Jekọp îchichini Isọ
33
Jekọp onenibene chieen̄, mè imun̄ Isọ melek efit ebirieen̄ ini kan̄ ekinu. Eya orọ, icheche usini bọn kan̄ itap me ubọk kè Lia, mè iche usini itap me ubọk kè Rechen, mè iche usini itap me ubọk ebi usun̄ ebibaan̄ iba kan̄, 2 mè inito ebi usun̄ ebibaan̄ cha mè ebi bọn me isi, mè ito Lia mè ebi bọn igọọk, sabum Rechen mè Josefu enikup me udun̄. 3 Jekọp me lek kan̄ oje me isi kiban̄ otutuuk. Mgbọ îjebe igbet lek kè Isọ ogwu ngwan̄, itọtọbọ ibot me ijọn̄ mgbọ jaaba inyi Isọ.4 Isọ olilibi inin̄ Jekọp lek, mè iwele ubọk ikana ọmọ ikat. Ema ene iba ebebene ikito ito. 5 Isọ onenibene chieen̄ imun̄ ebibaan̄ cha, mè ebi bọn, mè ido Jekọp ibe, “Sà ebibi ìgọgọọk owu ije chi ye?”
Jekọp ofọfọọk ibe, “Îre bọn Awaji osabe me ejit nsan kan̄ iche inyi emi, ogwu usun̄ kwun̄.”
6 Ebi usun̄ ebibaan̄ iba cha melek ebi bọn enenije inu me lek kè Isọ, mè initọbọ ibot inyi ọmọ. 7 Lia mè ebi bọn ejeje si inu, mè itọbọ ibot inyi. Òta kan̄, Rechen mè Josefu enenigọọk ije isi, mè itọbọ ibot inyi.
8 Isọ onenido Jekọp ibe, “Ìre urum anam nchichinibe me oniin̄ cha ìkeke inyi keke?”
Jekọp ofọfọọk ibe, “M̀basa anam cha irọ owu inu ubelejit.”
9 Isọ obebe, “Iyak, ngwan̄ n̄a, emi mwuuk lek ikaan̄ anam iwa. Sun̄ eyi okaan̄be nyi lek kwun̄.”
10 Jekọp obebe, “Ìkanwọn ikeya ma. Ire oma emi, soso bọkọ inyinyi nnyibe owu. Me atikọ, eyi mmun̄be isi kwun̄ mgbọ keyi, ìyaka ikup kubọk isi Awaji ke mmun̄, mije, mmun̄ ibe ke owu obele ejit me lek n̄a. 11 Soso, bọkọ sọntiik inyinyi yi nchebe inyi owu, mije, Awaji îkaan̄ ejit nsan me lek n̄a, mè ichili ubọk iche inu inyi emi. Nkaan̄ otutuuk inu geelek ebi ene ekiweek.” Jekọp orariaak Isọ mege Isọ onwenwene ejit, mè ibọkọ inu cha.
12 Isọ obebe Jekọp, “Ngwa, eji eneje. Emi mâsa owu iban.”
13 Ire, Jekọp otutumu inyi Isọ ibe, “Ogwu nte, owu oriọọn̄ ibe ke asa nsabọn chi kpebekọt ije unye ije òkup ikeya. Ofifi si, owuwa arọọn̄ chi mè eriembuuk chi ekinyi bọn kiban̄ ebe. Ire nsa ema ije unye ije, ikerere usen ge gaalek, ema mêkwaan̄ ita. 14 Eya orọ, ogwu nte n̄a, kpọkpọ je. Owu oriọọn̄ ibe ke anam chi mè nsabọn chi kpebekọt igwat ukot ije. Emi mâsa ema ije ususuk inire lek kwun̄ me Seya.”
15 Isọ onenibe, “Ire ikeya, mâtele usini ebi melek n̄a chi, inyi egọọk owu eje.”
Ire, Jekọp ofọfọọk ibe, “Eya ìkakup me uyọt. Soso, tele mè ikup ikeya ubọk ntumube.”
16 Isọ ogwugwu ikom ifo Seya usen ya. 17 Ire, Jekọp ojeje isi ere ekigwen Sukot, mè inama uwu ge inyi lek kan̄, mè inama si owuwa atanga inyi anam kan̄. Mije keya ke îgwen ere ya Sukot.a
18 Me òta kan̄, Jekọp onenije ije kan̄, eyi îbenebe me Padan Aram, inire Sekem me ido Kenan me esuuk. Inenigwuun̄ uwu ọfọ kiban̄ me agba lek ama ya. 19 Inenibọkọ ijọn̄ ere îgwuun̄be uwu ọfọ kan̄ ya ilep efit ikpoko alata okuket, me ubọk bọn kè Amoru, nte kè Sekem. 20 Jekọp oneninama ntook ngwugwa ge me ere ya, mè igwen ntook ya Eli Elọye Ijeren.b