Jekọp îgbana Manasi mè Iferem
48
Sọnja mgbọ iraraka, etip onenilook Josefu ibe ke lek ogwu ute ìkanye. Josefu osasa bọn ebirieen̄ iba kan̄, Manasi mè Iferem, igbaalek isi ikpọ ogwu ute. 2 Jekọp inọnọ ibe ke Josefu gwun̄ kan̄ înu ibonikpọ ọmọ, itetet lek inye, mè itọbọ ubọk inan̄a ikeke ibene lek igwuun̄, mè isiki ikweek irek me inyọn̄ mkpilaak.3 Inenitumu inyi Josefu ibe, “Awaji Ogwu Òkaan̄ Unye Geelek îsibi ichichini emi me ama Luju me ido Kenan, mè igbana emi, 4 mè ichieek use ibe ke ọmọ mônyi emi owuwa nsabọn, mè irọ inyi nsabọn cha emumana, mè ekana owuwa ido. Îtumu si ibe ke ọmọ môsa ijọn̄ Kenan inyi bọn owot iman n̄a, inyi ire eyi kiban̄ isi ire mgbọ geelek.
5 “Eya orọ, mgbọ yi, bọn iba kwun̄, Iferem mè Manasi, ebi owu obonbe me Ijipiti sabum emi nnube me lek kwun̄, kpebeyaka ire bọn kwun̄. Ema ebeyaka inire bọn n̄a, ìkike kubọk Ruben mè Simiọn erebe. 6 Ikaan̄ nsabọn geelek owu oyakabe ibon igọọk ebibi, ebiba ebere echi kwun̄. Ebiba kpebekaan̄ ìrot eyi isi kiban̄. Ìrot kiban̄ ìboje me erieen̄ ebi ngwan̄ kiban̄, Iferem melek Manasi. 7 Me agan̄ eyi n̄a, mgbọ nkinan̄a me Padan Aram ika, nga kwun̄ Rechen ogagak emi ikwu me ido Kenan me oniin̄ eji ekije ifo Efarata. Eji kpejeje igbet ama ya mgbọ inu ya orọbe. Mbeben ọmọ ifuun̄ me ere ya, me oniin̄ Efarata, òrere Beteleyem.”
8 Mgbọ Ijeren okanabe chieen̄ imun̄ nsabọn kè Josefu, idodo ibe, “Ebi owa ire ebi?”
9 Josefu ofọfọọk ibe ke îre bọn Awaji onyibe ọmọ me ido Ijipiti.
Ijeren obebe Josefu isa nsabọn cha inu, inyi ọmọ igbana.
10 Me ike mgbọ keyi, Ijeren ìkayaka ìkimọọn̄ inu ìjaan̄ mije ukan. Josefu otataba nsabọn iba cha iriaak me lek ogwu ute. Ikakana ema ikat, mè igọbọ ema ikaan̄.
11 Ijeren onenitumu inyi Josefu ibe, “Emi ǹkakekeek mgbọ geege ibe ke mâyaka imun̄ isi kwun̄. Ire, mgbọ yi, Awaji îrọ inyi m̀mun̄ owu, mè irọ inyi ǹyaka ǹnemmun̄ nsabọn kwun̄ si m̀gbaalek.”
12 Josefu onenibọkọ nsabọn cha isan̄a me inyọn̄ ukot ogwu ute, mè igele ibot isiki me ijọn̄ me isi ogwu ute, 13 mè initet Iferem me ubọk agan̄ ulom kan̄ isa ito me agan̄ ubọk ujit ogwu ute, mè itet Manasi me ubọk agan̄ ujit kan̄ isa ito me agan̄ ubọk ulom ogwu ute. 14 Mgbọ Ijeren obogbana nsabọn cha, ikwukwuk ubọk iba kan̄ irieen̄, mè isa ubọk agan̄ ulom itoon̄ me ibot kè Iferem, ubọk geelek Iferem orebe ogwu ijija, mè inisa ubọk agan̄ ujit itoon̄ me ibot kè Manasi, ubọk geelek Manasi orebe ogwu adasi gwun̄.
15 Inenigbana Josefu ibe,
“Awaji, owu ogwu ebi nte n̄a,
Ebereyam mè Ajiki,
ejebe me oniin̄ kan̄,
owu ogwu òkpukpukpo emi me otutuuk ugwem n̄a
mege inire chereyi;
16 owu ogwu osat Awaji
ogwu òsasan̄a emi isibi
me emen otutuuk unan geelek,
gbana nsabọn ebirieen̄ chi.
Rọ inyi nsabọn chi ekechieek erieen̄ n̄a,
mè erieen̄ ebi nte n̄a, Ebereyam mè Ajiki.
Rọ si inyi nsabọn chi emumana,
mè ewa enenen me otu ifuk me linyọn̄.”
17 Mgbọ Josefu omun̄be ogwu ute otoon̄be ubọk agan̄ ulom me ibot kè Iferem, îfieek me lek kan̄ enenen. Itetet ubọk agan̄ ulom ogwu ute ibene isan̄a me ibot kè Iferem ibosa itoon̄ me ibot kè Manasi, 18 mè itumu inyi ogwu ute ibe, “In̄-in̄, nte n̄a, ìkare ikeya! Ogwugwu ore adasi gwun̄, toon̄ ubọk agan̄ ulom kwun̄ me ibot kan̄.”
19 Ire, ogwu ute ojijit, mè ibe, “Emi nriọọn̄! Gwun̄ n̄a, emi nriọọn̄ inu nkirọ. Manasi si môre ute inyi ido ge, mè ire si ogwu ilile. Ire, me atikọ, ogwu ngwan̄ ogwu ijija mômin igak ọmọ. Bọn owot iman kan̄ mêkana owuwa ido.” 20 Inenigbana nsabọn iba cha me usen ya, mè itumu ibe,
“Ebi Ijeren mêkisa me erieen̄ kinyi igbana ene ibe,
‘Awaji irọ inyi owu òkup
kubọk Iferem melek Manasi.’ ”
Isasa me ikeyi isan̄a Iferem ito me isi kè Manasi.