Rafen ogwu osat Awaji îsa Tobayas iban ije
5
Tobayas onenifọọk Tobit ogwu ute ibe: “Nte n̄a, inu geelek otọbe ibe emi ǹrọ, mârọ. 2 Ire, m̀bajeje ikọt ibọkọ ikpoko ya me ubọk kan̄? Ọmọ ìkariọọn̄ emi isi, emi si ǹkariọọn̄ ọmọ isi. Keke ke mânyi ọmọ, eyi môsabe iriọọn̄ emi, mè itoon̄ emi ejit me lek inyi emi ikpoko ya? Ofifi kan̄, emi ǹkariọọn̄ oniin̄ agan̄ Midia, mè ìre ubọk mâsabe ije isi ire ere ya.” 3 Tobit onenifọọk Tobayas ogwu gwun̄ ibe: “Ọmọ Gabayen melek n̄a mîgbaan̄ itap ubọk me ikpa. Nnenifieek ikpa ya irek iba, ọmọ okpọkọ ge, emi okpọkọ ge. Okpọkọ eyi kan̄ ke nsa igbaalek ikpoko ya inyi ọmọ ibe itet ikaan̄ inyi emi. Akarake mgbọ ya, akọp acha iba ire eyi òraraka me lek. Mgbọ yi, si week ene ge ògbegbe utoon̄-ejit ogwu môgọọkbe owu isi. Eji mêkpe ene ya mkpukpe kan̄ mgbọ enyi isika. Ire, bọkọ ikpoko ya me ubọk kè Gabayen sa ka.”4 Tobayas oneninan̄a isibi isi iweek ogwu òrọriọọn̄ oniin̄ agan̄ Midia, ogwu môsabe ọmọ iban ije ya. Mgbọ îsibibe isi iweek ene ya, imumun̄ Rafen ogwu osat Awaji osibibe ikeke me isi kan̄. Ire, ìkariọọn̄ ibe ke ìre ogwu osat Awaji. 5 Tobayas onenibe ọmọ, “Ogwu une, ònan̄a me owa?”
Ogwa ofọfọọk ibe, “Emi ǹnan̄a me Ijeren, emi ìre ene ge me etete ebi kinyi. Ǹnu me Ninife ineniweek ikwaan̄.”
Tobayas onenido ọmọ ibe, “Ìre oriọọn̄ oniin̄ ekije isi Midia?” 6 Ichechieek ibe, “Iin̄, nra ikisi agan̄ ya owuwa mgbọ. Nriọọn̄ ere ya, mè iriọọn̄ si otutuuk oniin̄ ekije isi ire. Nra ikisi Midia iwa mgbọ, mè ikigọọk Gabayen ogwu ngwan̄ kiji òluk me Rajis me ido Midia ikup. Nan̄a me Ekibatana si re Rajis ìre ije egwe iba. Ama Rajis ìkup me inyọn̄ ogoon̄, sà Ekibatana okup me eden̄ òla ijọn̄.” 7 Tobayas otutumu inyi ọmọ ibe, “Une, kup ban emi, mâsi ikpa inyi nte n̄a, mije, mma ibe owu ògọọk emi òje ije ya. Mâkpe owu mkpukpe kwun̄.” 8 Rafen onenibe Tobayas, “Înwọn, mâkup iban owu. Ire, kakup ìfiin̄.”
9 Tobayas osisi itumu inyi ogwu ute ibe, “Mmun̄ ene ge, ogwu Ijeren, ngwan̄ kiji, ogwu môkọtbe isa emi iban ije ya.”
Ogwu ute obebe, “Gwen ene ya na-nu, inyi ǹriọọn̄ ototun̄ ukan̄ kiban̄ mè otoko înan̄abe; mè m̀kpọ-nu mè ìre îgbe ogwu etoon̄be ejit me lek, ogwu môkọtbe igọọk owu ije ije ya.”
10 Tobayas ogwugwu ikom isibi, mè isi igwen gwun̄ enerieen̄ ya itumu inyi ibe, “Ogwu une, nte n̄a òkigwen owu.” Gwun̄ enerieen̄ ya ogọgọọk isi, Tobit odadasi itọp ọmọ amọn.
Ichechieek mè iyaka itọp ibe, “Unwọọn̄ ikup inyi owu!”
Tobit obọbọkọ otu ibe, “Kpasi unwọọn̄ oyaka ikup inyi emi? Emi ìre ogwu ǹnàan̄, ǹkakimun̄ utoon̄ akpabin inyọn̄. Emi ǹkup me emen udun kubọk ebi ìkwakwaan̄ ebi kpekimun̄ utoon̄. Ubọk geelek ibe ke emi me ògat ugwem, ǹkup me etete ebi ìkwakwaan̄. Emi gwa ǹkinọ inu ebi ene ekitumu, ire, ǹkakimun̄ ebi ìkitumu ikọ cha.”
