13
“Ire ogwu nriran ge, mè ìyaka ire ogwu òkimumun̄ ilaak, ikana isibi me etete kinyi, mè inikijeen̄ owuwa uyeke uyeke inu-ijejeen̄, mè ikirọ si owuwa ikwaan̄ ukechieen̄, 2 mè inu-ijejeen̄ cha mè ikwaan̄ ukechieen̄ cha inirọ iso me chieen̄ kinyi, mè ire ogwu ene ya inisa mije keya ileke enyi ibe enyi enegọọk ọmọ esi eriaak ofifi awaji echi enyi kperarak iriọọn̄, mè esi etọbọ ebum enyi awaji cha, 3 ikagban̄ utọn̄ ìnyi ogwu nriran ya mè ìre ogwu òkimumun̄ ilaak ya. Mije, Okumugwem Awaji kinyi ìkisa me ikeya iroon̄ enyi ikpọ, inyi ọmọ iriọọn̄ mè ìre enyi mîmun̄ ọmọ me chieen̄ me otutuuk ejit kinyi, mè otutuuk ibot ejit kinyi. 4 Îre Okumugwem Awaji kinyi gaalek ke enyi ebekigọọk. Îre ọmọ gaalek si ke enyi ebekimin mè ikitet ukpook me lek. Ikọ îtọbe ke enyi ebekirọ, ida kan̄ ke enyi ebekigban̄ utọn̄ me lek. Îre ọmọ ke enyi ebekitọbọ ebum inyi, ọmọ si ke enyi ebetet ikaan̄ inye. 5 Ebekpakpan̄ ogwu nriran ya, mè ìre ogwu òmumun̄ ilaak ya. Mije, ìkijeen̄ enyi ibe ekpaka ibot enyi Okumugwem Awaji kinyi, ogwu òsasan̄a enyi isibi me Ijipiti, mè inyan̄a enyi isibi me irek usun̄. Ene ogwu òkup ikeya ìkiweek ibe enyi etele oniin̄ Okumugwem Awaji kinyi onyibe ida ibe enyi ekegọọk. Eya orọ, ìsan̄a ijo inu òkup ikeya ìsan̄a me etete kinyi.6 “Ìrere ngwan̄ kwun̄ enerieen̄, mè ìre gwun̄ kwun̄ enerieen̄, mè ìre gwun̄ kwun̄ enenwaan̄, mè ìre nwa kwun̄ ogwu owu omabe enenen, mè ìre unene ibot ejit kwun̄, onween̄ lek initumu inyi owu me nlelet, ibe owu ònu mè esi etọbọ ebum enyi ofifi awaji echi enyi mè ebi nte nte kinyi kperiọọn̄ inu ofolek, 7 òrere awaji cha echi ebi ido ìluluk ikana enyi cha ekitọbọ ebum inyi, mè ìre ebi ido ìgbegbet enyi ere me lek, mè ìre ebi ìjọjọn̄ọ enyi ere me lek, ibene me ijọn̄ yi agan̄ ge isi ire òta kan̄, 8 ikachieek ìnyi ogwu òkup ikeya! Ikanyinyi ọmọ utọn̄. Ikatoto si ọmọ nsan kubọk ge! Ikatele ibe ene ya ifo, ikachichit si ogwu òkup ikeya! 9 Ìkpakpan̄ ene ya! Owu ogwu ene ya oweekbe inenileke, owu obodasi imọnọ ewuuk itọbọ ọmọ, sabum ebi ofifi ife mênigọọk itọbọ ọmọ ikpan̄. 10 Ìsa ewuuk ìtọbọ ene ya ìkpan̄, mije, ene ya ìweek irọrọ inyi enyi etele Okumugwem Awaji kinyi, ogwu òsasan̄a enyi isibi me usun̄ me ido Ijipiti. 11 Ebi Ijeren mêneninọ inu ya òrọrọ, ukpook môneninin̄ emen kiban̄. Sa me ikeya, kpunu ene geege me etete kinyi òboyaka ikpọk ikọt irọ mbet ijo inu keya.
12 “Ire enyi inọ ibe, me emen ama ge me etete ama cha Okumugwem Awaji kinyi obosa inyi enyi ebọkọ esak, 13 ke îkaan̄ ebi ijo ife ìkup me emen ama ya ikileke ebi ama ya ibe enu, mè ema enesi etọbọ ebum enyi ofifi awaji echi enyi kperarak iriọọn̄ inu ofolek, 14 ìnin̄ emen ikọ ya, mè ìwọlọ ìkpọ, mè ìriọọn̄ ubọk ìweek atikọ ìriọọn̄. Isinikpọk mbum ibe ke ikọ ya ìre atikọ, ke mîrọ mbuban inu ya me etete kinyi, 15 ìkpakpan̄ otutuuk ebi ama ya ìsan̄a kpai me otu oge akọn̄, mè ìchep ama ya ìsan̄a kubọk inu oniin̄ akọn̄, mè ìjijaka otutuuk ama ya ìsan̄a, anam ikasik. 16 Ìkpulu otutuuk nroon̄ uwu ama ya ìsibi ìgwook me oyet ile kiban̄, mè ìtap ukan̄ ìwọp otutuuk ìkọọk, mè ìwọp si otutuuk ama ya ìgbaalek, kubọk inu esabe igwa ngwugwa ewọwọp iriọk inyi Okumugwem Awaji kinyi. Ama ya mônenikana ǹrioon̄, mè ibia ikeya isi ire mgbọ geelek, kpebekọt iyaka ikpọk inama. 17 Inu geelek ebejijijaka kubọk inu oniin̄ akọn̄, ikachak ubọk me lek ìmọnọ ìsun̄ ìnyi lek kinyi. Ire enyi ijijaka inu cha, Okumugwem ìkpoyaka inaan̄ ejit uyok uyok me lek kinyi. Môyaka inito enyi nsan, mè ikaan̄ njijin me lek kinyi, mè irọ inyi enyi emumana me otu ifuk, kubọk înyan̄abe ibot inyi ebi nte nte kinyi ibe ke ọmọ môrọ. 18 Mije, enyi mîgban̄ utọn̄ me ida Okumugwem Awaji kinyi, mè ikirọ otutuuk ikọ îtọbe, echi emi nkinyi enyi cherekeyi, mè ikirọ si inu òtatat me chieen̄ kan̄.