Inu òkisibi ene me lek mè ikichaka ene mbuban me lek
1. Ikan òkup inyi ebirieen̄
15
Okumugwem onenitumu inyi Mosis mè Erọn ibe 2 etumu enyi ebi Ijeren ibe, “Ogwu enerieen̄ geelek inu òkup nke nke okisibi me lek ebirieen̄ kan̄, inu ya îkaan̄ mbuban me lek. 3 Inu ya îchaka ene ya mbuban me lek, mè ìre inu ya ìkpọkpọ ikigbuk isibi ọmọ me lek, mè ìre ìyayaka ichat. Mbuban îchaka ene ya me lek.4 “Mkpilaak geelek eyi ogwu enerieen̄ ya olaakbe me inyọn̄, mbuban îchaka me lek. Inu geelek si ene ya osikibe ikweek me inyọn̄, mbuban îchaka me lek. 5 Ene geelek òchachak ubọk me lek mkpilaak ogwu enerieen̄ ya, ene ya môgwọk ofọnti kan̄, mè iken mun̄, mè ikaan̄ mbuban me lek mege ire ikakwun̄. 6 Ene geelek òsisiki ikweek me inyọn̄ inu geelek ogwu enerieen̄ nke nke inu okisibi me lek osikibe ikweek me inyọn̄, ene ya ìbogwọgwọk ofọnti kan̄, mè iken mun̄, mè ikaan̄ mbuban me lek mege ire ikakwun̄.
7 “Ogwu geelek òchachak ubọk me akpalek ogwu enerieen̄ ya ogwu nke nke inu okisibi me lek, ene ya môgwọk ofọnti kan̄, mè iken mun̄, mè ikaan̄ mbuban me lek mege ire ikakwun̄.
8 “Ire ogwu enerieen̄ inu okisibi me lek icho ataak igwook me lek ogwu ìkakaan̄ mbuban me lek, ogwu îchobe ataak igwook me lek ya môgwọk ofọnti kan̄, mè iken mun̄, mè ikaan̄ mbuban me lek mege ire ikakwun̄.
9 “Inu geelek ogwu inu okisibi me lek ya osikibe ikweek me inyọn̄ mgbọ îkikọp me inyọn̄ anam ije, mbuban îchaka me lek inu keya. 10 Ene geelek òchachak ubọk me lek inu geelek ogwu enerieen̄ inu okisibi me lek osikibe ikweek me inyọn̄ môkaan̄ mbuban me lek mege ire ikakwun̄. Ogwu geelek òbeben inu cha geelek, ene ya môgwọk ofọnti kan̄, mè iken mun̄, mè ikaan̄ mbuban me lek mege ire ikakwun̄.
11 “Ire ogwu enerieen̄ inu okisibi me lek ichak ubọk me lek ene me ikagwọkge ubọk, ogwu îchakbe ubọk me lek ya môgwọk ofọnti kan̄, mè iken mun̄, mè ikaan̄ mbuban me lek mege ire ikakwun̄. 12 Otin̄ ibat geelek ogwu enerieen̄ inu okisibi me lek ochakbe ubọk me lek, ebebubum. Okwa uti geelek ogwu ene ya ochakbe ubọk me lek, ebesasa mun̄ igwọk lek.
13 “Ire orukan̄ ya ita me lek ene ya, mè mbuban ya isita ọmọ me lek, ene ya môfuk usen jaaba bene me usen orukan̄ ya otabe, mè inigwọk ofọnti kan̄, mè inisa ata mudim iken mun̄, mbuban mônenita ọmọ me lek. 14 Me òso usen jeeta, ogwu enerieen̄ ya orukan̄ otabe me lek mônenitet ekerekwukwu iba, mè ìre elesia iba, mè inu me isi Okumugwem, me otu isotu Atanga Chinichini, mè inisa ema inyi ogwu ngwugwa. 15 Ogwu ngwugwa mônenisa ge me lek igwa ngwugwa ijo inu, mè inisa eyi keyilọ igwa ngwugwa ewọwọp iriọk, isa irọ esuuk me ibot ogwu ene ya me isi Okumugwem mije inu ya òsisibi ọmọ me lek.
16 “Ire uyọ isibi me lek ogwu enerieen̄ me mfat, ogwu enerieen̄ ya môken mun̄, mè igwọk otutuuk lek kan̄ iso, mè ikaan̄ mbuban me lek mege ire ikakwun̄. 17 Otutuuk ekwut mè ofọnti mè ìre ikpa anam eyi uyọ ya orebe lek, ebegwọgwọk me mun̄. Isigwọk me mun̄ isan̄a, ekwut ya mè ìre ikpa anam ya môkaan̄ mbuban me lek mege ire ikakwun̄. 18 Ire enerieen̄ ilaak enenwaan̄, uyọ osisibi, ema mêken mun̄, mè ikaan̄ mbuban me lek mege ire ikakwun̄.