Gwun̄ enerieen̄ ya obebe ọmọ, “Kat ejit, ìkpofiin̄ mgbọ, Awaji môgwa owu. Eya orọ, kat ejit.”
Tobit onenibe ọmọ, “Tobayas gwun̄ n̄a ìkiweek isisi Midia. Ìre owu môkọt isa ọmọ iban, mè ijeen̄ ọmọ oniin̄? Ngwan̄ n̄a, mâkpe owu mkpukpe kwun̄.”
Ogwu osat ya obebe, “Mâkọt igọọk ọmọ isi, nriọọn̄ si oniin̄, mije, nra ikisi Midia owuwa mgbọ. Nsaba otutuuk òla ijọn̄ kan̄, mè iriọọn̄ otutuuk ogoon̄ kan̄, mè otutuuk oniin̄ kan̄ geelek.”
11 Tobit onenibe ọmọ, “Ngwan̄ kaduk, owu ìre ogwu owot iman eyi owa, mè otoko eyi owa? Ngwan̄ n̄a, tumu-nu nyi emi.”
12 Gwun̄ enerieen̄ ya obebe, “Keke orọ okiweek irọriọọn̄ otoko nnan̄abe?”
Tobit ofọfọọk ibe, “Ǹkiweek irọriọọn̄ mè owu ìre gwun̄ kè ekene, mè erieen̄ kwun̄ ìre keke.”
13 Gwun̄ enerieen̄ ya ofọfọọk ibe, “Emi ìre Ajariya, gwun̄ kè Ananiya ene ilile ya, òrere ene ge me lek ebi uwu kinyi.” 14 Tobit onenibe ọmọ, “Owu onu-o! Awaji igbana owu, ngwan̄ n̄a. Kaduk, mije, mweekbe irọriọọn̄ owot iman kwun̄. Mgbọ yi, îsibi utoon̄ ibe ke owu ìre gwun̄ ulọk òsibi me ata owot iman òsisibi isi. Nriọọn̄ Ananiya mè Netan, bọn ebirieen̄ iba kè Semeliya. Ema mîkigọọk emi isi Jeruselem isi ikitọbọ ebum melek n̄a me ere ya. Ema kpetele oniin̄ Awaji. Ebi owot iman kinyi cha ìre ata ife. Owu osibi me ata owot. Owu onu-o!” 15 Tobit obebe si, “Mâkpe owu darakima ge me egwe usen, mè ikpe owu melek gwun̄ n̄a ikpoko oniin̄ ije kinyi. Eya orọ, gọọk gwun̄ n̄a si, 16 ke mâtap ikpoko isọkọ me lek mkpukpe kwun̄.”
Gwun̄ enerieen̄ ya ofọfọọk ibe, “Mâgọọk ọmọ ije, katet ukpook. Eji mêje me ata lek isi, mè ika si me ata lek inimun̄ owu, mije, kpunu ufialek geege me oniin̄.” 17 Tobit obebe, “Awaji igọọk owu me udun̄, ngwan̄ n̄a.”
Inenigwen Tobayas ogwu gwun̄ itumu inyi ibe, “Tutuun̄ inu enyi mêsabe ije ije, mè gọọk ngwan̄ kwun̄ je. Kè Awaji òkup me inyọn̄ isa owu isi ire me atata, mè isa si owu ika ijet emi me atata. Kè ogwu osat kan̄ isa enyi ene iba ije me utelelek.”
Sabum Tobayas onibene ije, ikakana ogwu ute ikat, mè ikat si ogwu uga, mè ibe ema eriọọn̄ ubọk ekup. Ogwu ute obebe ọmọ, “Je me utelelek!”
18 Ire, ogwu uga okekito ito, mè ikitumu inyi Tobit ibe, “Keke orọ ni eyi oriabe gwun̄ n̄a isibi? Ìre ìkare ọmọ ore mkpat eji ekaan̄be me ubọk, eyi eji ekiyaka lek ibieen̄ me lek? 19 Ìre ikpoko ya îkup me uyọt igak gwun̄ kiji ni? 20 Ugwem eyi Ogwukaan̄-ene onyibe eji îso eji.”
21 Tobit onenibe ọmọ, “Kasisaak lek, gwun̄ kiji môje me atata isi, mè igwu ikom ika si me atata. Owu môsa chieen̄ imun̄ ọmọ usen môkabe me atata. Kayaka ìsan̄a amọn! Ngwan̄ n̄a enenwaan̄, kayaka ìfieek owot me lek kan̄. 22 Mije, ata ogwu osat Awaji môsa ema ije, ije kiban̄ môjaan̄; ọmọ môje me ata lek ika.” Ana otutuku chieen̄, mè itele itoto ito.