Tobit îriaak uriaak
3
Inu ya otetet emi lek enenen, mè ifieek emi ejit, ntoto ito, mè iriaak uriaak ibe:2 “Jei Ogwukaan̄-ene,
owu ìre ogwu ata irọrọ,
inu geelek orọbe ìkinenen;
me oniin̄ kwun̄ geelek,
owu ìre ogwu nsan ogwu
ògbegbe utoon̄-ejit;
owu okisibi oyerebet me ibot ebi linyọn̄.
3 Jei Ogwukaan̄-ene, keek emi,
mè rọ inu ije ijaan̄ emi me lek.
Kasulu emi osusut mije nrọ-nlọ n̄a,
mè ijo inu nrọbe me nkariọọn̄ge,
mè echi ebi nte nte n̄a erọbe me isi kwun̄.
4 Ema mîrọ owu ijo inu,
mè ichichaka ikan kwun̄.
Mije keya, owu osasa eji inyi mè efum,
mè ekpulu me usun̄ akọn̄, mè ekpan̄;
owu orọ ibe eji ekana ebi ekifieek otu inyi,
mè ebi ekisa irọk urọk,
mè ebi ekichak ochak;
me etete ebi ido cha geelek ochonbe eji ikana.
5 Mgbọ keyi, oyerebet kwun̄ chi îtat,
owu osulu emi osusut mije ijo inu n̄a.
Mije, eji kpesun̄ ikan kwun̄,
eji kpesasa atikọ igọọk owu ikije.
6 “Eya orọ, rọ emi inu ejit kwun̄ otọbe inyi owu;
mọnọ ugwem n̄a san̄a,
inyi ǹnan̄a me linyọn̄ yi,
mè ǹkana achiaan̄.
Mkpa înwọn me lek n̄a igak ugwem,
mije unyechieen̄ ikagbege chi nkisa chieen̄ imun̄.
Ufieejit òkup emi me emen îmin enenen.
Jei Ogwukaan̄-ene, nyi ida ma,
inyi esan̄a emi esan̄a me linyọn̄ keyi;
nyi ida, mè ǹsibi me emen ukwook keyi,
tele mè m̀fo ere òrere uwu n̄a ire mgbọ ikakaan̄ge itata.
Jei Ogwukaan̄-ene,
soso, kagba udun̄ ìfit emi,
mije, mkpa înwọn me lek n̄a
igak owuwa ufialek nkimun̄ me ugwem n̄a,
mè unyechieen̄ nkisa chieen̄ imun̄.”
Ufialek mè uriaak kè Sera
7 Me usen yaage, me ama Ekibatana me ido ebi Midia, gwun̄ enenwaan̄ ge ekigwen Sera, ogwu ogwu ute orebe Raguwen, îbọkọ esip me ubọk gwun̄ enenwaan̄ ge me lek ebibaan̄ ebi ìkisi ikwaan̄ inyi Raguwen ogwu ute. 8 Mije, mgbọ jaaba ke Sera okaan̄ olom. Ìkire, olom geelek îbatbe, ogwu olom keya isinu ibonigọọk ọmọ ilaak, ikpak ikpak ijo erumun̄ ge ekigwen Asimodiyọs îra inikpan̄ ogwu olom ya. Eya orọ, gwun̄ enenwaan̄ ya obebe Sera, “Owu ene òkpan̄ olom keyi! Kpọ, olom jaaba ire ya okaan̄be-nu, ire, geege owu ochieekbe erieen̄ kan̄, kpunu. 9 Kasa ejit ebi nlom kwun̄ ekwaan̄be ìkpọ eji ìkisut. Kwu gọọk ema! Kè eji ekarerieen̄ chieen̄ me lek gwun̄ kwun̄ geege, mè ìre enerieen̄ mè ìre enenwaan̄!”
10 Usen ya, ejit îfieek Sera enenen, ikekito ito, mè inene uwu inyọn̄ ogwu ute isi inin̄ agwut ge ibosi itap olik me ebek ikpan̄ lek. Ire, inenifuk ifuk-ibot, mè ibe, “Ǹkaweek ibe ekesa inu yi ekechak nte n̄a ochak ibe, ‘Kpọ, ibot gwun̄ enenwaan̄ ge gaalek okaan̄be, mè ima, îsa me ufieejit itap olik me ebek ikpan̄ lek kan̄ gaalek.’ Ire nrọ, nte n̄a, ene ugane òkakan isan̄a, môsa ufieejit ikwu ifo ama ekwukwu. Mônwọn emi ibebeek Ogwukaan̄-ene ibe imọnọ ugwem n̄a, inyi nkayaka ìsa chieen̄ ìmun̄ ochak kechi, igak emi ikpakpan̄ lek n̄a.”
11 Sera onenikup me agba otu nruruk, mè inyana ubọk iriaak uriaak ibe:
“Itọn̄ ikup inyi owu, Awaji nsan!
Itọn̄ ikup inyi erieen̄ kwun̄ ire mgbọ geelek;
kè inu geelek orombe
itọn̄ owu ire mgbọ geelek.
12 Ogwukaan̄-ene, nyaka isi n̄a ijeen̄ owu,
mè ibene chieen̄ n̄a ikikpọ owu.
13 Nyi ida ma, inyi ǹnan̄a me linyọn̄,
mè nkayaka ìnọ usem ikpak kechi ofifi.
14 Jei Ogwukaan̄-ene,
owu oriọọn̄ ibe ke ǹkafifila lek n̄a,
enerieen̄ geege ìkasaba emi ukot.
15 Ǹkarọrọ si inu geege ìsa ìfiat erieen̄ n̄a,
ǹkafafiat si erieen̄ kè nte n̄a
me ido yi ekpulube eji me usun̄ akọn̄ inigwook.
Emi gaalek ke nte n̄a okaan̄;
ìkakaan̄ ofifi gwun̄ geege môriebe inu akpa kan̄.
Ìkakaan̄ ngwan̄ geege
òrariaak ọmọ me lek,
mè ìyaka ire gwun̄ ulọk geege
ogwu matetbe lek n̄a ikaan̄ ikikpọ,
inyi monido emi me lek nwa.
Olom jaaba ire echa nkaan̄be ìkwakwaan̄ ita.
Mije keke ke mbakiluk ugwem inyi isi,
jei Ogwukaan̄-ene?
Ire, ire ìkaneme owu imọmọnọ ugwem n̄a,
to emi nsan me emen esip yi òkitet emi.”
Awaji înọ uriaak kè Tobit mè eyi kè Sera
16 Uriaak kè Tobit mè eyi kè Sera ogbagbaan̄ mgbọ yaage ire isi Awaji ogwu òkaan̄ ujamgbugbo. 17 Awaji oneniria ogwu osat kan̄, Rafen, ibe isi igwa ema ene iba. Ìbe isan̄a otitọ me chieen̄ kè Tobit, inyi isa chieen̄ kan̄ imọọn̄ utoon̄ eyi Awaji; mè isa Sera, gwun̄ kè Raguwen, inyi Tobayas gwun̄ kè Tobit me lek nwa, mè inyan̄a ọmọ isibi me ubọk ikpak ikpak ijo erumun̄ ya, òrere Asimodiyọs. Mije, îre Tobayas okaan̄ unen irere nlom kè Sera, ìkare ebibilọ cha. Me ike mgbọ yaage, Tobit okekinan̄a me oyet egep ya inin̄ uwu, Sera si okekinan̄a me agwut uwu inyọn̄ ya isibi ijọn̄.