Mosis ìge ikpa keyi isasa ikpa mfufuk ubọk ebi Ijeren enan̄abe me lek ogoon̄ Saina mege ire mgbọ ema erebe ido Mowabu me agba okwaan̄ Jodan ikibene chieen̄ imun̄ ijọn̄ Kenan, eyi Awaji ochieekbe use isasa inyi ema, me usaba agan̄. Emen ikpa yi si ke ekpa ubọk ema ejijen̄ebe ikana me emen èwê otuuk kè akọp acha ini.

Erieen̄ ikpa yi ìnan̄a me lek ifuk ene eyi Mosis ofukbe ebi Ijeren me agba lek ogoon̄ Saina sabum enijibi inan̄a me ere keya, mè eyi îfukbe si mgbọ ema erebe ido Mowabu me agba okwaan̄ Jodan, sabum enisaba inin̄ ijọn̄ Kenan, òrere mgbọ ukot ebi ugane kiban̄, ebi ìnanan̄a me Ijipiti isibi, ekwaan̄be iraka.

Ikpa yi ìre mfufuk ebi Ijeren, ebi ìkup me ufieek-owot mè ukpook mè ukwook, mè ikikpaka ibot inyi Awaji, mè ikikpaka si inyi Mosis ogwu Awaji ogobobe ibe isa ema ije.

Mfufuk yi ìkijeen̄ ibe ke Awaji ìre ogwu ògbegbe utoon̄-ejit, mè ogwu ìkakisan̄a chieen̄ me lek ebi kan̄ mgbọ geege, ubọk geelek ema erebe ebi kpenye lek, mè ebi unye-ibot. Îjeen̄ si ubọk Mosis osabe ikeke inye me lek Awaji, mè ikeke si inye me lek ebi kiban̄, ubọk geelek ibe ke ìkakikaan̄ ukarajit otutuuk mgbọ.