Ijọk îkana ufieejit
2
Me ukot mkpulu kè Esaradọn, ke nka inire uwu, mè iyaka iniluk melek Ana nwa n̄a mè Tobayas gwun̄ n̄a. Me mgbọ ijọk Pentikọs kiji, òrere Ijọk Nde, mîtem atalek inorie inyi emi. Nnenikup irek ibarie inorie ya. 2 Mgbọ mmun̄be inorie otutumọbe ijot inyọn̄ ikasi, nnenitumu inyi Tobayas ibe, “Gwun̄ n̄a, je si kpọ me etete ebi kiji ebi ìkup me usun̄ akọn̄ me Ninife, ire ikaan̄ ogwu ugbọọn̄ geelek omun̄be ogwu òsasa otutuuk ejit kan̄ imọnọ inu Awaji me isi uyọt, gwen na, inyi inigọọk emi igbaan̄ irie inorie. Mâkup ikpọ owu òsi, mè òka.” 3 Tobayas onanan̄a isibi isi iweek ogwu ugbọọn̄ ge me etete ebi kiji, mè igwu ikom ika, mè inigwen emi, “Nte n̄a!” Mfọfọọk otu ibe, “Gwun̄ n̄a, kpọ emi ire ogwu.” Inenibe emi, “Nte n̄a, kpọ, mîkpan̄ ogwu kiji ge itọp ito me oyet ama. Enwanwan ebek ikpan̄.” 4 Mgbọ yaage, nnanan̄a ikeke jîp, mè itele inorie ya, ǹkachachak me otu, mè isibi isi iben nkwukwu ene ya isan̄a me oyet ama isa initap me emen gwun̄ uwu ge, inyi ura inim, mè m̀ben ǹsi m̀fuun̄. 5 Mgbọ nkabe, nneniken mun̄ igwọk lek, mè irie inorie. Inorie ya, ǹrie me ufieejit. 6 Nnenikeek nriran Emọs obenbe ikeme ama Beten ibe,“Ijọk kinyi môkana ufieejit,
okwa unwọọn̄ kinyi môkana okwa ito.”
Ntoto ito.
7 Mgbọ ura onimbe, nsisi isi irọkọ udọn̄, mè iben ene ya ifuun̄. 8 Ebi mbuuruk n̄a ekekichak emi, mè ikibe, “Ìre ene yi ìkayaka ìkifieek owot si? Îre mije ifuun̄-ene ke eweek ọmọ ibekpan̄, ililibi. Ire, òkikpọk ifuun̄ ene si me ere keyi!”
Tobit îkana ǹnàan̄
9 Eririeen̄ yaage, nken mun̄ igwọk lek, mè inin̄ emen oyet egep n̄a isiki ilaak me agba ogọ oyet egep ya. Ubọk ere oyokbe, ǹkachit isi ìlaak. 10 Ǹkariọọn̄ ibe ke ebi kè agagawaji me lek ogọ ya ekupbe. Aya ifin ema efiatbe oninin̄ emi chieen̄ mè ikana otitọ. Nsasa isi lek ebi ofia ibe egwa emi, ire, ike ema ekitap ugwun̄, ikeya ke chieen̄ n̄a okidun, bak me lek otitọ ya, mege îchitbe isan̄a isi ge. Otuuk kè acha ini, ǹkakimọọn̄ inu. Otutuuk bọn ulọk n̄a ekekito emi nsan. Ayika okpọkpọ emi chieen̄ me lek acha iba, sabum îninan̄a isi agan̄ ido ebi Elam.
11 Mgbọ Ayika onan̄abe, Ana nwa n̄a onenikirọ asabọn ikwaan̄ ebibaan̄ ekirọ. 12 Isirọ inu geelek etipbe ọmọ isan̄a, îra ikiria ijet ebikaan̄, ebiba mîra ikikpe ọmọ mkpukpe. Mgbọ ge, me òso usen jaaba me emen onyan̄ ita, òrere onyan̄ Disiturus, inenisa ekwut îlọkbe iria ijet ebi ìtitip, ebiba ekpekpe ọmọ ikpoko kan̄ iso, mè inyi ọmọ gwun̄ ebot ge igbaalek. 13 Mgbọ îkabe, ebot ya obebene ikitaan̄ ukpo. Eya ke ngwen ọmọ ido ibe, “Ebot keyi ìnan̄a owu me owa? Ke ìkare òchichiin̄-wa? Gwat lek yaka sa jet ebikaan̄, mije, ìkatat ibe eji erie inorie echichiin̄.” 14 Ire, ibebe emi, “Echeche inyi emi igbaalek mkpukpe n̄a.” Ire, emi ǹkachieek ikọ kan̄, nrarama ọmọ ibe, “Sa jet ebikaan̄!” Unaan̄-ejit owuwuku emi me ejit me lek kan̄. Inenibe emi, “Sà inu echi mgbọ okiche inyi ene cha ye? Mọmọ ata irọrọ kwun̄ cha ni? Echichi ìre inu eriọọn̄be ofolek kwun̄ ma!”