Otu Ifuk
Adasi ifuk ene efukbe me Ijeren
1
Me adasi usen me òso onyan̄ iba me òso acha iba eyi ebi Ijeren enan̄abe me ido Ijipiti isibi, Okumugwem onenitumu inyi Mosis me emen Atanga Chinichini me emen èwê Saina ibe, 2 “Owu melek Erọn, ìfuk otu ifuk otutuuk ebi Ijeren me otoko me otoko, me owot iman me owot iman. Ìge erieen̄ otutuuk ebirieen̄ me ene me ene, 3 bene me lek ebi akọp acha iba fo inyọn̄, ebi ìbekọt isi akọn̄ me etete ebi Ijeren. Ìfuk ema me irek akọn̄ kiban̄ me urum akọn̄ me urum akọn̄. 4 Me otoko geelek, enyi mêgobo enerieen̄ ge ogwu òrere ogwu ibot me uwu ogwu ute, inyi initap ubọk inyi enyi me lek ifuk ene ya. 5 Erieen̄ ebi enyi ebegobo me otoko me otoko ìre ikeyi:Me otoko kè Ruben,
enyi mêgobo Elisuru,
gwun̄ kè Sediuru;
6 me otoko kè Simiọn,
enyi mêgobo Selumien
gwun̄ kè Surisadai;
7 me otoko kè Juda,
enyi mêgobo Nasiọn
gwun̄ kè Aminadap;
8 me otoko kè Isaka,
enyi mêgobo Netanen
gwun̄ kè Juwari;
9 me otoko kè Jebulọn,
enyi mêgobo Eliabu
gwun̄ kè Elọn.
10 Me uwu kè Josefu, ebi enyi ebegobo ìre ikeyi:
me otoko kè Iferem,
enyi mêgobo Elisama
gwun̄ kè Amiyudu,
me otoko kè Manasi,
enyi mêgobo Gamalien
gwun̄ kè Pedajuru;
11 me otoko kè Benjamin,
enyi mêgobo Abidan
gwun̄ kè Gidioni;
12 me otoko kè Dan,
enyi mêgobo Ayejeri
gwun̄ kè Amisadai;
13 me otoko kè Ase,
enyi mêgobo Pagien,
gwun̄ kè Okaran;
14 me otoko kè Gadi,
enyi mêgobo Eliyasafu,
gwun̄ kè Dewen;
15 me otoko kè Nafitali,
enyi mêgobo Ayira
gwun̄ kè Enan.”
16 Ebibi ere ebi egobobe isibi me etete otutuuk ebi Ijeren. Ema ìre ebi mkpulu me otoko kiban̄, mè ire si ebi ibot me etete urum ebi Ijeren.
17 Mosis mè Erọn enenigwen ebirieen̄ chi ebi egobobe me erieen̄ me erieen̄ iriaak me lek kiban̄, 18 mè inigwen si otutuuk ebi Ijeren ititiin̄ me adasi usen, me òso onyan̄ iba. Ebi Ijeren enenikifuk mfufuk mman kiban̄ me otoko me otoko, me ototun̄ ukan̄ me ototun̄ ukan̄. Ekekige erieen̄ ebi ìsoso akọp acha iba mè iraka me ene me ene, 19 ike Okumugwem onyibe Mosis ida ibe erọ. Sa me ikeya ke Mosis ofuk otu ifuk ebi Ijeren me emen èwê Saina.
20 Me otoko kè Ruben, adasi gwun̄ enerieen̄ kè Ijeren, mîge erieen̄ otutuuk ebirieen̄, bene me lek ebi akọp acha iba fo inyọn̄, òrere ebi ìbekọt isi akọn̄, me ene me ene, me ototun̄ ukan̄ me ototun̄ ukan̄, me owot iman me owot iman. 21 Otutuuk otu ifuk ebirieen̄ ebi otoko kè Ruben ìre akọp obop ini mè obop gweregwen, mè efit go.
