Tobit
Tobit îluk ata ugwem
1
Ikpa keyi ìben mfufuk òfo me lek kè Tobit. Tobit ìre gwun̄ kè Tobien, gwun̄ kè Ananien, gwun̄ kè Aduwen, gwun̄ kè Gabayen gwun̄ kè Rafen, gwun̄ kè Raguwen ogwu owot iman kè Asiyen, ogwu otoko kè Nafitali. 2 Me ukot mkpulu kè Salimanesa, ogwu ubọọn̄ ebi Asiria, ke etet emi Tobit melek owuwa ene me usun̄ akọn̄ me Tisibe, ama òkup me Galili agan̄ inyọn̄, me osiki ama Kedes me ijọn̄ ebi otoko kè Nafitali eyi òkup me iraraka Asọru inyi agan̄ ichep-ura me agan̄ inyọn̄ Fogori. 3 Emi, Tobit, ǹkiluk ugwem me oniin̄ eyi atikọ mè ata irọrọ otutuuk ugwem n̄a. Ǹkicheche inu inyi bọn ulọk n̄a mè ebi ido kiji ebi ekpulube melek n̄a me usun̄ akọn̄ isa ifo ama Ninife me ido Asiria. 4 Mgbọ nrebe nsabọn irieen̄, mè ikup me ido kiji me ijọn̄ Ijeren, otutuuk ebi otoko kè Nafitali, òrere otoko kiji, efefieek inan̄a me uwu kè Debit me ama Jeruselem. Ama yi ke Awaji ogobo me lek otutuuk ama ebi Ijeren. Emen kan̄ ke Uwu Mbuban okup, òrere ere Awaji Ogwu Òbebene Ichit okiluk, mè ere otutuuk ebi Ijeren ekinu inikigwa ngwugwa inyi Awaji. Uwu Mbuban ya esusun̄ me mbuban, mè inama inye, inyi ikup ire ukot geelek. 5 Otutuuk ebi owot iman kiji mè ebi otoko kiji, Nafitali, ekisi igwa ngwugwa me Dan me ogoon̄ Galili inyi eriembuuk alata araran̄ eyi Jerobuwam onamabe ito inyi Baali.6 Ire, emi gaalek nkije isi ijọk me Jeruselem me mgbọ me mgbọ kubọk ikan obe ekerọ ere mgbọ geelek. Ǹkigwagwat lek isa adasi mfut inu mwopbe mè adasi bọn anam, mè irek ge me akọp irek me lek eriembuuk n̄a, mè adasi inwọọn̄ nsọpbe me lek arọọn̄, isa ikisi me lek ntook me Jeruselem, mè ikisa inyi bọn kè Erọn, ebi ngwugwa. 7 Ikeya si ke nkisa irek ge me lek akọp irek me lek akpa, mè miin̄, mè aran̄ olifu, mè pomegaranet, mè figi, mè mfut kechichilọ si, inyi ebi otoko kè Libai ebi ìkirọ ikwaan̄ Awaji me Jeruselem. Ofifi si, acha gweregwen geelek, irek òso iba me lek akọp irek, ǹkinyanyam, mè isa ikpoko ya isi Jeruselem isi ikiche inyi ebi ene esa erie inorie ijọk. 8 Irek òso ita me lek akọp irek ke nkiche inyi bọn kpà-nte mè ebi nwakpa mè ebi ichen ìluk me etete ebi Ijeren. Òso acha ita geelek, nsisa inu cha inyi ema, eji mîra igbaan̄ irie inorie ijọk igọọk me lek Ikan Mosis onyibe mè nteme kè Dibọra, nga kè Ananien, nte nte n̄a, mije, nte n̄a îkwu itele emi, nkakana gwun̄ kpà-nte.
9 Mgbọ mminbe inin̄ ene, mmọmọnọ Ana, enenwaan̄ ge me uwu kiji ido me lek nwa. Eji ekakaan̄ gwun̄ enerieen̄ ge ogwu ngwenbe Tobayas.
