Tobayas mè Rafen mîre uwu kè Raguwen
7
Mgbọ ema enire ama Ekibatana, Tobayas onenibe ogwu osat ya, “Ngwan̄ n̄a Ajariya, sa emi raka isi ge si ere kè Raguwen ngwan̄ kiji.” Ogwu osat ya osasa ọmọ isi uwu kè Raguwen. Ema esisi imun̄ Raguwen osikibe ikweek irek me agba isotu otunchit oyet egep kan̄. Ema edadasi itọp ọmọ amọn. Ichechieek, mè itop ema si ibe, “Ebi ngwan̄ n̄a, enyi mînu-o!” Mgbọ îtọpbe ema amọn isan̄a, isasa ema inin̄ uwu, 2 mè initumu inyi Edina ogwu nwa ibe, “Ogwu nsabọn irieen̄ ya îbọkọ lek kè Tobit ngwan̄ n̄a enenen!” 3 Edina ododo ema ibe, “Ebi ngwan̄ n̄a, enyi enan̄a me owa?”Ema efọfọọk ibe, “Eji ìre bọn owot iman kè Nafitali ebi ìkup me usun̄ akọn̄ me Ninife.” 4 Inenibe ema, “Ìre enyi mîriọọn̄ isi ogwu ulọk kiji ekigwen Tobit?”
Ema efọfọọk ibe, “Iin̄, eji mîriọọn̄ lek.”
Iyayaka ido ema ibe, “Ìre lek kan̄ înye?”
5 Ema efọfọọk ibe, “Ọmọ me ugwem me unye lek.”
Tobayas otatap isọkọ ibe, “Ọmọ ore nte n̄a!” 6 Raguwen inọnọ ikeya, iwuwulu ifo inyọn̄, mè ikana ọmọ ikat, mun̄ ito ubelejit okekirọn̄ọ me chieen̄. 7 Raguwen onenitumu inyi Tobayas ibe, “Ugbana ikup inyi owu, gwun̄ n̄a. Owu ìre gwun̄ ata ene òsisibi isi! Îre atalek inu ùrioon̄ òfefieek ichit ibe ke ata ene ogwu òkirọ atikọ ikeyi, mè ikichili ubọk iche uche inyi ebi ene, îkana ogwu ǹnàan̄!” Ikakana Tobayas ogwu ulọk ikat, mè ito ito. 8 Edina ogwu nwa melek Sera gwun̄ kiban̄ egọgọọk si ito ito. 9 Raguwen onenitet orie arọọn̄ ge me lek urum arọọn̄ kan̄ ikpan̄ isa ibọkọ ema itap.
Tobayas îdo Sera
Mgbọ ema ekenbe mun̄ isan̄a, mè inikup irek iberie inorie, Tobayas onenibe Rafen, “Ngwan̄ n̄a Ajariya, tumu nyi Raguwen ibe inyi emi Sera ngwan̄ n̄a enenwaan̄ me lek nwa.” 10 Raguwen onọnọ ikọ ya, mè itumu inyi gwun̄ enerieen̄ ya ibe, “Rie inorie, mè nwọ miin̄, mè bele ejit me ikakwun̄ yi nu. Kpunu ene geege òkakaan̄ unen idodo Sera gwun̄ n̄a enenwaan̄ ilọ me lek kwun̄. Ikeya si, emi ǹkakaan̄ unye isasa ọmọ iche olom inyi ofifi enerieen̄ ilọ me lek kwun̄, mije, owu ìre ulọk n̄a òrariaak emi me lek. Ire, gwun̄ n̄a, tele mè m̀kpa atikọ òfo me lek ubọk irek ya okupbe m̀wele ǹnyi owu. 11 Ebirieen̄ jaaba ebi bọn ulọk kiji ire echa nsabe ọmọ iche olom inyi, otutuuk kiban̄ ekikwakwaan̄ me eririeen̄ usen ijọk ido-nwa, mgbọ ema isibegọọk ọmọ ilaak. Ire, mgbọ keyi-nu, gwun̄ n̄a, rie inorie mè nwọ miin̄, Ogwukaan̄-ene môsi ikwaan̄ me ibot kinyi ene iba.”
Tobayas onenibe, “M̀kparie inorie, m̀kpanwọnwọ si miin̄ geege, mege owu okana ikọ yi ogwook.”
Eya orọ, Raguwen obebe, “Mâkana igwook. Nsa ọmọ inyi owu kubọk îkupbe me ikpa Ikan Mosis. Awaji ìkukup me emen inyọn̄ idọmọ isan̄a ibe esa ọmọ enyi owu. Mọnọ ogwu ulọk kwun̄ me lek nwa. Bene me mgbọ keyi fo isi, owu ìre ngwan̄ kan̄ enerieen̄, ọmọ orere ngwan̄ kwun̄ enenwaan̄. Mîsa ọmọ inyi owu bene me chereyi isi ire mgbọ geelek. Gwun̄ n̄a, kè Ogwukaan̄-ene ogwu òkup me inyọn̄ ibem enyi ene iba, mè irọ ibe inu ije ijaan̄ inyi enyi ene iba eririeen̄ keyi. Nsan kan̄ mè esuuk kan̄ ikup inyi enyi.” 12 Raguwen onenigwen Sera ogwu gwun̄ ibe inu. Mgbọ înube, itetet ọmọ me ubọk, mè ibene ọmọ ikana inyi Tobayas, mè ibe, “Bọkọ ọmọ, inyi ire nwa kwun̄ kubọk Ikan mè orọmijọn̄ egebe me ikpa kè Mosis otumube. Bọkọ ọmọ, mè sa ọmọ je me esuuk fo gọọk nte kwun̄. Kè Awaji òkup me inyọn̄ isa esuuk kan̄ irọ inyi ije kinyi ijaan̄.”
13 Raguwen itutumu ikeya isan̄a, igwegwen nga gwun̄ ya ibe isa inu ige ikpa inu. Mgbọ îsabe inu, ọmọ ogege ikpa ido-nwa ibe ke ọmọ îsa gwun̄ kan̄ enenwaan̄ inyi Tobayas me lek nwa igọọk me orọmijọn̄ eyi Ikan kè Mosis.
14 Eya itata, ema enenibene irie inorie, mè inwọ miin̄.
15 Raguwen onenigwen Edina ogwu nwa, mè itumu inyi ibe, “Ngwan̄ n̄a enenwaan̄, si nen̄e agwut keyilọ ya sun̄, mè sa Sera si tap me ere keya.” 16 Edina ojeje isi inen̄e mkpilaak isun̄ me agwut ya kubọk ogwu olom otumube, mè isa Sera isi itap me ere ya. 17 Edina ototo ito inyi ogwu gwun̄, mè ituku chieen̄, mè ibe, 18 “Gwun̄ n̄a enenwaan̄, kat ejit ma. Kè Ogwukaan̄-ene ogwu òkup me inyọn̄ inyi owu unwọọn̄ me useen̄ ufieejit kwun̄. Kat ejit, gwun̄ n̄a” Itata me otu, inanan̄a me agwut ya isibi.