Ubọk ebesa ifaka inu enyibe Okumugwem isibi
27
Okumugwem onenitumu inyi Mosis ibe 2 itumu inyi ebi Ijeren ibe, “Ire ikaan̄ ogwu inyan̄a ibot òsibi esese ibe ọmọ môyaka ene itap me ubọk Okumugwem, ikpoko mêkpebe isa inwene ibot ene ya ìre ikeyi: 3 Me ibot ogwu enerieen̄ òsoso akọp acha iba ire lek ogwu akọp acha gweregwen, ikpoko mêkpebe ìbore akọp ikpoko alata okuket go, igọọk me ubọk itọ-inu eyi Uwu Mbuban. 4 Me ibot ogwu enenwaan̄ ogwu otu ifuk acha yaage, ebekpe akọp ikpoko alata okuket ita. 5 Me ibot gwun̄ enerieen̄ òsoso acha go isi ire lek ogwu akọp acha iba, ebekpe akọp ikpoko alata okuket iba. Me ibot gwun̄ enenwaan̄ ogwu otu ifuk acha yaage, ebekpe akọp ikpoko alata okuket. 6 Me ibot sọn̄ gwun̄ enerieen̄ òsoso onyan̄ ge isi ire lek ogwu acha go, ebekpe ikpoko alata okuket go. Me ibot sọn̄ gwun̄ enenwaan̄ ogwu otu ifuk acha yaage, ebekpe ikpoko alata okuket ita. 7 Me ibot enerieen̄ òraraka akọp acha gweregwen, ebekpe akọp mè ikpoko alata okuket go. Me ibot enenwaan̄ ogwu otu ifuk acha yaage, ebekpe akọp ikpoko alata okuket. 8 Ire ogwu ònyanyan̄a ibot ya ìkakọt ìkpe otu ifuk ikpoko esun̄be ya mije irek ugbọọri kan̄, mêsa ọmọ inu me isi ogwu ngwugwa, inyi ogwu ngwugwa ikpọ ene ya, mè iriọọn̄ otu ifuk ikpoko ubọk kan̄ obokọt isoon̄.9 “Ire ikaan̄ ogwu inyan̄a ibot ibe ọmọ mônyi Okumugwem anam eyi mêkọtbe isa igwa ngwugwa inyi Okumugwem, anam ya geelek îkana inu òkup me mbuban. 10 Kpebekọt isa ofifi anam inu me useen̄ anam ya, ìbore anam îchieekbe ya ke ìbosa inu. Kpebekọkọt isa si ofifi anam ininwene anam ya, mè ìre isasa eyi ònwọnwọn igak ininwene, mè ìyaka ire isasa eyi òfefieek igak ininwene. Ire isa ofifi anam inu ibeninwene anam ya, eyi ebesa ininwene ya melek eyi ebenwenwene ya, ema anam iba cha ekup me mbuban. 11 Ire anam ene ya obosa inirọ inyan̄a-ibot kan̄ iso ìre anam òkaan̄ mbuban me lek, eyi kpebekọt isa igwa ngwugwa inyi Okumugwem, mêsa anam ya inu me isi ogwu ngwugwa. 12 Ogwu ngwugwa mônenikpọ ubọk anam ya okupbe, mè ìre înwọn lek mè ìre ìkanwọn lek, mè inidọmọ iriọọn̄ otu ifuk ikpoko anam ya oboben. Inu geelek îtumube, ikeya si ke ìbokup. 13 Ire ogwukaan̄ anam ya iweek ifafaka anam ya isibi, otu ewe ogwu ngwugwa ya otumube ke ene ya obokpe, mè itap si irek ge me irek go isọkọ me lek.
14 “Ire ene ifaka uwu kan̄ itap me ubọk Okumugwem, inyi ikup me mbuban inyi Okumugwem, ogwu ngwugwa mônikpọ ikeke uwu ya, ubọk înwọnbe mè ubọk ikanwọnge, mè initumu ewe kan̄ ikpọ me lek. Inu geelek ogwu ngwugwa otumube, ikeya ke ìbokup. 15 Ire ogwu òfafaka uwu kan̄ itap me ubọk Okumugwem iyaka iniweek ifafaka uwu ya isibi, ene ya ìbokpe otu ewe ogwu ngwugwa ya otumube, mè iyaka initap si irek ge me irek go isọkọ me lek, mè ibọkọ uwu kan̄.
