3 Josuwa mè otutuuk ebi akọn̄ enenibem lek inenene isi akọn̄ me Ai. Ire, sabum ema enije, Josuwa ogogobo akọp obop ebi akọn̄ ita ebi ìrọriọọn̄ ukot akọn̄ ijaan̄, mè iria ema isibi me eririeen̄, 4 mè inyi ema ida ibe, “Ìkpọ, îre enyi ebesi ikpa mbin akọn̄ ikana ama ya me agan̄ udun̄ ama. Ikakup ìjọn̄ọ ere enenen me lek ama ya. Ire, ìkup me mbem-lek, enyi otutuuk ene. 5 Emi melek ebi ìsisik mêjibi akọn̄ inin̄ ama ya me agan̄ isi ama. Ema isimun̄ eji, mè ijibi akọn̄ igọọk eji, kubọk ema erọbe me adasi mgbọ ya, eji mêlilibi. 6 Ema mênenikigọọk eji mege eji mêsabe ema ilibi ikwala isibi itele ama ya, mije, ema mêkeek ibe ke eji ekilim inan̄a me lek kiban̄ kubọk eji eliliin̄be me adasi mgbọ ya. Mgbọ eji isikilibi, 7 enyi mêneninan̄a me ere enyi elileekbe ya isibi, mè inibọkọ ama ya. Mije, Okumugwem Awaji kinyi môyaka ama ya itap enyi me ubọk. 8 Enyi isibọkọ ama ya, ìtap ukan̄ ìwọp. Ike Okumugwem otumube, ikeya ke enyi eberọ. Ìkpọ, emi nra inyi enyi ida.”

9 Josuwa oneniria akọp obop ene ita cha isibi. Ema esisi ilileek me agan̄ ichep-ura me lek ama Ai, me etete Beten mè Ai. Ire, Josuwa ogọgọọk ikup me ere m̀gba-ǹgwele ukan̄ me eririeen̄ usen ya.

10 Me ata otu ewelegwe ofit iwele kan̄, Josuwa onanan̄a ikeke, mè inititiin̄ ebi akọn̄ ebi ìsisik. Ọmọ mè ebi ugane Ijeren ejeje me isi, mè isa ebi akọn̄ cha inene isi Ai. 11 Josuwa mè otutuuk urum akọn̄ melek kan̄ enenene igbet ama Ai ya, me agan̄ isi ama ya, mè inigba ikup me agan̄ inyọn̄ me lek ama ya. Iteke ijọn̄ okwek ema me lek ama ya. 12 Josuwa oneniria inu òso obop ebi akọn̄ go ibe esi elileek me etete Beten melek Ai me agan̄ ichep-ura me lek Ai. 13 Mgbọ eneen̄be ebi akọn̄ cha isun̄ me irek isan̄a, isi urum akọn̄ ya me lek kan̄ okup me agan̄ inyọn̄ me lek ama ya, sà sọntiik urum akọn̄ okup me agan̄ ichep-ura. Otutuuk eririeen̄ ya, Josuwa okekijijen̄e me emen iteke ya ikikpọ ubọk ere ya okupbe.

14 Mgbọ ogwu ubọọn̄ Ai omun̄be ebi akọn̄ kè Josuwa cha, ọmọ mè ebirieen̄ ama ya egwagwat lek inan̄a ikeke me ata otu ewelegwe, mè ije isibi isi ikweek ebi Ijeren, ibesi itim akọn̄ me lek kiban̄. Ogwu ubọọn̄ ya mè otutuuk ebi kan̄ esisibi isi ere ge ema ewuukbe lek itumu ifieek, me ere òkikpọ Araba. Ire, ọmọ ogwu ubọọn̄ ya ìkariọọn̄ ibe ke ebi Ijeren mîkpa mbin akọn̄ ikana ọmọ me agan̄ udun̄ ama. 15 Mgbọ akọn̄ obenebe, Josuwa mè otutuuk ebi akọn̄ ebi Ijeren melek kan̄ efafiaan̄ irọ kubọk akọn̄ ìkigagak ema, mè ikililiin̄ ifo agan̄ emen èwê. 16 Ebi Ai imumun̄ ikeya, egwegween̄ otutuuk ebirieen̄ ama kiban̄ isibi isa igọọk ebi Ijeren. Ikeya ke ema egọọk Josuwa abayaage, ebi Ijeren eleleke ema ijọn̄ọ ere me lek ama kiban̄. 17 Enerieen̄ geege ìkasik me emen ama Ai mè ìre me Beten ogwu ikanan̄age ìsibi ìsi ìgọọk ebi Ijeren. Ikeya ke ema enan̄a isibi ikigọọk ebi Ijeren, mè ijuuk ama kiban̄ itele obook, kpunu ogwu òkibem.

18 Okumugwem onenitumu inyi Josuwa ibe, “Nyana otunwa òkup me ubọk kwun̄ fo inyọn̄ sa da agan̄ Ai, mije, îre ubọk kwun̄ ke mbayaka ama ya itap.” Josuwa onyanyana otunwa òkup ọmọ me ubọk ifo inyọn̄ ida agan̄ ama Ai. 19 Mgbọ yaage Josuwa onyanabe otunwa ya, ukpa ebi akọn̄ ebi ìlilileek cha, enanan̄a isibi wap me ere ema elileekbe, mè inin̄ ama ya, mè ibọkọ ama ya. Mgbọ yaage, ema ekekitap ukan̄ iwọp ama ya.

