Ogwu ikagbege ibe ikup me etete ebi eyi Okumugwem
23
“Ogwu enerieen̄ geelek ekpukpukube ichip okpok kan̄, mè ìre ogwu efieekbe lek ebirieen̄ kan̄ isan̄a, ene ya ìkpokup me ogbo ntitiin̄ ebi eyi Okumugwem.2 “Gwun̄ ugan ìkpokup me otu ifuk ebi eyi Okumugwem. Otutuuk owot iman kan̄ si kpegbe ikukup me etete ebi eyi Okumugwem, mege isi ire òso akọp ukot.
3 “Ogwu Amọn, mè ìre ogwu Mowabu, ìkpokup me otu ifuk ebi eyi Okumugwem. Bọn owot iman kiban̄ si kpebekup, mege isi ire òso akọp ukot. Mege ire mgbọ geelek, ebi Amọn mè ebi Mowabu kpebekup me otu ifuk ebi eyi Okumugwem. 4 Mije, mgbọ enyi enan̄abe me Ijipiti isibi, ema kpesa inorie mè mudim isibi inichichini enyi me oniin̄. Ògak ge, mije ema esibe ama Petọ eyi òkup me Aram Nayarayim,a isi igwen Balam gwun̄ kè Beyọ, me ọkọ, ibe inifieek otu inyi enyi. 5 Ire, Okumugwem Awaji kinyi ìkaweek inọnọ ufieek-otu kè Balam. Kpan̄asi ikeya, inwenwene ufieek-otu kè Balam ikana ugbana inyi enyi. Mije, Okumugwem Awaji kinyi îmun̄ enyi me chieen̄. 6 Me otutuuk ugwem kinyi kubọk ido, mege ire mgbọ geelek, ikarọ inu geege eyi òbosa esuuk mè ibọbọọn̄ ubọọn̄ ijet ebi Amọn mè ebi Mowabu.
7 “Ikakaan̄ njijọ ejit me lek ebi Edọm, mije, ema ìre ngwan̄ kinyi. Ikakaan̄ si njijọ ejit me lek ebi Ijipiti, mije, enyi mîluk kubọk ebi ichen me ido kiban̄. 8 Bọn owot kiban̄ ebi òso ukot ita mêkọt ikup me etete ebi eyi Okumugwem.
Ikan ofolek mbuban inu me orieen̄ akọn̄
9 “Enyi isibejibi akọn̄ isibi isi itim me lek ebi ochicha kinyi, ìda lek ìbọkọ me lek òchichaka inu geelek me emen orieen̄ akọn̄ kinyi. 10 Ikaan̄ ogwu enerieen̄ òmumun̄ ilaak ubọk uyọ osibibe ọmọ me lek, ene ya ìkayaka ìtana. Egwe isiwele, ene ya inan̄a me orieen̄ akọn̄ ya isibi isi ikup me oyet, ikayaka ìkup me emen orieen̄ akọn̄ ya. 11 Me agan̄ ikakwun̄, ene ya iken mun̄ igwọk lek kan̄. Ura isinim, ene ya môkọt igwu ikom ika inu emen orieen̄ akọn̄ ya.
12 “Ìgobo ere ge ìda ìbọkọ me lek orieen̄ akọn̄ kinyi, ere enyi ebekisi inwun ukot. Ere keya ke enyi ebekisi mgbọ îkupbe me uyọt. 13 Ìkaan̄ urọk ìgbaalek nroon̄ ikwaan̄ kinyi. Enyi isisibi isi inwun ukot, enyi mêsasa urọk ya irọkọ udọn̄. Enyi isirọ isan̄a, mêchichit ifin kinyi me emen udọn̄ ya. 14 Okumugwem Awaji kinyi ọmọ òwa me etete kinyi okijijen̄e ikana emen orieen̄ akọn̄ kinyi, ikibem enyi, mè ikikana ebi ochicha kinyi itap enyi me ubọk, inyi enyi eketim ekpan̄ ema. Eya orọ, ìkisun̄ emen orieen̄ akọn̄ kinyi me mbuban, inyi Okumugwem ikamun̄ ten̄ten̄ inu geege me emen orieen̄ akọn̄ kinyi, mè ìsa me lek keya ìsan̄a enyi ukot me udun̄.
Esese chieen̄ ikan
15 “Ikaan̄ ogwu usun̄ òtetele ogwu ute-uwu, mè ilibi initap ibot me ubọk kinyi, ikayaka ọmọ ìkana ìtap me ubọk ogwu nte uwu kan̄. 16 Ìtele inyi igọọk enyi iluk, me ere geelek òneme ọmọ me ama ile kinyi geelek îgobobe. Ikatutuku ọmọ.
17 “Ogwu Ijeren geege ìkpore ogwu òje oyet isi yọk, mè ìre enenwaan̄ mè ìre enerieen̄. 18 Kpebesa ikpoko ogwu enenwaan̄ òje oyet, mè ìre ogwu enerieen̄ òje oyet, obọmbe me ukot mbọm kan̄ ya inu me Uwu Mbuban Okumugwem Awaji kinyi isa inirọ inyan̄a-ibot iso. Mije, ema ene iba cha ìre mbuban inu me isi Okumugwem Awaji kinyi.
19 “Ogwu ifọọk inu inyi ogwu Ijeren ogbo kan̄, ene ya ikado oruru ìtoon̄ me inyọn̄, mè ìre ikpoko mè ìre inorie, mè ìyaka ire ofifi inu geelek echi mêkọtbe ifuk oruru itoon̄ me inyọn̄. 20 Ogwu ifọọk inu geelek inyi ogwu ichen, ene ya môkọt ibọkọ oruru ibot inu ya. Ire, ìkpobọkọ oruru me ibot inu geelek îfọọkbe inyi ogwu Ijeren ogbo kan̄, inyi Okumugwem Awaji kinyi igbana enyi me otutuuk inu enyi mêtetbe ubọk me lek irọ me inyọn̄ ijọn̄ ya ere enyi ebesi inin̄ ibọkọ isak.
21 “Ire owu onyan̄a ibot inyi Okumugwem Awaji kwun̄, gwat lek si rọ inyan̄a-ibot ya so, mije, Okumugwem Awaji kwun̄ ìkpolọlọ inenido owu inyan̄a-ibot ya. Eya mônenikana ijo inu me ibot kwun̄. 22 Ire, ire owu otet otu kwun̄ ikaan̄, òkanyan̄a ibot, ikan ijo inu geege ìkabọp owu. 23 Inu geelek osabe otu kwun̄ itumu isibi, gbala chieen̄ mun̄ ibe ke orọ inu ya iso, mije, îre owu gaalek osa otu kwun̄ inyan̄a ibot ya inyi Okumugwem Awaji kwun̄. Kpetetet owu me unye ubọk.