3 “ ‘Ire ogwu ngwugwa etọkọbe aran̄ me ibot irọ ijo inu, awọ osasa me lek kan̄ itet otutuuk ebi ido, ogwu ngwugwa ya môsa gwun̄ eriembuuk ge eyi kpunube ìroon̄ geege me lek inu me isi Okumugwem kubọk ngwugwa ijo inu. 4 Môsa eriembuuk ya inu me otu isotu Atanga Chinichini me isi Okumugwem, mè initoon̄ ubọk kan̄ me ibot anam ya, mè inigwu anam ya me isi Okumugwem. 5 Ogwu ngwugwa etọkọbe aran̄ me ibot mônenifele usini me lek eje anam ya, mè isa ije inin̄ emen Atanga Chinichini, 6 mè inisa otubọk ilaka-aran̄ kan̄ ijiin̄ me emen eje ya, mè isa inyan mgbọ jaaba me isi Okumugwem me isi ekwut mgban esabe ifieek ikwek Ere Òkup Mbuban Ichit, 7 mè isa usini me lek eje ya igbama me lek iko ini òkup me lek ntook nsensi utop olu eyi òkup me emen Atanga Chinichini me isi Okumugwem. Ogwu ngwugwa ya môneniben otutuuk eje eriembuuk ya eyi òsisik igwook me ebon ntook ngwugwa òkup me isotu Atanga Chinichini.

8 “ ‘Ogwu ngwugwa ya mônenisan̄a otutuuk okpọn̄ òkup me emen anam ngwugwa ijo inu ya, òrere okpọn̄ òchichit inu emen kan̄, mè otutuuk okpọn̄ òkup me lek inu geelek òkup me emen kan̄, 9 mè isan̄a si ichip iba òkup me okwut ebon kan̄ mè okpọn̄ òkup me lek ichip cha. Môsan̄a si ejit anam ya mè akwaan̄ òkakana ichit ejit ya, isa igbaalek ichip kan̄ cha, 10 kubọk ekisan̄a okpọn̄ me emen eriembuuk esabe igwa ngwugwa esuuk. Ogwu ngwugwa ya môneniwọp okpọn̄ cha ikana oduku me inyọn̄ ntook ngwugwa.

11 “ ‘Ire, ogwu ngwugwa ya môkpulu ikpa eriembuuk ya, mè otutuuk ufuk kan̄, mè ibot kan̄, mè ukot kan̄ cha, igbaalek okpu mè ifin emen owot kan̄, 12 òrere otutuuk inu òsisik me lek anam ya, isa isibi ifo udun̄ ere m̀gba-ǹgwele ukan̄ ya isi iwọp, me ere ikakaan̄ge mbuban me lek, ere ekifiin̄ ntọn̄ ònan̄a me inyọn̄ ntook ngwugwa. Ere ya ke ebesa iye isọk ukan̄ iwọp otutuuk nriro anam cha itaka iriọk.

13 “ ‘Ire ke îre otutuuk ido Ijeren orọ ilọ me ikariọọn̄ge, nrọ-nlọ ya olọlọ ema chieen̄, ema enenirọ inu ge me lek inu Okumugwem otọbe ibe ekarọ, mè isa me ikeya irọn̄ ikan, 14 mgbọ yaage nrọ-nlọ kiban̄ okpọkbe mbum, otutuuk ebi ido Ijeren mêsa gwun̄ eriembuuk ge, eyi kpunube ìroon̄ geege me lek, inu me isi Atanga Chinichini inigwa ngwugwa ijo inu. 15 Ebi ugane ama mênenitoon̄ ubọk kiban̄ me ibot eriembuuk ya me isi Okumugwem, mè inigwu eriembuuk ya me isi Okumugwem. 16 Ogwu ngwugwa etọkọbe aran̄ me ibot mônenifele usini me lek eje eriembuuk ya, mè isa ije inin̄ emen Atanga Chinichini ya, 17 mè inisa otubọk ilaka-aran̄ kan̄ ijiin̄ me emen eje ya, mè isa inyan mgbọ jaaba me isi Okumugwem me isi ekwut mgban esabe ifieek ikwek Ere Òkup Mbuban Ichit, 18 mè isa usini me lek eje ya igbama me lek iko ini òkup me lek ntook òkup me isi Okumugwem me emen Atanga Chinichini. Ogwu ngwugwa ya môneniben otutuuk eje eriembuuk ya eyi òsisik igwook me ebon ntook ngwugwa ya òkup me isotu Atanga Chinichini. 19 Ogwu ngwugwa ya mônenisan̄a otutuuk okpọn̄ òkup me emen anam ya isan̄a, mè initap ukan̄ iwọp ikana oduku òkibubaan̄ olu me inyọn̄ ntook ngwugwa. 20 Ogwu ngwugwa ya mônenirọ me lek eriembuuk ya ike îrọbe me lek eriembuuk eyi ngwugwa ijo inu ya. Sa me ikeya, môrọ esuuk me ibot kiban̄, inyi Okumugwem itele inyi ema. 21 Ogwu ngwugwa ya mônenikpulu anam echi òsisik me lek eriembuuk ya isa isibi ifo udun̄ ere m̀gba-ǹgwele ukan̄ ya isi iwọp kubọk ewọpbe adasi eriembuuk ya. Eyi ìre ngwugwa ijo inu me ibot ebi ido.

