Ogwu igwu ikom igọọk Okumugwem, mônwọn melek kan̄
30
“Mgbọ otutuuk ugbana chi mè ufieek-otu chi echi ntumube isibi me isi kinyi isininu inyi enyi, mè ejit kinyi isinigwu ikom me emen otutuuk ido cha ere Okumugwem Awaji kinyi môyiyalabe enyi isi igwook, 2 mè ire enyi mè bọn kinyi isa me otutuuk ejit kinyi mè otutuuk ibot ejit kinyi igwu ikom igọọk Okumugwem Awaji kinyi, mè ikigban̄ utọn̄ me ida kan̄ igọọk me lek otutuuk ikan chi nkinyi enyi chereyi, 3 Okumugwem Awaji kinyi mônenikpulu enyi ebi etetbe me akọn̄ isa ika, mè ikaan̄ ata ejit me lek kinyi. Môkpulu enyi inan̄a me etete ebi ido geelek, ere îyiyalabe enyi isi igwook, isa igwu ikom ika inu ido kinyi. 4 Ikerere okputut linyọn̄ ke Okumugwem Awaji kinyi orieen̄ enyi isi igon ikam, ìboninin̄ ere cha geelek inikpulu enyi isa ika inu. 5 Ìbosasa enyi ika inu me inyọn̄ ijọn̄ ya înyibe ebi nte nte kinyi, inyi enyi ebọkọ esak, mè inu ije ijaan̄ me lek kinyi, mè enyi emumana, mè ewa egak ebi nte nte kinyi. 6 Okumugwem Awaji kinyi môchili enyi ejit, mè ichili si ejit bọn owot iman kinyi, inyi enyi ema ọmọ me otutuuk ejit kinyi, mè otutuuk ibot ejit kinyi, mè esa me ikeya egat ugwem. 7 Okumugwem Awaji kinyi môda otutuuk ufieek-otu chi igwook me lek ebi ochicha kinyi mè ebi oriara kinyi cha ebi ìkililaba enyi. 8 Enyi mênenikpọk ikigban̄ utọn̄ me ida Okumugwem, mè ikirọ otutuuk ikọ îtọbe ibe erọ, kubọk nkinyi enyi ida cherekeyi. 9 Okumugwem Awaji kinyi mônenitap manamana me inu geelek enyi mêchakbe ubọk me lek irọ, mè itap manamana me owot iman kinyi, mè anam kinyi, mè irọ inyi mfut uko kinyi itibi ijaan̄ enenen. Mije, Okumugwem mônikpọk ikibele ejit me lek kinyi, kubọk îbelebe ejit me lek ebi nte nte kinyi, 10 ire enyi mêgban̄ utọn̄ me ida Okumugwem Awaji kinyi, mè igbala chieen̄ ikirọ otutuuk ikọ geelek îtọbe ibe enyi erọ, mè ikisun̄ orọmijọn̄ kan̄ echi egebe me emen Ikpa Ikan yi, mè inigwu ikom inu me lek Okumugwem Awaji kinyi me otutuuk ejit kinyi, mè otutuuk ibot ejit kinyi.Igogobo ugwem mè ìre mkpa
11 “Ikan yi nkinyi enyi cherekeyi ìkamama lek ìyọt me lek kinyi, ìkagagak si inu ebekọt irọ. 12 Ìkare emen inyọn̄ ke îkup, eyi enyi mênikido ibe, ‘Ìre ekene obonene isi emen inyọn̄ isi isa ijet eji, inyi eji enọ, mè erọ?’ 13 Ìkarere si usaba okwaan̄ ke ikup, eyi enyi mênikido ibe, ‘Ìre ekene obosaba okwaan̄ isi isa ijet eji, inyi eji enọ, mè erọ?’ 14 In̄-in̄, ikọ yi îkup igbet enyi lek enenen. Ìkup me emen otu kinyi, mè emen ejit kinyi, inyi enyi mêkọtbe ikirọ.
15 “Ìkpọ, me cherekeyi, ǹkito ugwem melek otutuuk ata inu geelek, mè mkpa melek otutuuk ijo inu geelek, me isi kinyi. Ìkpọ ge ìgobo! 16 Mije, ǹkinyi enyi ida cherekeyi ibe enyi emun̄ Okumugwem Awaji kinyi me chieen̄, mè ekeje me oniin̄ kan̄, mè egbala chieen̄ ekerọ ikọ geelek îtọbe, mè ekesun̄ orọmijọn̄ kan̄ mè ikan kan̄. Ire enyi ikirọ ikeya, enyi mêfuk ugwem mè imumana iwa me otu ifuk. Okumugwem Awaji kinyi mônenigbana enyi me inyọn̄ ijọn̄ ya enyi ebesi inin̄ ibọkọ isak. 17 Ire, ire enyi inwene ejit, mè kpegban̄ utọn̄, mè isi ikililiin̄ ikana igọọk ofifi awaji, mè ikitọbọ ebum inyi ema, 18 ǹkitumu inyi enyi cherekeyi ibe ke ebejijijaka enyi isan̄a kpai. Enyi kpebefuk ugwem me inyọn̄ ijọn̄ ya enyi ebesaba okwaan̄ Jodan isi inin̄ ibọkọ isak.
19 “Eya orọ, cherekeyi, ǹkigwen inyọn̄ mè ijọn̄, ibe enekeke ata-ikọ ekeme enyi, ibe ke nto ugwem mè mkpa me isi kinyi, mè ito si ugbana mè ufieek-otu. Mgbọ keyi, ǹkibe enyi, ìgobo ugwem, inyi enyi mè bọn kinyi mêgat ugwem. 20 Ìma Okumugwem Awaji kinyi. Ìkigban̄ utọn̄ me ida kan̄, mè ìtet ọmọ ìnye, mije, Okumugwem, ọmọ ore ugwem kinyi. Ọmọ si oborọ inyi enyi eluk ujọn̄ọ ugwem me inyọn̄ ijọn̄ ya eyi înyan̄abe ibot inyi ebi nte nte kinyi Ebereyam, mè Ajiki, mè Jekọp, ibe ke ọmọ môsa inyi ema.”