Tobit îgbe utoon̄-ejit me usun̄ akọn̄ me Ninife
10 Me mgburudun̄ kan̄, mgbọ etetbe eji me usun̄ akọn̄ isa ifo Asiria, enenisun̄ emi me Ninife. Otutuuk bọn ulọk n̄a mè ebi kiji ekekirie inorie ebi ido kpekiriaak Awaji cha ekirie. 11 Ire, emi njijit inorie ebi ido kpekiriaak Awaji cha. 12 Mije nsabe otutuuk ugwem n̄a inyi isusun̄ Ikan Awaji Ogwu Òbebene Ichit, 13 Awaji orọrọ ibe ogwu ubọọn̄ Salimanesa ikaan̄ ata ejit me lek n̄a, mè isa emi irọ ogwu òkisi ilep inu geelek inyi ọmọ. 14 Mege Salimanesa okwube, ǹkisisi ido Midia isi ikilep inu ijet ọmọ. Mgbọ ge nkupbe me ama Rajis me Midia, nnyinyi Gabayen, gwun̄ kè Gabiri, owuwa akpa ikpoko alata okuket ibe isun̄ inyi emi. Ikpoko cha îso efit kilo ita. 15 Ire, mgbọ Salimanesa okwube inan̄a, Senakerip, ogwu gwun̄ enerieen̄ oraraka irek ubọọn̄ ogwu ute ikup. Bene me mgbọ ya, oniin̄ ekije isi Midia ìyaka inikup unan unan. Eya orọ, ǹkayaka ìkọt ìsi.
Tobit îfuun̄ owuwa ebi Ijeren ekpan̄be
16 Me ukot kè Salimanesa, nkiche owuwa inu me ata ejit inyi ebi kiji ebi Ju mè ebi otoko kiji. 17 Ebi ìkup me uraafiọọn̄, ǹkinyinyi inorie; ebi kpunu ekwut me ebon, ǹkinyinyi ema ekwut echi n̄a. Ire mmun̄ nkwukwu ogwu kiji geelek ekpan̄be itọp ito me udun̄ mgban̄ ama Ninife, ǹkibeben ifuun̄. 18 Mfuun̄ si ebi keya Senakerip okpan̄be mgbọ îkilibi me Judia ika. Ìlibi mije osusut Awaji, ogwu Ubọọn̄ emen inyọn̄, onyibe ọmọ bak me lek ikọ unyechieen̄ îtumube inyi Awaji. Mgbọ îkabe, isasa unaan̄-ejit ikpan̄ owuwa ebi Ijeren. Emi nnwenween̄ lek isi ibeen̄ nkwukwu ife cha isan̄a isi ifuun̄. Eya orọ, mgbọ Senakerip ogwube ikom iniweek nkwukwu kiban̄ cha, ìkamun̄. 19 Ogwu Ninife ge osisi itumu inyi ogwu ubọọn̄ ya ibe ke îre emi nkifuun̄ ife cha. Ogwu ubọọn̄ oraria ebi ene ibe eneweek emi etet ekpan̄. Mgbọ nriọọn̄be ibe ke mêkiweek emi ikpakpan̄, owot ofefieek emi, nlilibi. 20 Mgbọ emun̄be ibe ke nlibi, ogwu ubọọn̄ onyinyi ida, efufum otutuuk inu nkaan̄be isan̄a kpai isa isi itap me uwu isun̄-inu ogwu ubọọn̄. Kpesik kubọk inu ge ikeyi inyi emi, îtata Ana nwa n̄a mè Tobayas gwun̄ n̄a gaalek.
21 Ìkaso akọp usen ini me lek, bọn kè Senakerip ene iba ekpakpan̄ nte kiban̄ Senakerip, mè ilim ifon inyọn̄ ogoon̄ Ararat. Ofifi ogwu gwun̄, Esaradọn oraraka irek ubọọn̄ kan̄ ikeke, mè inisa Ayika, gwun̄ kè Anayen, ogwu ngwan̄ n̄a enerieen̄, ito ibe ikikpọ chieen̄ me lek ikpoko me otutuuk ido ya, mè ikikpọ si chieen̄ me lek otutuuk inu òfo me lek mkpulu me ido ya. 22 Ayika onenitumu ikọ me ibot n̄a, enenitele ibe emi ǹgwu ǹkom ǹka Ninife. Ayika îwuuk lek ire ogwu ibot ebi ìkinyi ogwu ubọọn̄ Senakerip miin̄, mè ogwu òkisun̄ mkpọtubọk iman̄ òriọọn̄ ogwu ubọọn̄, mè ogwu otuchieen̄ ikpoko me irak kè Senakerip ogwu ubọọn̄ ebi Asiria. Eya orọ Esaradọn okpọkbe imọnọ ọmọ. Ayika ìre gwun̄ ngwan̄ n̄a, îriaak emi me lek.