Inu òkup me emen ikpa yi ìre ikọ Mosis otumube inyi ebi Ijeren, me ibot me ibot, me mgbọ ema ejebe ije kiban̄ inire agba okwaan̄ Jodan, sabum ema enisaba okwaan̄ ya itoon̄ me inyọn̄ ijọn̄ Kenan eyi Awaji ochieekbe use isasa inyi ema. Ikeya ke ege me ibebene ikpa yi ibe, “Echichi ìre ikọ Mosis otumube inyi otutuuk ebi ido Ijeren me usaba agan̄ okwaan̄ Jodan me agan̄ mbum-ura, me emen èwê me iteke ijọn̄ Araba.”

Mosis ìtumu ikọ chi isasa ikpọk ikeek ebi Ijeren inu Awaji orọbe mè Ikan Awaji onyibe, mè isa itap ema efuuk me owot, ibe ema esa ugwem kiban̄ enyi Awaji.

Emen ikpa yi ke Mosis okpọk ikpa ubọk Okumugwem osabe isan̄a ebi Ijeren isibi me Ijipiti, mè ubọk ema enyebe ibot. Ìkpa inu yi inyi ayaya ebi Ijeren, ebi emanbe me emen èwê, mije, ebi ìsasa chieen̄ imun̄ inu cha mîkwaan̄ isan̄a me emen èwê.

Îkpọk inyi si ema Ikan cha echi òkup me ikpa Isisibi, mè Libitikọs, mè Otu Ifuk. Bak me lek keyi ke egwen ikpa yi Ikan Òso Mgbọ Iba.