Ebi otoko kè Libai
3
Eyi ìre mfufuk owot iman kè Erọn mè Mosis me mgbọ Okumugwem otumube ikọ melek kè Mosis me inyọn̄ ogoon̄ Saina. 2 Bọn ebirieen̄ kè Erọn ìre Nadabu, adasi gwun̄ kan̄, mè Abiyu mè Elieja mè Itama. 3 Îre bọn kè Erọn, ebi ngwugwa chi, ebi ebakbe erieen̄ ke etọkọ aran̄ me ibot mè ifaka ikwaan̄ itap me ubọk, inyi ema enere ebi ngwugwa. 4 Nadabu mè Abiyu enenikwaan̄ me isi Okumugwem, mije ema esabe esese chieen̄ ukan̄ inu me isi Okumugwem me emen èwê Saina. Nadabu mè Abiyu kpekaan̄ bọn ebirieen̄ geege. Eya orọ, îre Elieja mè Itama gaalek, ebi ìsisik me ugwem, egọọk Erọn nte kiban̄ igbaan̄ isi ikwaan̄ kubọk ebi ngwugwa me ukot kè nte kiban̄.5 Okumugwem onenitumu inyi Mosis ibe, 6 “Gwen ebi otoko kè Libai sibi me isi kè Erọn ogwu ngwugwa, inyi ema ekesi ikwaan̄ enyi ọmọ, 7 mè ekerọ inu geelek înyibe ida ibe erọ, mè inu geelek ògbegbe irọrọ me ibot otutuuk ebi ido Ijeren me isi Atanga Chinichini, mè ekesi otutuuk ikwaan̄ òkukup isisi me Akpatan̄ Mbuban. 8 Ema si ebekikpọ chieen̄ me lek otutuuk nroon̄ geelek ekisa isi ikwaan̄ me Atanga Chinichini, mè ikikeke me isi ikirọ otutuuk inu geelek eberọ me ibot ebi Ijeren, sa me isisi otutuuk ikwaan̄ geelek me Akpatan̄ Mbuban. 9 Kana otutuuk ebi otoko kè Libai tap me ubọk kè Erọn mè ebi bọn. Esasan̄a ebi otoko kè Libai me etete otutuuk ebi Ijeren isa inyi Erọn. 10 Owu môsan̄a Erọn mè bọn ebirieen̄ kan̄ isun̄ esese, inyi ekesi ikwaan̄ ebi ngwugwa. Ilọ me lek kiban̄, ire ofifi ene ije igbet lek ikwaan̄ ya, ebekpakpan̄.”
11 Okumugwem onenitumu si inyi Mosis ibe, 12 “Kpọ, emi me lek n̄a si, m̀mọnọ ebi otoko kè Libai isibi me etete ebi Ijeren me irek otutuuk adasi gwun̄ geelek òchili owot ogwu enenwaan̄ Ijeren. Otutuuk ebi otoko kè Libai ìre echi n̄a, 13 mije, gwun̄ uchili-owot geelek ìre eyi n̄a. Me usen mkpan̄be otutuuk bọn uchili-owot geelek me ido Ijipiti, ǹsasan̄a otutuuk bọn uchili-owot geelek me Ijeren isun̄ esese inyi lek n̄a, ibene me lek bọn uchili-owot echi ebilene ire lek bọn uchili-owot echi anam. Ema otutuuk ìre echi n̄a. Emi nre Okumugwem.”
14 Okumugwem onenitumu si inyi Mosis me emen èwê Saina ibe, 15 “Mgbọ keyi, fuk otu ifuk otutuuk ebi otoko kè Libai, me owot iman me owot iman, me ototun̄ ukan̄ me ototun̄ ukan̄. Fuk otutuuk ebirieen̄, bene me lek bọn onyan̄ ge fo inyọn̄.” 16 Mosis ofufuk ebi otoko kè Libai kubọk Okumugwem onyibe ọmọ ida. 17 Erieen̄ bọn ebirieen̄ kè Libai ìre Gasiọn mè Koyat mè Merari. 18 Erieen̄ bọn kè Gasiọn me ototun̄ ukan̄ me ototun̄ ukan̄ ìre Libini mè Simei. 19 Erieen̄ bọn kè Koyat me ototun̄ ukan̄ me ototun̄ ukan̄ ìre Amiram mè Ijiyari mè Eburọn mè Ujiyen. 20 Erieen̄ bọn kè Merari me ototun̄ ukan̄ me ototun̄ ukan̄ ìre Mali mè Musi. Ebibi ere bọn otoko kè Libai me ototun̄ ukan̄ me ototun̄ ukan̄.
