Ogwu Fero îtele mè Jekọp mè ebi kan̄ eluk me Gosen
47
Josefu onenisi itumu inyi ogwu Fero ibe, “Nte n̄a mè ebi ngwan̄ n̄a mîsa otutuuk anam kiban̄ mè inu geelek ema ekaan̄be inan̄a me ido Kenan inu. Ema me Gosen ekupbe.” 2 Josefu îgobo ebi ngwan̄ kan̄ ebirieen̄ go isa igbaalek inu. Inenisa ema ijeen̄ ogwu Fero.3 Ogwu Fero onenido ebi ngwan̄ kè Josefu cha ibe, “Ìre keke ore ukot mbọm kinyi?”
Ema efọfọọk ogwu Fero ibe, “Eji ebi usun̄ kwun̄ ìre ebi òkpukpo anam, igọọk me akpat ukot ebi nte nte kiji.” 4 Ema enenitumu inyi ogwu Fero ibe, “Eji ebenigọọk igbaan̄ iluk me inyọn̄ ijọn̄ yi sọnja mgbọ, mije, akan̄ înye enenen me ido Kenan. Anam kiji ìkayaka ìmun̄ mbubet ìtaka. Eya orọ, soso, tele mè eji ebi usun̄ kwun̄ eluk me inyọn̄ ijọn̄ Gosen.”
5 Ogwu Fero onenifọọk Josefu ibe, “Nte kwun̄ mè ebi ngwan̄ kwun̄ mînu me lek kwun̄. 6 Ijọn̄ ido Ijipiti ìkup me ubọk kwun̄. Sa nte kwun̄ mè ebi ngwan̄ kwun̄ si mè esi eluk me inyọn̄ ijọn̄ Gosen, ijọn̄ ònwọnwọn ichit me ido Ijipiti. Ire ikaan̄ ebi me etete kiban̄ ìrọriọọn̄ ikikpukpo anam ijaan̄, sa anam n̄a tap me ubọk, mè ekekpukpo enyi emi.”
7 Josefu osisi isa Jekọp ogwu ute inu inijeen̄ ogwu Fero. Jekọp onenigbana ogwu Fero. 8 Ogwu Fero onenido Jekọp ibe, “Ìre owu ìre acha inen?”
9 Jekọp ofọfọọk ibe, “Otu ifuk acha ugwem n̄a me linyọn̄ yi ngọọkbe igbaan̄ iluk ìre efit acha mè akọp ita. Acha ugwem n̄a ìre inen mè inen gaalek, ire, îwa ufialek me emen. Ǹkaluk ìjọn̄ọ acha kubọk ebi nte nte n̄a elukbe.” 10 Jekọp okpọkpọk igbana ogwu Fero, mè isibi ifo.
11 Josefu osasa ogwu ute mè ebi ngwan̄ isi inyi ere ibe eluk me inyọn̄ ijọn̄ agan̄ Rameses, ere ijọn̄ onwọnbe ichit me ido Ijipiti, ike ogwu Fero obe irọ. 12 Josefu okekinyi ogwu ute mè ebi ngwan̄ kan̄ mè otutuuk ebi uwu nte kan̄ inorie igọọk me otu ifuk nsabọn ìkup me ototun̄ ukan̄ geelek.
Unye akan̄
13 Akan̄ ya îyok enenen ire lek kpunu inorie me ere geege me otutuuk lek ijọn̄ agan̄ ya. Ebi Ijipiti mè ebi Kenan ekekigak iweek mije uraafiọọn̄. 14 Josefu okekinyam inorie. Ebi Ijipiti mè ebi Kenan esasa otutuuk ikpoko ema ekaan̄be ilep inorie isan̄a kpai. Josefu otititiin̄ otutuuk ikpoko cha, mè ikpulu isa ijet me uwu ogwu Fero. 15 Mgbọ otutuuk ikpoko òkup me ido Ijipiti mè ido Kenan otabe isan̄a kpai me lek inorie, otutuuk ebi Ijipiti egbugbuku inu me lek kè Josefu, mè initumu inyi ibe, “Ikpoko kiji îta isan̄a kpai! Ìre owu môfat itele ibe eji ekup me isi kwun̄ ekwaan̄ eta ni? Soso, nyi eji inorie!”
16 Josefu ofọfọọk ema ibe, “Ire ikpoko kinyi ita, ìsa anam kinyi ìninwene inorie me ubọk n̄a.” 17 Ema ekekisa anam kiban̄ ininwene inorie me ubọk kè Josefu. Josefu okekinyi ema inorie me useen̄ inyinya, mè urum arọọn̄ mè ebot, mè urum eriembuuk, mè inyinya akpan. Josefu onyinyi ema inorie me useen̄ anam kiban̄, mè isa me ikeya inyan̄a ebek ugwem kiban̄ otutuuk acha keya.
