riaan̄ ere nu, mè kayaka ìsisaak lek kwun̄. Inu geege ìkare lek. Usini mgbọ, inu ekakpọge chieen̄ îra irọ me ere ya. Ògak ge, gwun̄ enerieen̄ ya ògọgọọk ọmọ ije ìre ogwu ògbegbe utoon̄-ejit, mè ire si ogwu ulọk kiji. Òkinu me oniin̄, ìkpojọn̄ọ mgbọ môkabe inire uwu. Kayaka ìfieek owot, ngwan̄ n̄a.” 7 Ire, Ana otutumu inyi ogwu olom ibe, “Owu riaan̄ ere si! Kayaka ìfiaan̄ emi! Gwun̄ n̄a îkwu!” Ana okekilibi isibi usen geelek isi ikikpọ oniin̄ ogwu gwun̄ ojebe inin̄ ya, ìkagbagban̄ ene geege ikọ me otu. Ura isinim, îra igwu ikom ika inu me uwu, mè ikifieek ejit, mè ikito ito otutuuk eririeen̄, ìkakilaak ilaak kubọk ge.Tobayas mè Sera mîbene ikika
Akọp mè usen ini Raguwen onyan̄abe ibot itoto ijọk ido-nwa me ibot kè Sera ogwu gwun̄ isoso, Tobayas oneninu me lek kè Raguwen, mè inibe, “Soso, tele mè m̀fo, mije, nriọọn̄ ibe ke nte n̄a mè nga n̄a kpeyaka ikpọ chieen̄ ibe ke ema mêyaka imun̄ emi ofifi. Eya orọ, ǹkibebeek owu, soso, ute, tele mè ǹgwu nkom m̀fo ǹgọọk nte n̄a. Nra iwuwuuk lek itumu inyi owu ubọk nsabe itele ọmọ.” 8 Ire, Raguwen obebe Tobayas, “Gwun̄ n̄a, gọọk emi kup nu, gọọk emi kup sọnja mgbọ. Mâria osat ijet nte kwun̄ Tobit, mêsi ilook ọmọ inu ofolek kwun̄.” 9 Ire, Tobayas ofọfọọk ọmọ ibe, “In̄-in̄, soso, m̀bebeek owu, tele mè m̀fo ǹgọọk nte n̄a.” 10 Eya orọ, me ikafiatge mgbọ, Raguwen osasa Sera, nwa kè Tobayas inyi ogwu olom, mè iche si inu geelek îkaan̄be ìkike iba, mè isa agan̄ ge inyi. Inu cha ìre, ebi usun̄ ebirieen̄ mè ebi usun̄ ebibaan̄, mè ebi kè eriembuuk melek arọọn̄, mè inyinya akpan melek aligọ, mè ekwut melek ikpoko, mè nroon̄ uwu.
11 Itata me ubọk, inenisa ema ije iban, mè ikana Tobayas ikat, mè itumu inyi ibe, “Gwun̄ n̄a, gbala chieen̄. Ìje me atata. Ogwukaan̄-ene ogwu òkup me inyọn̄ irọ mè inu ije ijaan̄ inyi owu melek Sera nwa kwun̄. Awaji irọ mè m̀mun̄ bọn kinyi sabum ǹkwu.” 12 Inenikana Sera ogwu gwun̄ ikat, mè ibe, “Gwun̄ n̄a enenwaan̄, nyi nte nlom kwun̄ mè nga nlom kwun̄ ulibi. Mgbọ keyi, ema ìre nte kwun̄ mè nga kwun̄ ìkike kubọk eji ebi ìsasa owu isibi inyọn̄ erebe. Gwun̄ n̄a enenwaan̄, je me esuuk; tele inyi emi ǹkennọ ata etip ofolek kwun̄ ire mgbọ geelek mâlukbe ugwem ire.” Inenibe ema egbala chieen̄, mè itele ema ibe eje. Edina onenibe Tobayas, “Gwun̄ n̄a mè ata ngwan̄ n̄a enerieen̄, kè Awaji òkup me inyọn̄ isa owu iban me atata. Kè emi ǹluk ugwem ǹjọn̄ọ mgbọ, mè m̀mun̄ bọn owu melek Sera gwun̄ n̄a enenwaan̄ mêkaan̄be, sabum ǹkwu. Me isi Ogwukaan̄-ene, nkana gwun̄ n̄a enenwaan̄ itap owu me ubọk. Karọ ọmọ inu ufieejit geege otutuuk usen ugwem kwun̄. Gwun̄ n̄a, je me esuuk. Bene me mgbọ keyi, emi ìre nga kwun̄, Sera ìre nwa ibot ejit kwun̄. Kè inu ije ijaan̄ eji me lek, eji isi mè udun̄, otutuuk usen ugwem kiji.” Inenikana ema ene iba ikat, mè isa ema iban ibe eje me atata. 13 Tobayas otetele Raguwen me unwọọn̄ mè ubelejit, mè ikitọn̄ Ogwukaan̄-ene Ogwukaan̄ Inyọn̄ mè Ijọn̄, Ogwu Ubọọn̄ otutuuk inu geelek, mije îrọbe ibe ije kan̄ ijaan̄. Me òta kan̄, inenikitọn̄ Raguwen mè Edina ogwu nwa, mè ibe ema, “Mânyi enyi ulibi otutuuk usen ugwem n̄a.”a