22 Me otoko kè Simiọn, mîge erieen̄ otutuuk ebirieen̄, bene me lek ebi akọp acha iba fo inyọn̄, òrere ebi ìbekọt isi akọn̄, me ene me ene, me ototun̄ ukan̄ me ototun̄ ukan̄, me owot iman me owot iman. 23 Otutuuk otu ifuk ebirieen̄ ebi otoko kè Simiọn ìre akọp obop ene go mè obop onaan̄ge, me efit ita.
24 Me otoko kè Gadi, mîge erieen̄ otutuuk ebirieen̄, bene me lek ebi akọp acha iba fo inyọn̄, òrere ebi ìbekọt isi akọn̄, me ene me ene, me ototun̄ ukan̄ me ototun̄ ukan̄, me owot iman me owot iman. 25 Otutuuk otu ifuk ebirieen̄ ebi otoko kè Gadi ìre akọp obop ini mè obop go, mè efit gweregwen mè akọp go.
26 Me otoko kè Juda, mîge erieen̄ otutuuk ebirieen̄, bene me lek ebi akọp acha iba fo inyọn̄, òrere ebi ìbekọt isi akọn̄, me ene me ene, me ototun̄ ukan̄ me ototun̄ ukan̄, me owot iman me owot iman. 27 Otutuuk otu ifuk ebirieen̄ ebi otoko kè Juda ìre akọp obop jaaba mè obop ini, mè efit gweregwen.
28 Me otoko kè Isaka, mîge erieen̄ otutuuk ebirieen̄, bene me lek ebi akọp acha iba fo inyọn̄, òrere ebi ìbekọt isi akọn̄, me ene me ene, me ototun̄ ukan̄ me ototun̄ ukan̄, me owot iman me owot iman. 29 Otutuuk otu ifuk ebirieen̄ ebi otoko kè Isaka ìre akọp obop go mè obop ini, mè efit ini.
30 Me otoko kè Jebulọn, mîge erieen̄ otutuuk ebirieen̄, bene me lek ebi akọp acha iba fo inyọn̄, òrere ebi ìbekọt isi akọn̄, me ene me ene, me ototun̄ ukan̄ me ototun̄ ukan̄, me owot iman me owot iman. 31 Otutuuk otu ifuk ebirieen̄ ebi otoko kè Jebulọn ìre akọp obop go mè obop jaaba, mè efit ini.
32 Mîfuk bọn ebirieen̄ otoko kè Josefu. Me otoko kè Iferem, mîge erieen̄ otutuuk ebirieen̄, bene me lek ebi akọp acha iba fo inyọn̄, òrere ebi ìbekọt isi akọn̄, me ene me ene, me ototun̄ ukan̄ me ototun̄ ukan̄, me owot iman me owot iman. 33 Otutuuk otu ifuk ebirieen̄ ebi otoko kè Iferem ìre akọp obop ini, mè efit go.
34 Me otoko kè Manasi, mîge erieen̄ otutuuk ebirieen̄, bene me lek ebi akọp acha iba fo inyọn̄, òrere ebi ìbekọt isi akọn̄, me ene me ene, me ototun̄ ukan̄ me ototun̄ ukan̄, me owot iman me owot iman. 35 Otutuuk otu ifuk ebirieen̄ ebi otoko kè Manasi ìre akọp obop ita mè obop iba, mè efit iba.
36 Me otoko kè Benjamin, mîge erieen̄ otutuuk ebirieen̄, bene me lek ebi akọp acha iba fo inyọn̄, òrere ebi ìbekọt isi akọn̄, me ene me ene, me ototun̄ ukan̄ me ototun̄ ukan̄, me owot iman me owot iman. 37 Otutuuk otu ifuk ebirieen̄ ebi otoko kè Benjamin ìre akọp obop ita mè obop go, mè efit ini.
38 Me otoko kè Dan, mîge erieen̄ otutuuk ebirieen̄, bene me lek ebi akọp acha iba fo inyọn̄, òrere ebi ìbekọt isi akọn̄, me ene me ene, me ototun̄ ukan̄ me ototun̄ ukan̄, me owot iman me owot iman. 39 Otutuuk otu ifuk ebirieen̄ ebi otoko kè Dan ìre akọp obop gweregwen mè obop iba, mè efit jaaba.
