Tobayas onenigwen Rafen, mè itumu inyi ibe, 2 “Ajariya ngwan̄ n̄a, sa ebi ikwaan̄ ini melek aligọ iba gbaalek kwun̄ sa si ama Rajis. Si me uwu kè Gabayen, mè nyi ọmọ ikpa ya, mè bọkọ ikpoko ya me ubọk kan̄, mè sa si ọmọ gbaalek na ijọk ido-nwa yi. 3 Owu ìre ogwu ata-ikọ me lek inyan̄a-ibot Raguwen onyan̄abe inyi emi, eyi emi m̀kpakọt ichaka. 4 Owu oriọọn̄ si ibe ke nte n̄a òkifuk usen, ke ire nkup usen ge itoon̄ me lek, ke môsisaak ọmọ enenen.” 5 Rafen onenisa ebi ikwaan̄ ini melek aligọ iba isi Rajis me Midia, mè ikup me uwu kè Gabayen. Rafen oneninyi Gabayen ikpa ya, mè ilook ibe ke Tobayas gwun̄ kè Tobit îdo nwa, ke ìbe ogwugwu igọọk inu ijọk ido-nwa. Gabayen onanan̄a ikeke isi ifuk ikpoko cha me akpa me akpa inyi, melek iman̄ òriọọn̄ cha me lek ubọk etapbe. Ema enenikpulu akpa ikpoko cha itoon̄ me inyọn̄ aligọ cha. 6 Me ata ewelegwe ewelegwe ofit iwele kan̄, ema ene iba enanan̄a ikeke, mè inan̄a inu ijọk ya. Mgbọ ema enire uwu kè Raguwen me ama Ekibatana, ema enimun̄ Tobayas okupbe me lek ikasi ikirie inorie. Mgbọ Tobayas omun̄be Gabayen, inanan̄a ikeke jîp isi itọp Gabayen amọn. Ogwa osasa ito me chieen̄ ichieek, mè ibe ọmọ, “Owu ìre ata gwun̄ òsisibi isi, nte kwun̄ si ìre ata ene òsisibi isi, ogwu òkirọ atikọ, mè ikichili ubọk ikiche inu inyi ebi ene! Kè Ogwukaan̄-ene inyi owu melek nwa kwun̄ ugbana ònan̄a me emen inyọn̄, mè igbana si nte nwa kwun̄ mè nga nwa kwun̄. Itọn̄ ikup inyi Awaji, mije, mmun̄ Tobayas gwun̄ ngwa n̄a Tobit, ogwu òbet lek ogwu ute.”