Jekọp îbem lek ichichichini Isọ ogwu ngwan̄
32
Jekọp mè ebi melek kan̄ enenikije me oniin̄ ije kiban̄. Ebi osat Okumugwem esisibi ichichini ọmọ. 2 Jekọp imumun̄ ife cha, itutumu ibe, “Ìkpolọlọ ere yi ke Awaji okigba isiki efuuk.” Mije keya, igwegwen ere ya Mayanayim.a3 Jekọp oneniria ebi ikwaan̄ kan̄, inyi eje me isi kan̄, esi lek kè Isọ ogwu ngwan̄, me Seya òkup me ido ebi Edọm, 4 mè inyi ema ida ibe, “Ìsi ìtumu ìnyi ogwukaan̄ n̄a, Isọ, ibe ke emi Jekọp ogwu usun̄ kè ogwugwu, ǹgọọk Leban iluk, mè ikup me ere ya mege inire chereyi, 5 ke nkaan̄ owuwa eriembuuk, mè inyinya akpan, mè arọọn̄, mè ebot, mè ebi usun̄ ebirieen̄ mè ebibaan̄; ke emi ǹkiria etip yi ijet ogwugwu, ogwukaan̄ n̄a, ikisa ibeek ibe ogwugwu ibọkọ emi itap me atata.”
6 Ebi ikwaan̄ cha esisi, mè igwu ikom ika inilook Jekọp ibe, “Eji mîsi imun̄ Isọ ngwan̄ kwun̄. Ọmọ ògwa òkinu me oniin̄ ibonichichini owu, ọmọ melek efit ebirieen̄ ini.”
7 Mgbọ Jekọp onọbe etip ya, ukpook otetet ọmọ enenen, mè itap ọmọ ufieejit. Ineniche ebi melek kan̄ irek iba, mè iche si otutuuk arọọn̄ kan̄, mè eriembuuk kan̄, mè aligọ kan̄ irek iba iba. 8 Ekiket kan̄ ìre, ire Isọ inichichini irek ge, mè ibene akọn̄ me lek kiban̄, ke irek ge keyilọ môlibi inwọnọ.
9 Jekọp oneniriaak uriaak ibe, “Jei, Awaji kè nte nte n̄a Ebereyam mè Awaji kè nte n̄a Ajiki! Jei Okumugwem, ke owu otumu inyi emi ibe emi ǹgwu ǹkom m̀fo ido kiji mè ama n̄a, ke owu môrọ inyi inu ije ijaan̄ emi me lek. 10 Me atikọ, emi ogwu usun̄ kwun̄, ǹkagbe ogwu owu obokaan̄ ata ejit me lek, mè irọ si atikọ inyi, kubọk owu orọbe inyi emi. Mgbọ nsababe okwaan̄ Jodan yi me adasi mgbọ, ǹkaan̄ mkpat gaalek me ubọk. Ire, me mgbọ keyi, mmumana iwa iso urum iba. 11 Soso, nyan̄a emi sibi me ubọk kè Isọ ngwan̄ n̄a. Mije, emi ǹkifieek owot me lek ngwan̄ n̄a, ibe ke môben akọn̄ inu emi me lek, mè inikpan̄ emi mè nsabọn chi, mè ebi nga kiban̄. 12 Îre owu Awaji ochieek emi use ibe, me atikọ, ke owu môrọ inyi inu ije ijaan̄ emi me lek, mè irọ inyi bọn owot iman n̄a emumana enenen kubọk okpoon̄ agba awaji, eyi ene kpokọtbe ifuk otu ifuk.”
13 Jekọp onenilaak me ere ya iwele egwe, mè inisan̄a inu ìbosa iche inyi Isọ ogwu ngwan̄ isibi. 14 Uche ya ìre efit uman ebot iba, mè akọp orie ebot iba, mè efit uman arọọn̄ iba, mè akọp orie arọọn̄ iba, 15 mè akọp uman aligọ ita mè bọn kiban̄ ìkinwọ ebe, mè akọp uman eriembuuk ini, mè akọp orie eriembuuk, mè akọp uman inyinya akpan iba, mè akọp orie inyinya akpan. 16 Ineniche anam cha itap me ubọk ebi usun̄ kan̄, me urum me urum, kpa chieen̄ anam kpa urum kiban̄, mè ibe edasi esa eje, mè iteme ema ibe, “Mgbọ enyi mêkije me oniin̄, urum ge ikup ijọn̄ọ ere me lek urum ògọgọọk.”