2. Ikan òkup inyi ebibaan̄
19 “Mgbọ geelek ogwu enenwaan̄ okupbe me irek ebibaan̄, ogwu enenwaan̄ ya môkaan̄ orieen̄ me lek usen jaaba. Me ike mgbọ ya, ene geelek òchachak ọmọ ubọk me lek môkaan̄ orieen̄ me lek mege ire ikakwun̄. 20 Me ike mgbọ ya si, inu geelek ogwu enenwaan̄ ya olaakbe me inyọn̄ mè inu geelek îsikibe ikweek me inyọn̄, mbuban îchaka me lek inu ya. 21 Ene geelek òchachak ubọk me lek mkpilaak kan̄ môgwọk ofọnti kan̄, mè iken mun̄, mè ikaan̄ mbuban me lek ire ikakwun̄. 22 Ene geelek òchachak ubọk me lek inu ogwu enenwaan̄ ya osikibe ikweek me inyọn̄, ene ya môgwọk ofọnti kan̄, mè iken mun̄, mè ikaan̄ mbuban me lek mege ire ikakwun̄. 23 Mè ìre mkpilaak ogwu enenwaan̄ ya olaakbe me inyọn̄, mè ìre ofifi inu geelek îsikibe ikweek me inyọn̄ ke ene ochak ubọk me lek, ene ya môkaan̄ mbuban me lek mege ire ikakwun̄.
24 “Ire enerieen̄ ilaak ogwu enenwaan̄ ya òkup me irek ebibaan̄, mè eje iken ọmọ, ogwu enerieen̄ ya môkaan̄ si orieen̄ me lek usen jaaba. Mkpilaak geelek eyi ogwu enerieen̄ ya môlaakbe me inyọn̄, orieen̄ òwa me lek.
25 “Ire enenwaan̄ imun̄ inu ebibaan̄ owuwa usen me ugeen̄ mgbọ, mè ìre ìmumun̄ inu ebibaan̄ iwa iraka otu ifuk usen îkimun̄ mgbọ îkikup me irek ebibaan̄, ogwu enenwaan̄ ya môkaan̄ orieen̄ me lek otutuuk usen cha, kubọk îkikaan̄ me mgbọ îkikup me irek ebibaan̄. 26 Mkpilaak geelek îlaakbe me inyọn̄ me otutuuk usen îkimun̄ inu ebibaan̄ ya, mè inu geelek îkweekbe irek me inyọn̄ me usen cha îkaan̄ orieen̄ me lek, kubọk îkikup mgbọ îkikup me irek ebibaan̄. 27 Ene geelek òchachak ubọk me lek inu chi îkaan̄ mbuban me lek. Ene ya môgwọk ofọnti kan̄, mè iken si mun̄, mè ikaan̄ mbuban me lek mege ire ikakwun̄.
28 “Mgbọ eje ya òkisibi ogwu enenwaan̄ me lek isifieek, ọmọ môfuk usen jaaba itoon̄ me inyọn̄. Usen cha isiraka, mbuban mônenita ọmọ me lek. 29 Me òso usen jeeta kan̄, ogwu enenwaan̄ ya môtet ekerekwukwu iba, mè ìre asabọn elesia iba, mè isa ijet ogwu ngwugwa me isotu Atanga Chinichini. 30 Ogwu ngwugwa mônenisa ge igwa ngwugwa ijo inu, mè isa ge keyilọ igwa ngwugwa ewọwọp iriọk, mè isa me ikeya irọ esuuk me ibot ogwu enenwaan̄ ya me isi Okumugwem, mije inu ebibaan̄ ya òchachaka ọmọ mbuban me lek.
31 “Îre sa me ikeyi ke enyi mêsan̄a ebi Ijeren isan̄a me lek inu òbokirọ inyi mbuban ichaka ema me lek, inyi ema ekachaka mbuban me lek Akpatan̄ Mbuban n̄a eyi òkup me etete kiban̄, mè ìsa me ikeya ìkwaan̄ ìta me emen mbuban kiban̄.”
32 Echichi ore ikan òbokikpulu enerieen̄ geelek nke nke inu okisibi me lek ebirieen̄ kan̄, mè ogwu òkakaan̄ orieen̄ mije uyọ okisibi me lek me mfat, 33 mè ikikpulu si ogwu enenwaan̄ òkup me irek ebibaan̄, mè ogwu enerieen̄ mè ìyaka ire ogwu enenwaan̄ ogwu inu okinan̄a me lek isibi, mè ogwu enerieen̄ òlalaak ogwu enenwaan̄ òkaan̄ mbuban me lek.