Ntook nsensi
30
“Mêsa uti akasia inama ntook ebekiwọp nsensi me inyọn̄. 2 Agan̄ ini kan̄ môre ìkike, ujọn̄ọ kan̄ mè uwele kan̄ môre agbagba otubọk iba. Ubene kan̄ môre agbagba otubọk ini. Ebegbagbaan̄ iko ini kan̄ melek kan̄ irom lek ge, kpeberom iko kan̄ esese. 3 Mêsa alata araran̄ eyi kpewọlọ ichiọọk ichit otutuuk lek, me inyọn̄ kan̄, mè agba owot kan̄ otutuuk ikat ikana, mè iko ini kan̄ cha. Mêsa si alata araran̄ ibot obubot òjajaan̄ ikat ikana me ukpọk otu kan̄. 4 Mêsa alata araran̄ irọ ògbọ ini inwaan̄ me irak obubot ya, iba me agba agan̄ ge, iba me agba agan̄ keyilọ, inyi mêkitap ogbugboon̄ iba itibi chieen̄ kiban̄ isa ikiben ntook nsensi ya. 5 Mêsa uti akasia irọ ogbugboon̄ cha, mè isa alata araran̄ ichọkọ ichit lek. 6 Mêyik ntook ya me agan̄ isi ekwut mgban ya, eyi esabe ifieek ikwek okop ata-ikọ ya, eyi ogboon̄ nsan ya ochitbe me inyọn̄. Îre me ere ya ke mbakichichini melek kinyi. 7 Erọn môkiwọp nsensi utop olu me inyọn̄ ntook yi me ewelegwe geelek mgbọ ìbokinu inikpọ chieen̄ me lek otitọn̄ cha. 8 Mgbọ geelek Erọn môkinu inimin otitọn̄ cha me otu ikakwun̄ usen geelek, môkiwọp si nsensi me inyọn̄ ntook ya. Ikeyi ke ebekiwọp nsensi me isi Okumugwem mgbọ geelek isi ire ukot geelek. 9 Kpebewọp ofifi chieen̄ nsensi me inyọn̄ ntook nsensi ya, kpebegwagwa si ofifi chieen̄ ngwugwa me inyọn̄ kan̄, kubọk ngwugwa ewọwọp iriọk, mè ngwugwa akpa, mè ngwugwa miin̄ egwogwook. 10 Mgbọ ge me acha, Erọn môkigwa ngwugwa isasa irọ esuuk me inyọn̄ iko ini eyi ntook ya. Môkisa eje eyi anam esabe igwa ngwugwa ijo inu echi esabe irọ esuuk ya igwa ngwugwa ya. Ikeyi ke ebekigwa ngwugwa yi mgbọ ge me acha me ukot kinyi geelek. Ntook yi ìre inu òkup me mbuban ichit isa inyi Okumugwem.”Ikpoko inwene-ibot
11 Okumugwem onenitumu inyi Mosis ibe, 12 “Mgbọ geelek ebekifuk otu ifuk ebi Ijeren, ene geelek môkikpe ikpoko isasa inwene ibot kan̄ inyi Okumugwem me mgbọ mêkifuk ema, inyi ùrioon̄ ikanikeme ema me mgbọ mêfukbe ema. 13 Ene geelek efukbe iraka môkpe mbubak ikpoko sekeli ge me ikpoko Uwu Mbuban. Me ikpoko Uwu Mbuban, ulobo mbubak sekeli ge ìre akọp gera iba. Mbubak sekeli ge yi ìre inyinyi eyi òkup inyi Okumugwem. 14 Ene geelek efukbe, bene me lek ebi akọp acha iba fo inyọn̄, mônyi Okumugwem inyinyi yi. 15 Ogwu ubọọn̄ ìkponyi iwa igak ogwu ugbọọn̄, ogwu ugbọọn̄ si ìkponyi isiki igak ogwu ubọọn̄. Otutuuk ene ebenyi Okumugwem mbubak sekeli ge ge isasa inwene ibot kiban̄. 16 Mêbọkọ ikpoko inwene-ibot yi me ubọk otutuuk ebi Ijeren, mè isa isun̄ inyi isasa isi ikwaan̄ me Atanga Chinichini. Otitip keyi môre inu ǹkeek me isi Okumugwem, isasa irọ esuuk me ebek ugwem kinyi.”