17 Ineniteme ogwu òboje me isi ibe, “Ire Isọ ngwan̄ n̄a imun̄ owu, mè ido owu ibe ìre ekene ore nte uwu kwun̄, mè ìre owu òbosi owa, mè ìyaka ire, mè ìre ekene okaan̄ anam kechi òkup me isi kwun̄? 18 Fọọk ibe, ‘Îre echi kè Jekọp ogwu usun̄ kwun̄. Ìbe esa inu chi eneche enyi owu, ogwukaan̄ kan̄ Isọ. Ọmọ me lek kan̄ òkinu me udun̄.’ ”
19 Jekọp înyi si ogwu usun̄ kan̄ òso iba, mè ogwu òso ita, mè otutuuk ebi ìbesa urum anam cha ije, ida ibe, “Ìtumu si otu yaage mgbọ enyi isimun̄ Isọ me oniin̄. 20 Ikalọ itutumu inyi Isọ ibe, ‘Ogwu usun̄ kwun̄ Jekọp òkinu me udun̄.’ ” Jekọp ìkeek ibe, ire ọmọ isa inyinyi cha irọ inyi ejit kè Isọ ideke sabum ọmọ ònomun̄ ogwugwu isi mè isi, usini mgbọ, ke ogwugwu môkaan̄ ata ejit me lek kan̄. 21 Jekọp oneniria inyinyi cha ijet Isọ, mè isiki ilaak me ere m̀gba-ǹgwele ukan̄ ya iwele egwe.
Jekọp îtap àlo melek Awaji
22 Me eririeen̄ usen ya, Jekọp onanan̄a ikeke, mè ikpulu ebi nwa iba kan̄, mè ebi usun̄ ebibaan̄ iba kan̄, mè akọp mè bọn ebirieen̄ ge kan̄ isa isaba okwaan̄ Jabọk. 23 Mgbọ îsabe ema isaba okwaan̄ ya isi igwook me usaba agan̄, inenikpulu si otutuuk inu îkaan̄be isa isaba isi igwook si, 24 mè inikup ọmọ gaalek me agan̄ ya. Me eririeen̄, enerieen̄ ge osisibi inu, mè initap àlo melek kan̄ ejit yaage ire agan̄ egwe. 25 Mgbọ ogwu enerieen̄ ya omun̄be ibe ke ọmọ ìkakọt ìtọbọ Jekọp me ijọn̄, isusulu Jekọp me otu ukwuuk ekwut ebon, ukwuuk ya okwakwala me otu usọk. 26 Ogwu enerieen̄ ya onenibe Jekọp, “Tele mè m̀fo, ke egwe môniwele.”
Ire, Jekọp ofọfọọk ibe, “M̀kpatele owu òfo, îtata mè owu ògbagbana emi.”
27 Ogwu enerieen̄ ya ododo Jekọp ibe, “Keke ore erieen̄ kwun̄?”
Jekọp ofọfọọk ibe, “Erieen̄ n̄a ìre Jekọp.”
28 Ogwu enerieen̄ ya onenibe ọmọ, “Erieen̄ kwun̄ ìkpoyaka ire Jekọp, ìboyaka inire Ijeren,b mije, owu ogọọk Awaji melek ebilene itap àlo, mè itim ikpan̄.”
29 Jekọp onenibe ogwu enerieen̄ ya, “Soso bak erieen̄ kwun̄ nyi emi ma.”
Ogwu enerieen̄ ya ododo ọmọ ibe, “Ìre keke orọ okido erieen̄ n̄a?” Igbagbana Jekọp me ere ya.
30 Jekọp oneninyi ere ya erieen̄, Penien,c mije, ìtumu ibe ke ọmọ îmun̄ Awaji isi mè isi, mè iluk ugwem.