2 “Ire ikaan̄ ene ge, mè ìre enerieen̄ mè ìre enenwaan̄, me ama ile ge me lek ama ile cha Okumugwem Awaji kinyi onyibe enyi, òkirọ inu òfefieek me chieen̄ Okumugwem Awaji kinyi, mè isa me ikeya ififila inyan̄a-ibot kan̄, 3 mè isi ikitọbọ ebum inyi ofifi awaji, mè ikitọbọ ibot inyi ema, mè ìre ìkisi itọbọ ibot inyi ura, mè ìre onyan̄, mè ìyaka ire ofifi inu geelek òkup me isinyọn̄, òrere inu emi nkanyige enyi ida ibe erọ, 4 mè ire esa ikọ òkup ikeya inu me isi kinyi, ìwọlọ emen ikọ ya ìjaan̄ lek. Ire enyi imun̄ ibe ke ikọ ya ìre atikọ, ke ene ya îrọ òchichaka inu òkup ikeya me ido Ijeren, 5 ìtet ogwu enerieen̄ mè ìre ogwu enenwaan̄ òrọrọ nlilọ inu ya ìsa ìsibi ìsi me otunchit ama ile kinyi, mè ìsa ewuuk ìtọbọ ọmọ ìkpan̄, inyi ene ya ikwu inan̄a. 6 Ire, îre me otu ebi ata-ikọ iba mè ìre ita ke ebesa ikpan̄ ene. Kpebekpan̄ ene geege, ire ke îre ogwu ata-ikọ ge gaalek osibi inu inikeke ata-ikọ ikeme ene ya. 7 Ebi ata-ikọ cha ere ebi ìbedasi imọnọ ewuuk itọbọ ogwu ene ya, sabum ebi ofifi ene mênigọọk itọbọ ene ya ikpan̄. Sa me ikeya, enyi mênenisan̄a ijo inu òkup ikeya isan̄a me etete kinyi.

8 “Ire ikaan̄ oyerebet òyọyọt igak enyi isisibi, òrere oyerebet ògbaan̄ me lek ibot ikọ òtatap okput me emen ama ile kinyi, kubọk oyerebet mkpan̄-ene, mè ìre echi òyọyọt irọriọọn̄ unen ene, mè ìre echi esakbe ene ijo unan me lek me ìbak, enyi mêsa oyerebet òkup ikeya isi me ere Okumugwem Awaji kinyi môgobobe ibe ekemin Erieen̄ kan̄. 9 Me ere ya, enyi mêniben oyerebet cha ikpa ijeen̄ ebi ngwugwa, òrere ebi otoko kè Libai, mè ikpa ijeen̄ ogwu ibot oyerebet òkup me ikwaan̄ me ike mgbọ ya. Ema mênenitap chieen̄ ikpọ emen oyerebet ya, mè ininyi enyi otu oyerebet. 10 Otu oyerebet geelek ema ekupbe me ere Okumugwem môgobobe inyi Erieen̄ kan̄ ya ifieek, mè inikpa inyi enyi, enyi mêgbala chieen̄ imun̄ ibe ke enyi mîrọ otutuuk ida oyerebet kiban̄ ya iso. 11 Ikan geelek mè otu oyerebet geelek ema mênyibe enyi, eya ke enyi ebegọọk, ikasan̄a, ikatap. 12 Ogwu ikpọ ogwu ibot oyerebet ya chieen̄ isiki, mè ìre ogwu ngwugwa ogwu òkup me irek ikisi ikwaan̄ inyi Okumugwem Awaji kinyi, mè ìkagban̄ utọn̄ ìnyi ema, ekpakpan̄ ene ya, inyi esa me ikeya esan̄a ijo inu òkup ikeya esan̄a me Ijeren. 13 Otutuuk ebi Ijeren mênọ, mè itet ukpook. Kpebeyaka ikpọk ikikpọ ebi ibot chi chieen̄ isiki ofifi.

14 “Mgbọ enyi isinin̄ inyọn̄ ijọn̄ ya eyi Okumugwem Awaji kinyi obonyi enyi, mè ibọkọ isak, mè inin̄ iluk, enyi mênenibene ikikeek ibe, ‘Eji enesan̄a ogwu ubọọn̄, ogwu òbokikpulu eji, kubọk otutuuk ebi ido ìluluk ikana eji erọbe.’ 15 Ìmun̄ ibe ke îre ogwu Okumugwem Awaji kinyi ogobobe ke enyi ebesa ito ubọọn̄. Ogwu ubọọn̄ kinyi ìbonan̄a me etete ebi ngwan̄ kinyi. Enyi kpebesa ogwu ichen, ogwu ikarege ogwu Ijeren ngwan̄ kinyi, ito ubọọn̄ inyi lek kinyi. 16 Ògak ge, ogwu ubọọn̄ kinyi ìkpore ogwu òbokigbala owuwa inyinya akọn̄ isun̄ inyi lek kan̄. Ìkporaria si ebi Ijeren igwu ikom isi Ijipiti, inyi ọmọ isa me ikeya ikaan̄ si ogbogbo inyinya akọn̄ isọkọ me lek echi îkaan̄be. Mije, Okumugwem îwuuk lek igban enyi ibe enyi ekalululuk ìgwu ìkana ìfo Ijipiti ofifi. 17 Ogwu ubọọn̄ kinyi ìkpokaan̄ ogbogbo nwa, inyi ejit kan̄ ikanan̄a me lek Okumugwem. Ọmọ ìkpore si ogwu ulọk ebek ikpoko, òkima igbagbala ogbogbo ikpoko alata okuket mè ikpoko alata araran̄ ijot uwu.

18 “Ọmọ isinene inyọn̄ ogboon̄ ubọọn̄ kan̄, mè ibene ikikpulu, isi ibọkọ ikpa ikan keyi me ubọk ebi ngwugwa, òrere ebi otoko kè Libai, mè ikpọ me lek ige ofifi isa isun̄ inyi lek kan̄. 19 Ikpa ya mônenikup melek kan̄, inyi ọmọ môkifuk otutuuk usen geelek me ugwem kan̄. Sa me ikeya, ọmọ môkọt ikween̄ ikekimin Okumugwem Awaji kan̄, mè ikigbala chieen̄ isun̄ ikọ geelek egebe me emen Ikan yi, mè otutuuk orọmijọn̄ chi, mè ikirọ si ema otutuuk. 20 Eyi môrọ inyi ọmọ ikamọnọ lek kan̄ kubọk ogwu ònwọnwọn igak ebi ngwan̄ kan̄, mè irọ si ibe ikatele Ikan Okumugwem, mè ìsi ìkirọ inu òneme ọmọ. Sa me ikeya, ọmọ môre ogwu ubọọn̄ ijọn̄ọ acha me etete ebi Ijeren, ọmọ mè bọn owot iman kan̄.