Tobayas îtet irin̄
6
Tobayas melek gwun̄ enerieen̄ ya eneninan̄a ije. 2 Ibo kè Tobayas ogọgọọk ema me udun̄ ije. Ema ene iba ejeje mege egwe adasi usen ya ofifit. Ema etatap efuuk me agba lek okwaan̄ Tigiris. 3 Tobayas onenije isibi otu mun̄ ibosi igwọk ukot. Me ekakpọge chieen̄, ikpele irin̄ ile ge onanan̄a me emen mun̄ iwulu isibi ibonimen ukot kè Tobayas. Itataan̄ ukpo. 4 Ogwu osat ya obebe ọmọ, “Tet irin̄ ya, mè gọbọ kaan̄!” Tobayas otetet irin̄ ya, mè idut inene itoon̄ me ijọn̄. 5 Ogwu osat ya onenibe ọmọ, “Bum owot irin̄ ya, mè san̄a olulut melek ekpọọk mè ejit sun̄, mije, inu chi ìre atalek ugwun̄. Ben unwan̄ kan̄ fiin̄.” 6 Tobayas onenifolo irin̄ ya, mè isan̄a olulut mè ekpọọk mè ejit isun̄, mè ifieek usini me lek irin̄ ya iwọp itaka, mè itap uchi me lek echi òsisik isun̄.Me ewelegwe, ema ene iba ebebene ije kiban̄ ikije inyi isi mege ema ejebe igbet ido Midia. 7 Tobayas onenido ogwu osat ya ibe, “Ngwan̄ n̄a, Ajariya, ìre kpasi ugwun̄ okup me lek ekpọọk mè ejit mè olulut irin̄ yi?”
8 Ifọfọọk ibe, “Ire ekwukwu mè ìre ijo erumun̄ ikisisaak enerieen̄ mè ìre enenwaan̄, owu mômọnọ ekpọọk melek ejit irin̄ ya iwọp isibi oduku me isi ene ya. Mgbọ yaage, otutuuk ufialek cha geelek môta, ìkpoyaka ikpọk isisaak ene ya ofifi. 9 Òfo me lek olulut, ire ene ikaan̄ otitọ me chieen̄, owu môsa olulut ya ichiọọk me chieen̄ ogwu ene ya, mè iwut efet itap ene ya me chieen̄, inyi igwook me lek otitọ ya, otitọ chieen̄ ene ya môtata.”
Rafen înyi Tobayas nteme
10 Mgbọ ema erebe ido Midia, mè ikije igbet ama Ekibatana, 11 Rafen onenibe Tobayas, “Ngwan̄ n̄a, Tobayas.”
Ogwa ofọfọọk otu ibe, “Kpọ emi gwu.”
Rafen onenibe ọmọ, “Eririeen̄ cherekeyi, eji ebekweek me uwu ogwu enerieen̄ ge ekigwen Raguwen. Ọmọ ìre ulọk melek kwun̄. Ọmọ îkaan̄ gwun̄ enenwaan̄ ge ekigwen Sera. 12 Ìkakaan̄ gwun̄ enerieen̄ geege ogwu môriebe ìrot kan̄, ìkakakaan̄ si ofifi gwun̄ enenwaan̄ ilọ me lek kè Sera gaalek. Owu, kubọk ulọk òrariaak me lek kè Sera, owu ke îtat me isi idodo ọmọ me lek nwa igak ofifi ebirieen̄ geelek ebi ìkakaan̄ si unen ikakaan̄ ọmọ me ìrot. Ofifi kan̄, owu si okaan̄ unen irerie inu ogwu ute okaan̄be me ìrot. Ògak ge, gwun̄ enenwaan̄ ya îriọọn̄ lek, mè ikaan̄ ejit, mè ijaan̄ uja enenen. Ogwu ute si ìre ata ene. 13 Owu okaan̄ unen geelek idodo ọmọ me lek nwa. Ngwan̄ n̄a, gban̄ inu nkitumu. Eririeen̄ keyi, mâtumu inyi ogwu ute ibe isa gwun̄ enenwaan̄ ya inyi owu me lek nwa, inyi eji mêmọnọ ọmọ isa irọ nwa kwun̄. Eji isinan̄a me Rajis ika, eji mêrerie ijọk ido-nwa. Mije, emi nriọọn̄ ibe ke Raguwen ìkpojit isasa gwun̄ enenwaan̄ ya inyi owu. Ìkpochechieek si use isasa inyi ofifi ene, mije, ire irọ, mkpa okup inyi ọmọ, kubọk îkupbe me ikpa Ikan kè Mosis. Me atikọ, ọmọ îriọọn̄ ibe ke ìre owu okaan̄ unen idodo gwun̄ kan̄ igak ofifi ene. Eya orọ, ngwan̄ n̄a, gban̄ inu nkitumu. Eririeen̄ keyi, eji mêtumu ikọ ofolek gwun̄ enenwaan̄ ya, mè ineen̄ isun̄ ibe ọmọ melek kwun̄ ebat. Eji isibenan̄a me Rajis ifo, eji mêsasa ọmọ igbaalek ifo isi ire uwu kinyi.”