Okwa igwọk-lek
17 Okumugwem onenitumu inyi Mosis ibe, 18 “Mêsa ekwe irom okwa ge eyi mêkisa itap mun̄ igwọk lek, mè isa si ekwe irom urak kan̄ ere ebekiben ọmọ itoon̄. Mêyik okwa ya me etete Atanga Chinichini mè ntook ngwugwa ya, mè itap mun̄ me emen. 19 Me ere ya ke Erọn mè ebi bọn ebekigwọk ubọk kiban̄ mè ukot kiban̄. 20 Mgbọ geelek ema enin̄be Atanga Chinichini ya, ema ebegwọgwọk lek kiban̄, inyi ema ekakwaan̄. Ikeya si, ema mêdadasi ikigwọk lek kiban̄ sabum ema ebekije isi lek ntook ngwugwa ya isi irọ ikwaan̄ kiban̄, òrere igwagwa ngwugwa eyi ukan̄ inyi Okumugwem. 21 Ema mêkigwọk ubọk kiban̄, inyi ema ekakwaan̄. Eyi môre ikan mgbọ geelek inyi Erọn mè ebi bọn mè bọn bọn kan̄ me ukot geelek.”
Aran̄ ekisa itọkọ ene me ibot
22 Okumugwem onenitumu inyi Mosis ibe, 23 “Owu môtọ owuwa inu òkidun̄u utop olu echi òkirọ inorie itop itap me ere ge, mè igbaan̄ iwọlọ. Owu môtọ mgbe uti mâa eyi mun̄ mun̄ kilo gweregwen, mè uti sinamọn eyi ekọkọk kilo ita, mè anyiaan̄ òkidun̄u utop olu kilo ita, 24 mè kasia kilo gweregwen. Otutuuk chi, ebetọ igọọk me ubọk itọ-inu eyi Uwu Mbuban. Mêtọ si iko aran̄ olifu ini itap me lek. 25 Mêgbaan̄ otutuuk inu chi itap me emen ge isa irọ aran̄ mbuban eyi ekisa itọkọ ene me ibot. Eyi môre atalek aran̄ òtotop olu enenen, eyi atalek ogwu usọ aran̄ utop olu gaalek obokọt irọ. Aran̄ yi ìbore aran̄ itọkọ ene me ibot eyi òkup mbuban. 26 Owu môsa aran̄ yi itọkọ me lek Atanga Chinichini mè lek okop inyan̄a-ibot, 27 mè lek ikasi Fituru Isi Awaji mè otutuuk nroon̄ kan̄ geelek, mè lek ngugọọn̄ mkpukan̄ mè otutuuk nroon̄ òje me lek, mè lek ntook nsensi, 28 mè lek ntook ngwugwa mè otutuuk nroon̄ òje me lek, mè lek okwa mun̄ igwọk-lek mè lek urak kan̄. 29 Owu môgbama lek otutuuk inu chi, inyi ema ere inu òkup me mbuban ichit. Inu geelek òchachak me lek kiban̄ môkana inu òkup me mbuban.
30 “Owu môsa aran̄ ya itọkọ me ibot kè Erọn mè ibot ebi bọn, inyi ema ekup mbuban, mè ekesi ikwaan̄ enyi emi kubọk ebi ngwugwa. 31 Owu môtumu inyi ebi Ijeren ibe, ‘Aran̄ keyi ìbore aran̄ isasa ikitọkọ ene me ibot eyi òkup mbuban isa inyi Okumugwem me ukot kinyi geelek. 32 Ikakpọkpọ ìben aran̄ keyi ìgwook ene me lek. Ikasa si ike ubọk enyi esabe irọ aran̄ keyi ìrọ ofifi aran̄. Aran̄ keyi ìre aran̄ mbuban. Eya orọ, ìmọnọ si ọmọ kubọk aran̄ mbuban. 33 Ene geelek òrọrọ aran̄ utop olu eyi òkup kubọk aran̄ keyi, mè isa iken me lek ogwu ikarege ogwu ngwugwa, ebesasan̄a ene ya isan̄a me otu ifuk ebi kiban̄.’ ”
Nsensi
34 Okumugwem onenitumu inyi Mosis ibe, “Mêtọ inu utop olu echi ekigwen resin mè onicha mè galibanọm mè farankinsens ekawọlọge. Mêtọ ema ìkike, ge ikawa ìgak ge, 35 mè inigbaan̄ ema iwọlọ isa irọ nsensi. Ogwu usọ ikwaan̄ aran̄ utop olu oborọ nsensi ya. Mêtap uchi me lek irọ. Nsensi yi ìbore eyi kpewọlọ, mè ire si eyi òkup mbuban. 36 Mêkọk usini me lek nsensi ya iriọk, mè isa igigen̄e igwook me isi okop inyan̄a-ibot me emen Atanga Chinichini, ere mâkinichichini melek kwun̄. Ere ya môre ere òkup mbuban ichit isa inyi enyi. 37 Ikasa ojelek inu chi ìrọ nsensi geege ìnyi lek kinyi. Nsensi yi ìbore inu òkup mbuban inyi Okumugwem. 38 Ogwu geelek òrọrọ ojelek nsensi keyi inyi lek kan̄, inyi ọmọ ikinọ utop olu ya, ebesasan̄a ene ya isan̄a me otu ifuk ebi kiban̄.”