Tobayas îlap ijo erumun̄ ya isan̄a
8
Mgbọ eriebe inorie, mè inwọ miin̄ isan̄a, mgbọ ilalaak okembe, enenisa ogwu nsabọn irieen̄ ya, Tobayas, isi itap me emen agwut ya. 2 Mgbọ Tobayas onin̄be agwut ya, inenikeek ikọ kè Rafen ya, mè inimọnọ ejit melek ekpọọk irin̄ ya isibi me akpa ere îsun̄be, mè kpulu igwook me inyọn̄ mbubuuk ukan̄ nsensi iwọp. 3 Olu ejit melek ekpọọk irin̄ ya olalap ijo erumun̄ ya isan̄a, ililibi ifo okputut ido Ijipiti. Rafen ogọgọọk, mè itet ọmọ ibọp ubọk mè ukot me ere ya.4 Me ike mgbọ ya, nte kè Sera me ogwu uga mîgwuk isotu agwut ya. Tobayas oneninan̄a ikeke, mè ibe Sera, “Ngwan̄ n̄a, nan̄a keke, mè eji eriaak Ogwukaan̄ kiji ibe irọ eji nsan, mè ibem eji.” 5 Sera onanan̄a ikeke. Ema ebebene uriaak ikibeek Awaji ibe ibem ema. Tobayas obebene ikiriaak uriaak ibe,
“Jei Awaji ebi nte nte kiji,
itọn̄ ikup inyi owu.
Itọn̄ ikup inyi erieen̄ kwun̄
me ukot geelek
isi ire mgbọ geelek.
Kè ebi kè akpabin inyọn̄
mè otutuuk nrom
etọn̄ owu ire mgbọ geelek.
6 Owu orom Adam,
mè irom Îfu ogwu nwa
ibe ire ogwu ntap-ubọk mè unye kan̄.
Me lek ema ene iba ke otutuuk
ebilene enan̄a isibi.
Owu obe, ‘Ìkanwọn ibe ogwu
enerieen̄ ikup ọmọ gaalek;
eji enerom ogwu ntap-ubọk òbet lek kan̄ enyi ọmọ.’
7 Mgbọ keyi, emi ǹkimọnọ
ogwu ulọk n̄a enenwaan̄ yi ido me lek nwa;
ìkare mije ulọk eyi anam akpalek,
ire, îre me otutuuk ejit n̄a, me atikọ.
Rọ emi melek kan̄ nsan,
mè rọ ibe eji egbaan̄ eluk ekan.”
8 Ema ene iba egbagbaan̄ itumu ibe, “Ikup ikeya, ikup ikeya.” 9 Mgbọ uriaak ya otabe, ema esisiki ilaak eririeen̄ ya.
Ire, Raguwen onanan̄a ikeke me eririeen̄ ya, mè itimi bọn uwu kan̄ ebirieen̄, ema esisi irọkọ udọn̄-ufuun̄ isun̄. 10 Mije, ìbe, “Ene yi môkọt ikwu, eji mênenikana ebi ekichachak, mè ebi ebekisa irọk urọk.” 11 Mgbọ ema erọkọbe udun̄ ufuun̄ ya isan̄a, Raguwen oninin̄ uwu, mè igwen ogwu nwa, 12 mè ibe, “Ria ene ge me lek bọn uwu kiji ebibaan̄ ibe isi ikpọ-nu mè ìre ọmọ Tobayas òwa me ugwem, inyi, ire ikwu, eji mêlelet iben ifuun̄, inyi ene geege ikariọọn̄.” 13 Ema eneniria gwun̄ uwu ya. Imimin mkpukan̄, mè isi igwuku isotu agwut ya itaak chieen̄ ikpọ, mè imun̄ ema ene iba elaakbe idek. 14 Igwugwu ikom, mè inilook ema ibe ke Tobayas me ugwem, ke inu geege ìkare lek. 15 Raguwen otọtọn̄ Awaji òkup me inyọn̄ ibe,
“Jei Awaji, atalek itọn̄ ikup inyi owu;
kè otutuuk ebi owu
ogobobe inyi lek kwun̄ etọn̄ owu.
Kè ema etọn̄ owu
ere mgbọ geelek.
16 Itọn̄ ikup inyi owu,
mije, owu orọ ejit ibele emi.
Ìkare ubọk mkpọbe chieen̄ ke mmun̄ lek;
owu orọ inu me lek kiji
ikpọ me ikpele nsan kwun̄.
17 Itọn̄ ikup inyi owu,
mije, owu okaan̄ njijin
me lek bọn iba chi ìrere bọn ibot ge ge.
Jei Ogwukaan̄-ene,
kaan̄ nsan me lek kiban̄, mè bem ema;
rọ ema eluk ugwem kiban̄ òjot òjot
me unwọọn̄
mè imumechieen̄.”
18 Raguwen onenibe ebi ikwaan̄ kan̄ ebirieen̄ cha esi echit udọn̄-ufuun̄ ya sabum egwe owele otut.
Ijọk ido-nwa
19 Inenibe ogwu nwa isi irọ owuwa fituru igwook, mè inisi lek urum anam kan̄ isi itet orie eriembuuk iba mè orie arọọn̄ ini isibi ibe ekpan̄. Ema ebebene ikibem lek irerie ijọk ido-nwa. 20 Inenigwen Tobayas, mè ininyan̄a ibot inyi ibe, “Owu òkponan̄a me ere yi mege akọp mè usen ini, owu môkup igọọk emi ikirie inorie, mè ikinwọ miin̄, mè ikirọ inyi gwun̄ n̄a ibele ejit, mije ọmọ îfieek ejit enenen. 21 Usen cha isiso, fele otutuuk inu nkaan̄be ìkike iba, mè kpulu agan̄ ge sa fo gọọk nte kwun̄ me esuuk. Agan̄ ge keyilọ ìre si eyi kwun̄ mgbọ emi mè nwa n̄a isikwu. Gwun̄ n̄a, kat ejit kup. Emi ìre nte kwun̄, Edina ìre nga kwun̄. Eji ekup inyi owu melek nwa kwun̄ ire mgbọ geelek. Gwun̄ n̄a, kat ejit.”