14 Tobayas otutumu inyi Rafen ibe, “Ngwan̄ n̄a Ajariya, nnọ ibe ke gwun̄ enenwaan̄ ya îra ikakaan̄ olom jaaba iraka, ke ebi olom cha ekikwaan̄ me emen agwut ilaak me usen ijọk ido-nwa. Ema isirọ ijọk ido-nwa isan̄a, me eririeen̄ ya, ema isibegọọk ọmọ ilaak, mîra ikwaan̄. Nnọ ebi ene ekitumu ibe ke ìre ijo erumun̄ ge okikpan̄ ema. 15 Ijo erumun̄ ya ìkakisak ọmọ ogwu enenwaan̄ ya unan me lek, ire, ìkikpan̄ ogwu geelek òbosi igọọk ọmọ ilaak. Eya orọ, eyi emi nrebe gwun̄ ibot ge nte n̄a okaan̄be, owot ìkifefieek emi ibe mâsi ikwu, nte n̄a mè nga n̄a mênenifieek ejit ikwu inin̄ udọn̄. Ògak ge, ema kpekaan̄ ofifi gwun̄ geege ogwu môbenbe ema ifuun̄.”
16 Ire, Rafen obebe ọmọ, “Ire owu owuuk nteme nte kwun̄ onyibe owu ibe owu òdo nwa me uwu ebi kè nte kwun̄? Ngwan̄ n̄a, gban̄ inu nkitumu, mè kayaka ìtumu ikọ ofolek ijo erumun̄ ya ofifi. Mọnọ gwun̄ enenwaan̄ ya. Nriọọn̄ ibe, me eririeen̄ cherekeyi, ke mêsa ọmọ inyi owu me lek nwa. 17 Osinin̄ agwut ilaak me usen ijọk ido-nwa, mọnọ usini me lek ejit irin̄ ya mè usini me lek ekpọọk kan̄ wọp me lek mbubuuk ukan̄ nsensi, inyi idun̄u olu. 18 Ijo erumun̄ ya mônọ olu ya, mè ilibi. Ìkpoyaka ikpọk ije igbet lek kan̄ ofifi. Osirọ ikeya isan̄a, sabum obogọọk ọmọ ilaak, enyi ene iba mêdasi inan̄a ikeke ikeke, mè iriaak uriaak ibeek Ogwukaan̄-ene ogwu òkup me inyọn̄ ibe irọ owu nsan, mè ibem owu. Kafieek owot, mije, Awaji ìsusun̄ ọmọ iban owu sabum înirom linyọn̄. Owu mônyan̄a ọmọ isibi, ọmọ môgọgọọk owu ifo. Owu melek kan̄ mêkaan̄ bọn, ebi mênikup kubọk ngwan̄ inyi owu. Eya orọ, kayaka ìtumu ofifi ikọ geege!”
Mgbọ Tobayas onọbe ikọ cha Rafen otumube, mè iniriọọn̄ ibe ke Sera ìre ulọk melek kan̄ inan̄a me owot iman ebi kè nte kan̄, imama Sera enenen, mè isa me otutuuk ejit kan̄ iweek idodo ọmọ me lek nwa.