22 “ ‘Ire ogwu ibot irọ ilọ me ikariọọn̄ge, mè irọ inu ge me lek otutuuk inu Okumugwem otọbe ibe ekarọ, mè isa me ikeya irọn̄ ikan, 23 mè ire ebi ene inirọ inyi ọmọ iriọọn̄ ijo inu eyi îrọbe, ogwu ibot ya môsa orie ebot ge eyi kpunube ìroon̄ geege me lek inu, inyi mêsabe igwa ngwugwa mije nrọ-nlọ kan̄. 24 Ọmọ mônenitoon̄ ubọk kan̄ me ibot ebot ya, mè inigwu ebot ya me ere ekigwu anam ngwugwa ewọwọp iriọk, me isi Okumugwem. Îre ngwugwa ijo inu. 25 Ogwu ngwugwa ya mônenisa otubọk ilaka-aran̄ kan̄ ijiin̄ me emen eje ebot ngwugwa ijo inu ya, mè isa igbama me lek iko ini òkup me lek ntook ngwugwa ya, mè iniben eje eyi òsisik igwook me ebon ntook ngwugwa ya. 26 Ogwu ngwugwa ya môneniwọp okpọn̄ anam ya ikana oduku me inyọn̄ ntook kubọk îwọpbe okpọn̄ anam ngwugwa esuuk, mè isa me ikeya irọ esuuk me ibot ene ya, Okumugwem mônenitele nrọ-nlọ ogwu ibot ya inyi.

27 “ ‘Ire ke îre ogwu ikike ge me etete ebi ido Ijeren orọ ilọ me ikariọọn̄ge, mè irọ inu ge me lek inu cha echi Okumugwem otọbe ibe ekarọ, mè irọn̄ ikan̄, 28 mè ire ebi ene inisa nrọ-nlọ ene ya orọbe ijeen̄ ene ya me isi, ene ya môsa uman ebot ge eyi kpunube ìroon̄ geege me lek inu, inyi mêsabe igwa ngwugwa mije nrọ-nlọ kan̄. 29 Ene ya môtoon̄ ubọk kan̄ me ibot ebot ya eyi ebesa igwa ngwugwa ijo inu ya, mè inigwu ebot ya me ere ekigwa ngwugwa ewọwọp iriọk. 30 Ogwu ngwugwa mônenisa otubọk ilaka-aran̄ kan̄ ijiin̄ me emen eje ebot ngwugwa ijo inu ya, mè isa igbama me lek iko ini òkup me lek ntook ngwugwa ya, mè iniben eje eyi òsisik igwook me ebon ntook ngwugwa ya. 31 Ogwu ngwugwa ya mônenisan̄a otutuuk okpọn̄ me lek anam ya ike ekisan̄a okpọn̄ me lek anam ngwugwa esuuk, mè iniwọp okpọn̄ ya ikana oduku me inyọn̄ ntook ngwugwa inyi Okumugwem kubọk ngwugwa òkidun̄u utop olu. Sa me ikeya, ogwu ngwugwa ya mônenirọ esuuk me ibot ene ya, Okumugwem mônenitele nrọ-nlọ ene ya inyi.

32 “ ‘Ire ogwu ene ya isa arọọn̄ inu isasa inigwa ngwugwa ijo inu kan̄, arọọn̄ ya ìbore uman eyi kpunube ìroon̄ geege me lek. 33 Ene ya môsa ubọk kan̄ itoon̄ me ibot arọọn̄ ya, mè inigwu anam ya me ere ekigwu anam ngwugwa ewọwọp iriọk. 34 Ogwu ngwugwa mônenisa otubọk ilaka-aran̄ kan̄ ijiin̄ me emen eje arọọn̄ ngwugwa ijo inu ya, mè isa igbama me lek iko ini òkup me lek ntook ngwugwa ya, mè iniben eje eyi òsisik igwook me ebon ntook ngwugwa ya. 35 Ogwu ngwugwa ya mônenisan̄a otutuuk okpọn̄ arọọn̄ ya ike ekisan̄a okpọn̄ me lek anam ngwugwa esuuk, mè inigbaan̄ okpọn̄ ya melek anam ngwugwa ukan̄ iwọp ikana oduku òkibubaan̄ olu me inyọn̄ ntook ngwugwa inyi Okumugwem. Sa me ikeya, ogwu ngwugwa ya mônenirọ esuuk me ibot ene ya, Okumugwem mônenitele nrọ-nlọ ene ya inyi.