3 Inenigwen Tobayas ogwu gwun̄, mè initumu inyi ibe, “Gwun̄ n̄a, nsikwu, riọọn̄ ubọk fuun̄ emi jaan̄. Nyi nga kwun̄ ulibi, mè mọnọ ọmọ riaak me lek kwun̄ otutuuk usen ugwem kan̄. Rọ inyi ejit kan̄ ikibele, karọ ọmọ inu ufieejit. 4 Gwun̄ n̄a, keek ibe ke ọmọ îmun̄ owuwa ufialek mgbọ owot kwun̄ okupbe ọmọ me lek. Ọmọ isikwu, fuun̄ ọmọ me agba lek n̄a me udọn̄-ufuun̄ yaage.

5 “Gwun̄ n̄a, tet Ogwukaan̄-ene Awaji kiji kaan̄ nye otutuuk usen ugwem kwun̄. Jit irọrọ ijo inu, mè jit si ifafiat ikan kan̄. Kirọ inu òtatat me otutuuk ugwem kwun̄, kakirọ nlilọ inu mgbọ geege. 6 Mije, ebi ìkirọ atikọ ke inu geelek okijaan̄ me lek. 7 San̄a inu owu okaan̄be che me lek nyi ebi ìkirọ ata irọrọ. Kasa chieen̄ ìkpọ inu ya mgbọ okiche, mè ìkaan̄ uduk. Kada isi ìsan̄a me lek ogwu ugbọọn̄ geege, inyi Awaji ikada isi kan̄ ìsan̄a si me lek kwun̄. 8 Ire owu okaan̄ inu iwa, che kpọ me ikeya; ire sọntiik gaalek ke okaan̄, katet ukpook icheche ikpọ me lek sọntiik ya okaan̄be. 9 Ire okirọ ikeya, owu gwa òkititiin̄ inu ubọọn̄ isun̄ iban lek kwun̄ me usen uyọrọlek. 10 Icheche inu inyi ebi ugbọọn̄ ìkinyan̄a ene isibi me mkpa, mè ikirọ inyi ene ikasi ìnin̄ emen udun eyi mkpa. 11 Me atikọ, icheche inu inyi ebi ugbọọn̄ ìre inyinyi Awaji Ogwu Òbebene Ichit uche eyi òkibele ọmọ ejit enenen.

12 “Gwun̄ n̄a, je agba agba me lek ugwem barabat. Ògak ge, gobo enenwaan̄ me owot iman ebi nte nte kwun̄ do me lek nwa. Kado enenwaan̄ ofifi agan̄, ogwu ikanan̄age me otoko ebi kè nte kwun̄, mije, eji esibi me owot ebi nriran. Gwun̄ n̄a, kawuuk ibe ke Nuwa mè Ebereyam mè Ajiki mè Jekọp ebi nte nte kiji ukot ikaan̄, otutuuk kiban̄, emọnọ nwa me uwu. Awaji onyinyi ema bọn isa igbana ema. Eya orọ, îre bọn owot iman kiban̄ ebekaan̄ lek ijọn̄ Ijeren me ìrot. 13 Sa me ikeya, gwun̄ n̄a, ma bọn ulọk kwun̄. Kasa me ugumulek ìkpọ bọn ulọk kwun̄ ebirieen̄ mè ebibaan̄ chieen̄ ìsiki, mè ìjit imọmọnọ ene ge me etete kiban̄ ido me lek nwa inyi lek kwun̄. Mije, ugumulek ìkisa mfufiat mè wọlọwọlọ ijet ene, kubọk ugbek okisa ichep mè ugbọọri inu. Ugbek okiman uraafiọọn̄.

14 “Kpe mkpukpe nyi ebi ikwaan̄ kwun̄ mgbọ yaage ikwaan̄ usen keya otabe, katet ìkaan̄ ìbe egwe iwele. Ire osi ikwaan̄ inyi Awaji, owu môbọkọ mkpukpe. Gwun̄ n̄a, gbala chieen̄ me lek inu geelek okirọ, mè kitọ ikọ nyi lek kwun̄ me eru kwun̄ geelek. 15 Kasa inu owu ochabe ìsi ìrọ ofifi ene. Kakinwọ miin̄ ìsa, kasasa usa-miin̄ irọ orọmijọn̄ kwun̄. 16 Che usini me lek inorie kwun̄ nyi ebi uraafiọọn̄ okitaka, mè che usini me lek ekwut kwun̄ nyi ebi ìkup njak. Inu geelek okaan̄be iwa iraka ike oweekbe, che eyi òsisik nyi ebi ugbọọn̄, mè kasa chieen̄ ìkpọ inu ya mgbọ okiche, mè ìkaan̄ uduk. 17 Kpan̄asi osabe inorie kwun̄ inyi ogwu ijo ene, ben si to me inyọn̄ udọn̄-ufuun̄ ogwu ata irọrọ òkwukwu. 18 Week nteme me otu ogwu òriọọn̄ inu, mè kakpọ ata nteme geege ìsiki chieen̄. 19 Kitọn̄ Ogwukaan̄-ene Awaji mgbọ geelek, mè kibeek ibe irọ mè owu òje òtat, mè inu geelek owu ochakbe ubọk me lek mè otitọt kwun̄ geelek ije ijaan̄. Kpunu ngobo-ntet me ido geege, îre Ogwukaan̄-ene me lek kan̄ okinyi ene ata nteme, mè ojibi ene òtọbọ otap me ama ekwukwu. Ubọk geelek òneme ọmọ ke îkirọ. Eya orọ, gwun̄ n̄a, kawuuk nteme kechi geelek, kachechieek si ibe inan̄a owu me ejit.

20 “Mgbọ yi, gwun̄ n̄a, keke ǹtumu ǹnyi owu. Nsa efit mè akọp obop ikpoko alata okuket iba inyi Gabayen, gwun̄ kè Gabiri, me ama Rajis me ido Midia, ibe itet ikaan̄ inyi emi. 21 Gwun̄ n̄a, kafieek owot ibe ke eji mîrọn̄ ugbọọn̄. Owu môbọọn̄ ubọọn̄ enenen, mè ire owu otet ukpook Awaji, mè ida lek isan̄a me lek ijo inu, mè ikirọ inu ònwọnwọn me isi Ogwukaan̄-ene Awaji kwun̄.”