40 Me otoko kè Ase, mîge erieen̄ otutuuk ebirieen̄, bene me lek ebi akọp acha iba fo inyọn̄, òrere ebi ìbekọt isi akọn̄, me ene me ene, me ototun̄ ukan̄ me ototun̄ ukan̄, me owot iman me owot iman. 41 Otutuuk otu ifuk ebirieen̄ ebi otoko kè Ase ìre akọp obop ini mè obop ge, mè efit go.
42 Me otoko kè Nafitali, mîge erieen̄ otutuuk ebirieen̄, bene me lek ebi akọp acha iba fo inyọn̄, òrere ebi ìbekọt isi akọn̄, me ene me ene, me ototun̄ ukan̄ me ototun̄ ukan̄, me owot iman me owot iman. 43 Otutuuk otu ifuk ebirieen̄ ebi otoko kè Nafitali ìre akọp obop go mè obop ita, mè efit ini.
44 Echichi ore otu ifuk ebirieen̄ ebi Mosis mè Erọn, mè akọp mè ene iba ebi ìrere ebi otuchieen̄ otoko kiban̄ ge ge efukbe. 45 Ema mîfuk otutuuk ebirieen̄ ebi Ijeren me otoko kiban̄, bene me lek ebi akọp acha iba fo inyọn̄, òrere ebi ìbekọt isi akọn̄ me Ijeren. 46 Otutuuk otu ifuk ebirieen̄ ebi Ijeren onenigbaan̄ isibi efit obop gweregwen mè obop ita, mè efit go mè akọp go.
47 Ire, kpefuk ebi otoko kè Libai igbaalek otu ifuk ebi Ijeren efukbe cha. 48 Mije, Okumugwem îwuuk lek itumu inyi Mosis ibe, 49 “Kafuk ebi otoko kè Libai. Kafuk ema ìtap me otu ifuk ebi Ijeren kebilọ. 50 Kpan̄asi ikeya, owu môsun̄ ebi otoko kè Libai me otuchieen̄ ikwaan̄ ikpọkpọ chieen̄ me lek Akpatan̄ Mbuban eyi Inyan̄a-ibot,a mè otutuuk nroon̄ ikwaan̄ kan̄, mè otutuuk inu geelek òje me lek. Îre ema ebekiben Akpatan̄ Mbuban ya mè otutuuk nroon̄ ikwaan̄ kan̄, mè ikisi ikwaan̄ me lek Akpatan̄ ya si. Ema ebekiluk ikana Akpatan̄ ya okokop. 51 Mgbọ geelek enyi ebenan̄a me ere ge ije isi ofifi ere, îre ebi otoko kè Libai ebekikpọk Akpatan̄ Mbuban ya. Mgbọ enyi isije ire aya ere enyi ebekup itap efuuk, îre ema si ebekiben Akpatan̄ Mbuban ya iyaka igwuun̄. Ene geelek ogwu ìkare ogwu otoko kè Libai ichak ubọk me lek Akpatan̄ Mbuban ya, ekpakpan̄. 52 Otutuuk ebi Ijeren geelek mêkigwugwuun̄ uwu ọfọ kiban̄ me otoko me otoko, kpa otoko mè egop kiban̄, me ere ema mêgbaan̄be igwugwuun̄ uwu ọfọ kiban̄. 53 Ebi otoko kè Libai ebekiluk ikana Akpatan̄ Mbuban eyi Inyan̄a-ibot ya okokop, me ikibem Akpatan̄ ya, inyi ebi ofifi otoko ekaje ìgbet lek, mè ìrọ inyi unaan̄-ejit n̄a irọn̄ ikeme ebi Ijeren. Îre ebi otoko kè Libai ebekikpọ chieen̄ me lek Akpatan̄ Mbuban ya.” 54 Ebi Ijeren erọrọ otutuuk inu cha ike Okumugwem onyibe Mosis ida ibe erọ, kpesan̄a, kpetap.