21 Ebi owot iman kè Gasiọn ìre ototun̄ ukan̄ kè Libini mè ototun̄ ukan̄ kè Simei. Ebibi ere ebi owot iman kè Gasiọn. 22 Otu ifuk ebirieen̄ kiban̄ ike efukbe, ibene lek me nsabọn onyan̄ ge, ìre obop jaaba mè efit go. 23 Ebi owot iman kè Gasiọn ebekigwugwuun̄ uwu ọfọ kiban̄ me udun̄ Akpatan̄ Mbuban, me agan̄ ichep-ura. 24 Ogwu ibot owot iman kè Gasiọn ìre Eliyasafu gwun̄ kè Layen. 25 Ikwaan̄ ebi owot iman kè Gasiọn me lek Atanga Chinichini ìre ikpọkpọ chieen̄ me lek Akpatan̄ ya me lek kan̄ melek uwu ọfọ kan̄, mè ochichit kan̄, mè ekwut isotu Atanga Chinichini, 26 mè otutuuk ekwut ukwek ekisa igbaka ikana oyet egep Akpatan̄ Mbuban, mè ekwut isotu oyet egep ya òkakana Akpatan̄ ya me lek kan̄ melek ntook ngwugwa, okokop, mè olik ekwut isotu ya, mè otutuuk ikwaan̄ geelek òje me lek nroon̄ ikwaan̄ kechi.
27 Ebi owot iman kè Koyat ìre ototun̄ ukan̄ kè Amiram mè ototun̄ ukan̄ kè Ijiyari mè ototun̄ ukan̄ kè Eburọn mè ototun̄ ukan̄ kè Ujiyen. Ebibi ere ebi owot iman kè Koyat. 28 Otu ifuk ebirieen̄ owot iman kè Koyat, ibene me lek nsabọn onyan̄ ge, ìre obop jeeta, mè efit gweregwen. Îre ebibi ekikpọ chieen̄ me lek Ere Mbuban. 29 Ebi owot iman kè Koyat ebekigwugwuun̄ uwu ọfọ kiban̄ me agba lek Akpatan̄ Mbuban, me agan̄ osiki. 30 Ogwu ibot owot iman kè Koyat ìre Elisafan gwun̄ kè Ujiyen. 31 Îre ebi owot iman kè Koyat ebekikpọ chieen̄ me lek okop inyan̄a-ibot mè ikasi Fituru Isi Awaji mè ngugọọn̄ mkpukan̄ mè ntook nsensi mè ntook ngwugwa mè otutuuk nroon̄ geelek ekisa isi ikwaan̄ me Ere Mbuban, mè ekwut mgban ekisa ifieek ikwek Ere Òkup Mbuban Ichit, mè otutuuk ikwaan̄ geelek òje me lek ekwut mgban ya. 32 Ogwu òkikpulu otutuuk ebi ibot otoko kè Libai ìre Elieja gwun̄ kè Erọn ogwu ngwugwa. Ọmọ ore ogwu ibot otutuuk ebi ìkikpọ chieen̄ me lek ikwaan̄ me Ere Mbuban.
33 Ebi owot iman kè Merari ìre ebi ototun̄ ukan̄ kè Mali mè ebi ototun̄ ukan̄ kè Musi. Ebibi ere ebi owot iman kè Merari. 34 Otu ifuk ebirieen̄ owot iman kè Merari, ibene me lek nsabọn onyan̄ ge, ìre obop gweregwen mè efit iba. 35 Ogwu ibot owot iman kè Merari ìre Suriyen gwun̄ kè Abiyali. Ebi owot iman kè Merari ebekigwugwuun̄ uwu ọfọ kiban̄ me agba lek Akpatan̄ Mbuban me agan̄ inyọn̄. 36 Ebi owot iman kè Merari ke esan̄a ibe ekekpọ chieen̄ me lek otutuuk agbasi òkup me lek Akpatan̄ Mbuban mè mgbugban òje me lek mè atà kiban̄ mè urak atà cha mè otutuuk nroon̄ ikwaan̄ kiban̄ geelek, mè otutuuk ikwaan̄ òje me lek agbasi cha. 37 Ema si ebekikpọ chieen̄ me lek otutuuk atà òkup me lek ogọ ewakbe ikana oyet egep Akpatan̄ Mbuban ya okokop mè urak atà cha geelek mè otutuuk okpọ̀kọ kiban̄ mè otutuuk olik kiban̄.