18 Mgbọ acha keya orakabe, ebi Ijipiti ekpọkpọk igbuku inu me lek kè Josefu me acha ògọgọọk, mè initumu inyi ọmọ ibe, “Ogwu nte, eji kpebelet owu inu geege. Ikpoko kiji îta. Otutuuk anam kiji îkana echi kwun̄. Mgbọ keyi, kpunu inu geege eji eyaka ikaan̄ isasa ininwene inorie me ubọk kwun̄, ita me lek akpalek kiji mè ijọn̄ kiji gaalek. 19 Ìre owu môfat itele ibe eji melek ijọn̄ kiji ekup me isi kwun̄ ejijit eta ni? Soso bọkọ eji mè ijọn̄ kiji lep, mè nyi eji inorie. Eji melek ijọn̄ kiji mênin̄ usun̄ inyi ogwu Fero. Soso nyi eji akpa, inyi eji esan̄a usini erie, mè ekakwaan̄ ìta, mè eben usini ewop inyi ijọn̄ uko kiji ikajijaka.”
20 Sa me ikeyi, Josefu olelep otutuuk ijọn̄ Ijipiti inyi ogwu Fero, mije, ubọk akan̄ ya onyebe enenen, otutuuk ebi Ijipiti mînyiaan̄ ijọn̄ uko kiban̄ me ene me ene isan̄a kpai inyi ogwu Fero. Otutuuk ijọn̄ ebi Ijipiti okakana ire echi ogwu Fero. 21 Mije keya, otutuuk ebi Ijipiti, bene me ibot agan̄ ge si re òta, ekakana usun̄ inyi ogwu Fero.a 22 Îtata ijọn̄ ebi ngwugwa gaalek ke Josefu ìkalep. Ebi ngwugwa kpenyam ijọn̄ kiban̄, mije, ogwu Fero îkinyi ema inorie me mgbọ me mgbọ, eyi òkiso ema isasa ikpukpo lek kiban̄. Eya orọ, ema kpenyam ijọn̄ kiban̄.
23 Josefu onenitumu inyi ebi Ijipiti ibe, “Mgbọ keyi nlepbe enyi mè otutuuk ijọn̄ kinyi inyi ogwu Fero, kpọ mfut ire echi, ìbọkọ ìsa ìsi ìwop me inyọn̄ ijọn̄. 24 Enyi isirọkọ, ene geelek iche inu îrọkọbe me uko irek go, mè isa irek ge ijet ogwu Fero. Me etete irek ini òsisik, enyi mêsan̄a eyi enyi ebesa iwop ofifi acha, mè irie eyi òsisik, enyi mè ebi uwu kinyi, mè nsabọn kinyi.”
25 Ebi Ijipiti efọfọọk Josefu ibe, “Ogwu nte, owu onyan̄a ebek ugwem kiji. Soso kikaan̄ si ata ejit me lek kiji ikeyi fo isi. Eji mîchieek irere usun̄ inyi ogwu Fero.”
26 Ikeyi ke Josefu osa itap ikan òkup me ido Ijipiti mege inire chereyi, ibe ke otutuuk ebi Ijipiti mêkisa irek ge me irek go me lek otutuuk mfut uko ijet ogwu Fero. Îtata ijọn̄ ebi ngwugwa gaalek ikakupge ìnyi ogwu Fero.
Òta mbeek kè Jekọp
27 Me otutuuk mgbọ ya, bọn kè Ijeren eluk me agan̄ Gosen me ido Ijipiti. Ema mîleen̄ ijọn̄ ikaan̄ me ere ya, mè imumana, mè iwa enenen me otu ifuk.
28 Jekọp, òrere Ijeren, îluk me Ijipiti akọp mè acha jaaba. Otutuuk otu ifuk acha ugwem kan̄ onenire efit acha mè akọp ini mè jaaba. 29 Mgbọ mgbọ mkpa kè Ijeren ogbetbe, igwegwen Josefu gwun̄ kan̄, mè itumu inyi ibe, “Ire oma emi, tap ubọk me irak owut-ukot n̄a, mè nyan̄a ibot nyi emi ibe ke owu môkaan̄ ata ejit mè ugwem atikọ me lek n̄a. Soso, kafuun̄ emi me Ijipiti. 30 Nsikwu igọọk ebi nte n̄a, ben emi sibi me Ijipiti sa si fuun̄ me ere efuun̄be ebi nte n̄a.”
Josefu ofọfọọk ọmọ ibe, “Emi mârọ ubọk owu otumube.”
31 Ijeren otutumu inyi Josefu ibe, “Nyan̄a ibot nyi emi ibe ke owu môrọ inu yi ntumube.” Josefu onyanyan̄a ibot inyi. Ijeren onenigele ikwuun̄ me ibot mkpilaak kan̄, mè inyi Awaji itọn̄.