20 Mgbọ ebirieen̄ ebi Ai cha ekanabe chieen̄ me udun̄, ema eyaka inimun̄ oduku ukan̄ etapbe iwọp ama ya okibumu ifo inyọn̄. Efuuk olelet ema, kpunu agan̄ geege ema ebeyaka ilibi inin̄. Ebi Ijeren ebi mgbọ ìkililibi ifo emen èwê ya egwugwu isi ikom iyaka inikililaba ebi Ai ebi mgbọ ìkililaba ema. 21 Mgbọ Josuwa mè ebi Ijeren emun̄be ibe ke ebi kiban̄ ebi ìlilileek cha mîbọkọ ama ya, ke oduku ukan̄ etapbe iwọp ama ya okibumu ifo inyọn̄, ema egwugwu ikom inin̄ lek ebi Ai ikikpan̄. 22 Ukpa ebi ìkiwọp ama ya esisibi inu inikwek ebi Ai itele. Ebi Ai enikup me etete ebi Ijeren, ebi Ijeren etatap ema me ekpet, mè ikpan̄ ema isan̄a, kpunu ene geege òyayaka isik me ògat ugwem, kpunu si ene geege òlilibi inwọnọ. 23 Ire, ebi Ijeren etetet ogwu ubọọn̄ Ai me njijoon̄, mè isa ọmọ ijet Josuwa.

24 Ebi Ijeren ekpakpan̄ otutuuk ebi Ai isan̄a kpai me oron akọn̄ me emen èwê ere ebi Ai erieen̄be ema isi itap. Mgbọ otutuuk ebi Ai cha ekwaan̄be isan̄a kpai me otu oge akọn̄ ebi Ijeren me emen èwê, ebi Ijeren egwugwu ikom isi emen ama Ai, mè isa oge akọn̄ ikpan̄ otutuuk ebi ìkup me emen ama ya isan̄a si kpai. 25 Otutuuk ebi Ai ìkwakwaan̄ me usen ya, ebirieen̄ mè ebibaan̄, ìre akọp mè obop ene iba, òrere otutuuk ebi ama Ai. 26 Mege ebi Ijeren ekpan̄be otutuuk ebi Ai isan̄a kpai, Josuwa ìbebene otunwa kan̄ ya ifo inyọn̄ ida ama Ai, ìkagele ubọk kan̄ ìsiki mgbọ geege. 27 Ebi Ijeren ekpukpulu anam, mè ifum inu me ama ya isak, ike Okumugwem onyibe Josuwa ida ibe erọ.

28 Ikeya ke Josuwa owọp Ai, mè irọ inyi ikana ǹrioon̄ ire mgbọ geelek. Ikeya ke Ai osa ikana ama òyayat ita mege inire cherekeyi. 29 Ire, ogwu ubọọn̄ ama ya ke Josuwa okpat ijeen̄ me otu uti mege ire ikakwun̄. Mgbọ yaage ura onimbe, Josuwa onyinyi ida, ejejene nkwukwu kan̄ me otu uti, mè isa isi itọp ito me isotu otunchit ama ya, mè ikpulu ewuuk igwook ikeme itiik ibene. Èdọ ewuuk ya ìkukup si mege inire cherekeyi.

30 Ike mgbọ okije, Josuwa mè ebi Ijeren enenije ire lek ogoon̄ Eban. Josuwa oneninama ntook me inyọn̄ ogoon̄ ya inyi Okumugwem, Awaji ebi Ijeren. 31 Josuwa ìnama ntook ya ikpọ me lek ubọk Mosis ogwu ikwaan̄ Okumugwem onyibe ida, ike egebe me emen Ikpa Ikan kè Mosis ibe ke ewuuk ebesa inama ntook ngwugwa ìbore ewuuk eyi ubọk ene geege ìkasa okwukwut ìtọbọ ìbum. Mgbọ enamabe isan̄a, ema egwagwa ngwugwa echi ewọwọp iriọk mè ngwugwa esuuk me inyọn̄ ntook ya inyi Okumugwem. 32 Me ere ya, me isi otutuuk ebi Ijeren, Josuwa okpọkpọk ige otutuuk ikan, echi Mosis ogebe cha, itoon̄ me lek ewuuk. 33 Otutuuk ebi Ijeren melek ebi ugane kiban̄, mè ebi isi akọn̄, mè ebi oyerebet, mè ebi ichen, mè ebi bọn owot, ekekeke me agba agan̄ iba me lek okop inyan̄a-ibot Okumugwem me isi ebi ngwugwa, ìrere ebi otoko kè Libai, ebi ìkiben okop ya. Ìkike iba kiban̄ ekeke me isi ogoon̄ Gerijim, sà ìkike iba keyilọ ekeke me isi ogoon̄ Eban, ike Mosis ogwu ikwaan̄ Okumugwem owuukbe lek inyi ida mgbọ înyibe nteme ofolek ubọk ebekisa igbana ebi Ijeren.

34 Me mgburudun̄, Josuwa onenifuk ikọ geelek òkup me emen ikan, echi ugbana, mè echi ufieek-otu, isibi, ike egebe me emen Ikpa Ikan. 35 Kpunu ibot ikọ geege me lek otutuuk ikan Mosis onyibe eyi Josuwa ikafukge ìsibi me isi otutuuk ebi Ijeren, ike ema etitiin̄be, melek ebibaan̄, mè asa nsabọn, melek ebi ichen ebi ìgọgọọk ema iluk.