38 Ebi ìbekigwugwuun̄ uwu ọfọ kiban̄ me isi Akpatan̄ Mbuban me agan̄ mbum-ura ìre Mosis mè Erọn mè otutuuk bọn ebirieen̄ kè Erọn. Îre ema ebekikpọ chieen̄ me lek Akpatan̄ Mbuban ya, mè ikikpọ si chieen̄ me lek ikwaan̄ geelek me ibot ebi Ijeren. Ofifi ene geelek òjeje igbet lek Akpatan̄ Mbuban ya, ebekpakpan̄.
39 Otutuuk otu ifuk ebirieen̄ otoko kè Libai, ebi Mosis melek Erọn efukbe, ike Okumugwem onyibe ema ida ibe efuk me ototun̄ ukan̄ me ototun̄ ukan̄, ibene me lek nsabọn onyan̄ ge, ìre akọp obop iba mè obop iba.
40 Okumugwem onenitumu inyi Mosis ibe, “Fuk otu ifuk adasi bọn ebirieen̄ geelek me Ijeren, bene me lek nsabọn onyan̄ ge, mè ge erieen̄ kiban̄ otutuuk tap me emen ikpa. 41 San̄a ebi otoko kè Libai sun̄ esese nyi emi me irek otutuuk adasi bọn ebi Ijeren, mè san̄a si otutuuk adasi bọn anam ebi otoko kè Libai sun̄ esese nyi emi me irek otutuuk adasi bọn anam ebi Ijeren. Emi nre Okumugwem.”
42 Mosis ofufuk otutuuk adasi bọn ebirieen̄ ebi Ijeren, mè ige erieen̄ kiban̄ itap me ikpa ike Okumugwem onyibe ọmọ ida. 43 Otu ifuk otutuuk adasi bọn ebirieen̄ ebi Ijeren, ibene me lek nsabọn onyan̄ ge, onenisibi akọp obop iba mè obop iba, mè efit iba, mè akọp jaaba mè ita.
44 Okumugwem onenitumu si inyi Mosis ibe, 45 “San̄a ebi otoko kè Libai sun̄ esese nyi emi me irek otutuuk adasi bọn ebirieen̄ ebi Ijeren, mè san̄a si anam ebi otoko kè Libai sun̄ esese nyi emi me irek anam otutuuk ebi Ijeren, inyi ebi otoko kè Libai enekup ọkpọkpọ enyi emi. Emi nre Okumugwem. 46 Adasi bọn ebirieen̄ otutuuk ebi Ijeren mîsa efit ene iba mè akọp jaaba mè ita iwa igak adasi bọn ebirieen̄ ebi otoko kè Libai. Sabum ebefaka efit ebirieen̄ iba mè akọp jaaba mè ita chi isibi, 47 mêsa ikpoko alata okuket go ininwene ibot ene ge ge, igọọk me ubọk itọ-inu me Uwu Mbuban, òrere akọp gera iba me ibot ikpoko alata okuket ge.a 48 Owu osibọkọ ikpoko esabe ininwene ibot adasi bọn ebi Ijeren ebi ìwawa iraka cha, sa kana nyi Erọn mè ebi bọn.” 49 Ikeya si ke Mosis obọkọ ikpoko esabe ininwene ibot otu ifuk adasi bọn ebirieen̄ ebi Ijeren esabe iwa igak adasi bọn ebirieen̄ ebi otoko kè Libai. 50 Ikpoko Mosis obọkọbe me ibot adasi bọn ebirieen̄ ebi Ijeren cha onenisibi obop ikpoko alata okuket, mè efit ita, mè akọp gweregwen mè go igọọk me ubọk itọ-inu eyi Uwu Mbuban. 51 Mosis onenikana ikpoko cha inyi Erọn mè ebi bọn ebirieen̄, ike Okumugwem onyibe ọmọ ida.