16 “Ire ikaan̄ ogwu iweek ifafaka ijọn̄ uko ebi uwu enyibe ọmọ itap me ubọk Okumugwem, mêto ewe ijọn̄ ya igọọk me ikeke mfut mêkọtbe iwop me inyọn̄ ijọn̄ ya. Ebekpe akọp ikpoko alata okuket go me ibot ijọn̄ òboben efit iko akpa balì iba mè akọp. 17 Ire ene ya ìfaka ijọn̄ ya itap me ubọk Okumugwem me acha ijọk utelelek, otu ewe geelek ewuukbe lek isun̄ me ibot ijọn̄ ya sabum mgbọ ya, eya obokeke. 18 Ire, ire ogwukaan̄ ijọn̄ ya ìfaka ijọn̄ kan̄ ya itap me ubọk Okumugwem mgbọ acha ijọk utelelek orakabe, ogwu ngwugwa môfuk otu ifuk acha òsisik sabum ofifi acha ijọk utelelek, mè igele otu ewe ijọn̄ ya isiki ikpọ me ikeya. 19 Ire ogwu òfafaka ijọn̄ ya itap me ubọk Okumugwem iyaka iniweek ifafaka ijọn̄ ya isibi, ene ya môkpe otu ewe ijọn̄ ya, mè ikpe si irek ge me irek go isọkọ, mè ibọkọ ijọn̄ kan̄. 20 Ire, ire ogwu ònyinyi Okumugwem ijọn̄ ya ìkafaka ijọn̄ ya ìsibi, mè ìre enyanyam ijọn̄ ya inyi ofifi ene, kpebeyaka ifaka ijọn̄ ya isibi igak ikeya. 21 Mgbọ mêtelebe ijọn̄ ya me acha ijọk utelelek, ijọn̄ ya môkana ijọn̄ òkup me mbuban inyi Okumugwem, mè ire ijọn̄ esun̄be esese inyi ebi ngwugwa kubọk ìrot kiban̄.
22 “Ire ene ifaka ijọn̄ eyi îlepbe, eyi ikarege ijọn̄ îkaan̄be me ìrot, itap me ubọk Okumugwem, 23 ogwu ngwugwa môdọmọ otu ewe ijọn̄ ya igọọk me otu ifuk acha òsisik sabum ofifi acha ijọk utelelek. Ogwu ònyinyi ijọn̄ ya mônenikpe ewe ijọn̄ ya me usen yaage înyibe ijọn̄ ya, mije, ijọn̄ ya ìre inyinyi òkup mbuban inyi Okumugwem. 24 Acha ijọk utelelek isinire, mêneniyaka ijọn̄ ya inyi ogwu elepbe me ubọk, ogwu òkakaan̄ ijọn̄ ya me ìrot. 25 Otu ewe inu geelek ebi ngwugwa ebetumu, ebekitumu igọọk me lek ubọk itọ-inu eyi Uwu Mbuban, òrere akọp gera iba me ibot ikpoko alata okuket ge.a
26 “Ene geege ìkpofaka adasi gwun̄ eyi anam omanbe itap me ubọk Okumugwem, mije, otutuuk adasi gwun̄ eyi anam geelek omanbe ìre eyi Okumugwem, mè ìre adasi gwun̄ eriembuuk mè ìre adasi gwun̄ arọọn̄. Îre Okumugwem okaan̄. 27 Ire ene isa adasi gwun̄ anam eyi òkaan̄ mbuban me lek inu, ogwu òsasa anam ya inu ìbokpe otu ewe anam ya, mè itap irek ge me irek go isọkọ me lek, isa ifaka anam ya isibi. Ire, ire kpefaka anam ya isibi, enyanyam anam ya me otu ewe kan̄, ekatoon̄ urot me lek.
28 “Ire, inu geelek ene okaan̄be, mè isan̄a isun̄ esese kubọk inu ngwugwa inyi Okumugwem, mè ìre ene, mè ìre anam, mè ìre ijọn̄ îkaan̄be me ìrot, kpebenyanyam, kpebefafaka si isibi, mije, otutuuk inu geelek ene osan̄abe isun̄ esese ikeya ìre inu òkup mbuban ichit inyi Okumugwem.
29 “Ene geelek esan̄abe isun̄ esese kubọk inu oniin̄ akọn̄, kpebefaka ene ya isibi, ebekpakpan̄.
30 “Irek ge me akọp irek eyi mfut uko geelek erọkọbe me ijọn̄, mè ìre eyi mfut uti geelek, otutuuk cha ìkup inyi Okumugwem. Irek ge me akọp irek ìre inu òkup mbuban inyi Okumugwem. 31 Ene geelek òweweek ifafaka irek ge me akọp irek inu kan̄ isibi, ene ya môkpe irek ge me irek go itoon̄ me inyọn̄. 32 Irek ge me akọp irek me lek otutuuk eriembuuk mè ìre me lek otutuuk arọọn̄ mè ebot, òrere òso akọp anam òjeje iraka me irak uti ogwu òkpukpo anam, mgbọ îkifuk anam kan̄, otutuuk cha ìre inu òkup me mbuban inyi Okumugwem. 33 Ogwukaan̄ anam cha ìkpobogobo isi òso akọp anam cha, mè ìre echi ònwọnwọn lek mè ìyaka ire echi òfefieek lek. Ìkponwenwene si anam geege. Ire inwene anam, eyi înwenebe mè eyi îsabe inwene, iba cha ìbokup me mbuban. Kpunu ifafaka geege isibi.”
34 Echichi ore ikọ Okumugwem otọbe, echi înyibe Mosis ida me inyọn̄ ogoon̄ Saina ibe isa isi itọ si ikeya inyi otutuuk ebi Ijeren.